YOBO 28

₁“Ku ni mugodi laha silivhere yi humaka kona,

Ni nsuku wu kona laha va celaka kona, wu ta basisiwa.

₂Nhumbu yi huma emisaveni,

Koporo yi huma emaribyeni loko ma nyukisiwile.

₃Munhu u herisa munyama;

U vonisisa vuento hinkwabyo,

Leswaku a kuma ribye leri fihliweke emunyameni ni le ndzhutini wa rifu.

₄U cela mugodi ekule ni laha vanhu va akeke kona;

Nenge wa yena wa rivala ku n'wi pfuna,

U lengalenga, a hayekiwile ekule ni vanhu.

₅Misava, hi kona ku humaka vuswa,

Kasi ehansi ka yona, yi pfilunganyisiwa kukotisa ndzilo.

₆Emaribyeni ya yona ku huma safiri,

Ni ntshuri wa nsuku.

₇“Gama a ri tivi ndlela ya kona,

A yi voniwi hi mahlo ya makoti.

₈Swiharhi leswi chavisaka a swi kandziyi kona,

Nghala ya matimba a yi hundzi kona.

₉“Munhu a nghenisa voko ra yena eribyeni lero nonon'hwa,

U phema tintshava hi timitsu ta tona.

₁₀U cela mikovotlo emaribyeni,

Kutani tihlo ra yena ri vona swilo hinkwaswo leswi tengeke.

₁₁U sivela mati lama pfutaka ya milambu,

U humesela eku vonakaleni leswi fihliweke.

₁₂“Kambe vutlhari, byi kumiwa kwihi?

Ku twisisa, ku tshamele tlhelo rihi?

₁₃Munhu a nga ka a nga ringanisi risima ra byona;

A byi kumiwi emisaveni ya lava hanyaka.

₁₄Xidziva xi ku: ‘A byi kona ka mina’;

Kutani lwandle ri ku: ‘A ndzi na byona.’

₁₅Nsuku lowu tengeke wu nga ka wu nga byi xavi,

Ni ntsopfu, wu nga ka wu nga pimeriwi nxavo wa byona;

₁₆Nsuku wa Ofiri wu nga ka wu nga pimiwi na byona exikalweni,

Hambi yi ri onikisi ya risima, ni safiri;

₁₇Nsuku ni nghilazi, a swi xaxameri na byona,

Byi nga ka byi nga xaviwi

hi swibya swa nsuku lowunene.

₁₈Korale ni kristala swi nga ka

swi nga vuriwi eka byona:

Kutani vutlhari byi tlula ngopfu tiperela;

₁₉Topazi ya Etiyopiya a yi ringani na byona,

Ni nsuku lowo tenga wu nga ka wu nga ngheni exikalweni na byona.

₂₀Loko swi ri tano, vutlhari byi huma kwihi-ke?

Ni ku twisisa ku akile tlhelo rihi-ke?

₂₁Byi fihleriwe mahlo ya hinkwavo lava hanyaka,

Byi fihleriwe tinyanyana ta le tilweni.

₂₂Khele ni rifu swi te:

‘Hi twile mpfumawulo wa byona hi tindleve.’

₂₃“Hi xona Xikwembu lexi tivaka tindlela ta byona.

Xi tiva laha byi tshamaka kona;

₂₄Hikuva xi vona ku fikela makumu ya misava,

Xi languta hinkwaswo swa le hansi ka tilo.

₂₅Siku xi nyikaka moya ku tika ka wona,

Ni loko xi pima mati hi mpimo,

₂₆Siku xi byelaka mpfula milawu,

Ni ndlati leyi pfumaka, endlela ya yona,

₂₇Enkarhini wolowo xi byi vona, xi byi hlaya,

Xi byi tiyisa, ni ku byi ringa.

₂₈Kutani xi ku eka munhu:

‘Vona, xichavo xa Hosi, hi byona vutlhari;

Ku papalata swo biha, hi kona ku twisisa.’ ”