1“Kambe sweswi, wee Yobo, wa nga yingisa marito ya mina,
U rhiya tindleve eka marito ya mina hinkwawo.
2Vona, ndzi ahlamisile nomu wa mina,
Ririmi ra mina ri ndzakambula emalakeni ya mina.
3Ndzi ta vulavula hi ku lulama ka mbilu yanga,
Milomu ya mina yi ta vula miehleketo ya mina hi ntiyiso.
4I moya wa Xikwembu lowu ndzi endleke,
Ku huhutela ka Lowa matimba hinkwawo ka ndzi hanyisa.
5Ndzi hlamule, loko u swi kota,
Lunghisa marito emahlweni ka mina, u yima la.
6Waswivo, ndzi fana na wena emahlweni ka Xikwembu,
Na mina ndzi vumbiwe hi vumba;
7Ku chava ka mina ku nga ka ku nga ku tshukisi,
Ni ku tika ka mina ku nga ka ku nga ku tikeri.
8“Kunene u vurile etindleveni ta mina,
Ndzi twile mpfumawulo wa marito ya wena, u te:
9‘Ndzi basile, a ndzi dyohanga,
A ndzi na nandzu, a ndzi hombolokanga.
10Kambe, Xikwembu xi kumile nandzu eka mina,
Xi ndzi languta kukotisa nala wa xona.
11Xi bohile milenge ya mina hi khotso,
Xi langutisa tindlela ta mina hinkwato.’
12“Vona, ndza ku byela, u hoxile kwalaho,
Hikuva Xikwembu xi tlula vanhu hi vukulu.
13U xi tengisela yini?
Hikuva a xi hlamuli etimhakeni ta xona hinkwato.
14Hambiswiritano,
Xikwembu xi vulavula kan'we,
Na kambirhi, kambe a xi tsundzuki hi munhu.
15Xi vulavula hi milorho ni ku vona ka vusiku,
Loko vanhu va khomiwile hi vurhongo lebyo tika,
Loko va khutsehela emasangwini ya vona.
16Hi laha xi hlavutelaka vanhu,
Xi tiyisa dyondzo leyi xi va dyondzisaka ha yona.
17Xi ta tlherisa munhu eku endleni ka yena,
Xi papalatisa ku tikurisa eka yena;
18Xi n'wi sivela leswaku a nga xikeli esirheni,
Ni ku dlawa hi fumu lero kariha.
19“Ku vaviseka, na kona,
ka n'wi laya loko a ri emasangwini;
A twa marhambu ma pandza, ma nga miyeri.
20Loko malaka ma phiriwa hi vuswa,
A nga naveri swakudya leswi xawulaka.
21Vumbhurhi bya miri wa yena byi hela,
Ku vonaka marhambu lama nga voniwangiki.
22Moya wa yena wu ri kusuhi ni sirha,
Vutomi bya yena byi tshinelela lava lovisaka.
23Loko ntsumi yi ri kona leyi n'wi khongelelaka,
Yi ri yin'we exikarhi ka khume ra madzana,
Yi kombisa munhu ndlela leyi lulameke,
24Xikwembu xi n'wi tsetselela, xi ku eka yona:
‘N'wi lamulele, a nga ti tshuka a xikela esirheni;
Ndzi kumile lexi nga n'wi kutsulaka.
25Kutani miri wa yena wu hlukela ku tlula evuhlangini.
A tlhelela emasikwini ya vuntshwa bya yena.’
26Loko a khongela Xikwembu, xi n'wi endla hi tintswalo,
Xi n'wi kombisa mombo wa xona hi ku tsaka,
Xi n'wi tlherisela ku lulama ka yena.
27A yimbelela emahlweni ka vanhu a ku:
‘Ndzi dyohile, ndzi homboloxe ku lulama.
Kambe a ndzi beriwanga ku dyoha ka mina.
28Xikwembu xi kutsurile moya wa mina leswaku ndzi nga xikeli esirheni,
Kutani vutomi bya mina byi tsakela ku vonakala.’
29“Vona, Xikwembu xi endle sweswo hinkwaswo,
Kambirhi, ni kanharhu eka munhu,
30Ku tlherisa moya wa yena, wu nga ngheni esirheni,
Leswaku a voningiwa hi ku vonakala ka vutomi.
31Yingisela, Yobo, u ndzi twa!
U miyela, kutani mina ndzi ta vulavula!
32Loko u ni ku vulavula, ndzi hlamule!
Vulavula, hikuva ndzi rhandza ku ku lukela;
33Loko swi nga ri tano, wena, ndzi yingise!
Miyela, ndzi ta ku dyondzisa vutlhari.”
