YOBO 30

₁“Kambe sweswi, ndzi xihlekiso

eka lava nga vatsongo eka mina,

Lava ndzi nga sola ku veka vatata wa vona

Exikarhi ka timbyana ta mitlhambi ya mina.

₂Xana a ndzi ta endla yini hi matimba ya mavoko ya vona xana? Matimba ma herile eka vona.

₃Va omile hi ku pfumala, ni ndlala,

Va pepetseka emananga, laha ku tshweke khale ni ku onhaka.

₄Va tsuvula leswo mila leswi bavaka eswihlahleni,

Timitsu ta swimidyana i swakudya swa vona.

₅Va hlongoriwa exikarhi ka vanhu,

Va huweleriwa kukotisa vayivi.

₆Va tiakele exiweni lexi chavisaka,

Ni le malakeni ya misava, ni le maribyeni.

₇Va kolola exikarhi ka swihlahla,

Va etlela swin'we ehansi ka swigatlu.

₈I vana va swihunguki ni va vanhu lava nga riki na vito.

Va hlongoriwa emisaveni ya vanhu.

₉“Sweswi ndzi hundzukile risimu ra vona.

Ni ku vulavula ka vona.

₁₀Ndzi manyala eka vona, va ndzi sukela,

A va chavi ku ndzi tshwutela marhi emahlweni.

₁₁A va ha tikhomi, va ndzi tsongahata,

Va tshikile ku tikhoma hinkwako emahlweni ka mina.

₁₂Rixaka leri ra ku biha, ri yima evokweni ra mina ra xinene,

Va susumeta milenge ya mina ehansi ka mina,

Va tiboxela tindlela ku ta ndzi onha.

₁₃Va onha ndlela ya mina, va engetela ku onhakeriwa ka mina,

Kasi vona va nga ka va nga pfuniwi hi munhu.

₁₄Va ndzi tela kukotisa loko ngi va nghena hi xipfhanyo lexi anameke,

Va tihoxa exikarhi ka marhumbi.

₁₅Ku chavisa hinkwako ku ndzi kumile,

Ku hlongola xidzumo xa mina kukotisa mheho,

Ku kateka ka mina ku hundzile kukota papa.

₁₆“Sweswi, moya wanga wu halakela endzeni ka mina,

Masiku ya khombo ma ndzi kumile.

₁₇Vusiku bya ndzi tlhava, byi tsuvula marhambu ya mina,

Vuvabyi bya ndzi phorha, a byi miyeri;

₁₈Byi hundzurile nguvu ya mina hi matimba ya byona,

Byi ndzi kamanyeta kukotisa banci.

₁₉Xikwembu xi ndzi wisile endzhopeni,

Kutani ndzi fana ni ntshuri, ni nkuma.

₂₀Ndzi huwelela eka wena, kambe a ku ndzi hlamuri;

Ndzi yimile kwala, kutani a ndzi honolela hi mahlo.

₂₁Eka mina u hundzukile nala la levaka,

Wa ndzi hlongorisa hi voko ra wena ra matimba.

₂₂U ndzi tlakula hi mheho, u ndzi fambisa ekule,

U ndzi herisa hi mpfumawulo wa xihuhuri.

₂₃Hikuva ndza swi tiva leswaku u ndzi yisa eku feni,

Endlwini yoleyo hinkwavo lava hanyaka va faneleke ku hlengeletana eka yona.

₂₄“Ntsena lava lovaka a va tshambuluti mavoko xana?

Lava nga ekhombyeni a va kombeli ku pfuniwa-ke?

₂₅Xana a ndzi rilangi ehenhla ka loyi a tshameke enhlomulweni?

Mbilu ya nga a yi tsetselelanga xisiwana-ke?

₂₆A ndzi langutela ku kateka, kutani ndzi tele hi khombo;

A ndzi langutela ku vonakala, kambe munyama wu fikele.

₂₇Marhumbu ya mina ma vila, ma nga miyeli;

Ndzi kumeriwe hi masiku ya swirilo.

₂₈Ndzi famba ndzi tshwile, kambe ku nga ri hi dyambu;

Ndzi yima enhlengeletanweni, ndzi huwelela.

₂₉Ndzi hundzukile makwavo wa goya,

Ni nakulobye wa yimbhu.

₃₀Nhlonge ya mina yi dyuhele, yi phumunheka,

Marhambu ya mina ma hisa, ma omile.

₃₁Haripa ya mina yi hundzukile xirilo,

Ni nanga ya mina, rito ra lava rilaka.”