1“Ku hefemula ka mina ka lahleka,
Masiku ya mina ma timeka,
Sirha ri ndzi langutele.
2Hakunene mitseketselo yi ndzi rhendzele.
Kutani mahlo ya mina ma byisiwile hi ku hlohlotela ka vona!
3“Wa nga ndzi vekela xilangutelo ematshan'weni ya mina, u va wena u humelelaka,
Hikuva i mani la nga ndzi yimelelaka, a katsakanya na mina?
4Hikuva timbilu ta vona u ti pfalele ku twisisa;
Hikwalaho u nga ka u nga va tlakusi.
5Loyi a nyiketaka vanakulobye leswaku va phangiwa,
Mahlo ya vana va yena ma ta hela.
6“U ndzi endlile xivuriso xa matiko,
Ndzi loyi va n'wi tshwutelaka marhi emahlweni,
7Mikosi yi sivile mahlo ya mina;
Kutani swirho hinkwaswo swa mina swi fana ni mindzhuti.
8Lavo lulama va hlamala hikwalaho,
Lava nga hava milandzu va pfukela vakanganyisi vukari.
9Hambiswiritano, lowo lulama u tiyisela endleleni ya yena,
Ni lowa mavoko yo basa u engetela ku tiya mbilu.
10Loko mi ri n'wina hinkwenu, tlhelani mi vuya;
Ndzi nga ka ndzi nga voni munhu loyi a tlhariheke exikarhi ka n'wina.
11Masiku ya mina ma hundzile,
Makungu ya mina lama rhandziwaka hi mbilu ya mina,
Makungu ya mina ma wile hansi.
12Va ku: ‘Vusiku i nhlekanhi,
Ku vonakala, loko ku ri kona,’ va ku: ‘Munyama wu kusuhi!’
13Kutani ndzi langutile tlhelo ra vafi leswaku yi va yindlu ya mina,
Ndzi andlarile masangu ya mina tlhelo ra munyama.
14Ndzi ri eka sirha: ‘U tatana!’
Ni ka swivungu: ‘Mi manana ni vamakwerhu!’
15Kutani sweswi, ku tshemba ka mina ku kwihi?
Ku ta voniwa hi mani, xana?
16Ku ta xikela enyangweni ya ndhawu ya vafi,
Laha hi nga ta etlela swin'we entshurini.”
