YOBO 21

₂“Yingiselani, yingiselani marito ya mina,

Mi ndzi nyika ku chavelela koloko.

₃Ndzi tshikeni, ndzi vulavula;

Loko ndzi vulavurile, u ta tiva ku ndzi hleka.

₄Xana ndzi vilela hi vanhu xana?

Swi nga va yini loko mbilu ya mina ya vilela-ke?

₅Ndzi languteni hi mahlo mi ta hlamala;

Mi nga veka mavoko emilon'wini ya n'wina.

₆Loko ndzi swi tsundzuka, ndzi khomiwa hi ku chava,

Kutani miri wa mina wu kindlimuka.

₇Xana timbabva ti hanya ha yini?

Va dyuhala, va talela hi xuma ha yini xana?

₈Rixaka ra vona ri tiyisiwa na vona emahlweni ka vona,

Ni vatukulu va vona va yima emahlweni ka vona.

₉Tindlu ta vona ti tshamile eku tsakeni, ti sirheriwa, a ti chavi,

Nhonga ya Xikwembu a yi tshami ehenhla ka vona.

₁₀Tinkunzi ta vona a ti pfumali vana,

Mathokazi ya vona ma tswala, a ma holoti.

₁₁Vana va vona va huma etindlwini kukotisa ntlhambi,

Swihlangi na swona, swa tlalamba.

₁₂Va yimba miloti ya swingomana ni mandzandzana,

Va titsakisa hi vunanga.

₁₃Va heta masiku ya vona emitlangweni,

Kutani va xikela endhawini ya vafi hi nomu lowu.

₁₄Hambiswiritano, va ku eka Xikwembu: ‘Suka eka hina,

A hi rhandzi ku tiva tindlela ta wena.

₁₅Lowa matimba hinkwawo i yini, leswaku hi n'wi tirhela,

Hi ta kuma yini hi ku n'wi khongela xana?’

₁₆Vonani! Ku tsaka ka vona a ku le mavokweni ya vona-ke?

Ku tiyingisa ka timbabva a ku ve kule na mina!

₁₇“Hi nkarhi wun'wana rivoni ra timbabva ri timeka,

A va tali ku wela hi khombo,

Xikwembu a xi andzise ku va avela vukari bya xona.

₁₈Va kota byanyi lebyi hungiwaka hi mheho,

Kumbe mungu lowu vutliwaka hi xihuhuri.

₁₉Mi ku: ‘Xikwembu xi hlayisela vana ku biwa ka ku homboloka ka tata wa vona,’

Kambe a xi n'wi be yena, a ta yingisa!

₂₀A a tivone yena hi mahlo ya yena ku wa ka yena,

A nwisiwa vukari bya Lowa matimba hinkwawo,

₂₁Hikuva a nga vuri nchumu hi yindlu ya yena ni vana va yena,

Loko ntsengo wa tin'hweti ta yena wu herile.

₂₂Xana Xikwembu xi nga dyondzisiwa vutivi?

Kasi hi xona lexi avanyisaka mimoya ya le tilweni!

₂₃Un'wana u fa a tshamile endzalweni,

A tsakile a ri ni ku rhula loko nandziha.

₂₄Matshanga ya yena ma tele ntswamba,

Ni mongo wa marhambu ya yena wu tsakama hi masiku.

₂₅Kasi un'wana u fela emasangwini ya moya wa yena,

A nga nantswangi ku tsaka.

₂₆Lavambirhi va etlele entshurini, va xaxamele,

Swivungu swi va funengeta havambirhi.

₂₇“Vonani, ndzi tiva mianakanyo ya n'wina,

Ni ku avanyisa loku mi ndzi avanyisaka ha kona, loku nga lulamangiki.

₂₈Hikuva mi ri: ‘Yi kwihi yindlu ya hosanyana?

Wu kwihi ntsonga wa timbabva laha ti akeke kona?’

₂₉Xana a mi vutisanga vaendzi xana?

Mi hlula hi yini ku pfumela vumbhoni lebyi tiyisiwaka hi vona?

₃₀Loko va ku: ‘Timbabva ta sirheleriwa hi siku ra ku onhaka,

Hi siku ra vukari, ti vekiwa hitlhelo.’

₃₁I mani la nga ta n'wi holovela emahlweni hikwalaho ka mafambele yakwe,

U ta tlheriseriwa hi mani leswi a nga swi endla?

₃₂U yisiwa esirheni.

Kutani wa ha ri yena la langutelaka exitsulutsulwini xa rona.

₃₃Mabuwu ya nkova ma vevuka ehenhla ka yena;

Vanhu hinkwavo va longolokile hile ndzhaku ka yena,

Lavo rhanga a va hlayiwi hi ku tala ka vona.

₃₄Loko swi ri tano mi ndzi humesele yini ku chavelela ka hava?

Eku hlamuseleni ka n'wina ku sele mona ntsena.”