YOBO 16

₂“Timhaka leto tano, ndzi xurhile tona;

Hinkwenu mi vachaveleri lava ndzi karhataka.

₃Marito ya swahava ma herile xana?

Kumbe leswi ku hlamurisaka ngopfu, i yini-ke?

₄Na mina a ndzi ta vulavula kukotisa n'wina,

Loko ngi mi ri exitshan'weni xa mina,

A ndzi ta luka timhaka ehenhla ka n'wina,

Ndzi nonon'hwisa nhloko eka n'wina,

₅A ndzi ta va muhlamuri hi nomu wa mina,

A ndzi ta mi tiyisa hi ku ndzakambula ka milomu ya mina.

₆“Hambi ndzi vulavula, ku vaviseka ka mina a ku nga miyeli;

Hambi ndzi nga tshika, ndzi nga vona ku pfuniwa kwihi?

₇Oho! Sweswi, u ndzi hete matimba,

U hangalasile yindlu ya mina hinkwayo;

₈U ndzi khomile ku ndzi endla vumbhoni;

Ku ondza ka mina ku yimile ku ndzi kaneta emahlweni.

₉Vukari bya yena byi ndzi handzula, byi ndzi landzelela;

U ndzi getselela meno.

Loyi a nga nala eka mina, u ndzi tlhava hi mahlo layo kariha.

₁₀Va ahlamisile milomu ya vona ngopfu ehenhla ka mina ku ndzi hlota,

Va ndzi rhukana, va ndzi phakata marhama,

Va hlangene ku lwa na mina.

₁₁Xikwembu xi ndzi nyiketile emavokweni ya timbabva,

Xi ndzi hoxile emandleni ya lavo biha.

₁₂A ndzi hanya swinene, kambe xi ndzi hlakahlile,

Xi ndzi khoma hi nhamu, xi ndzi pulukanya hi le xikarhi,

Xi ndzi veka evuvekweni bya ku hoxa ka xona.

₁₃Miseve ya xona yi ndzi tele hi le henhla,

yi huma ematlhelo hinkwawo;

Xi ndzi tlhavile xi nga ri na tintswalo;

Xi chululela nyongwa ya mina ehansi,

₁₄Xi ndzi boxela mbanga ehenhla ka mbanga,

Xi ndzi wele ehenhla kukotisa nhenha.

₁₅Ndzi funengetile nhlonge ya mina hi nguvu leyo khwaxa,

Ndzi nyamise mombo wa mina hi ntshuri;

₁₆Mombo wa mina wu pfimbisiwa hi swirilo!

Ndzhuti wa rifu wu funengeta tinxiyi ta mina.

₁₇Hambiswiritano, a ku na ku homboloka emavokweni ya mina,

Xikhongelo xa mina xi basile.

₁₈“Wena misava, u nga tshuki u fihla ngati ya mina,

Mikololo ya mina a yi twakale hinkwako.

₁₉Ni sweswi, vona,

mbhoni ya mina yi le matilweni,

Mulandzuleri wa mina u le tlhelweni ra le henhlahenhla.

₂₀Hambi vanakulorhi va hundzukile va ndzi hleka,

Mahlo ya mina ma halatile mihloti eka Xikwembu.

₂₁Ngi ku ri ni muyimeri wa munhu emahlweni ka Xikwembu,

Ni wa n'wana wa munhu emahlweni ka nakulobye.

₂₂Hikuva malembe lama hlayiweke ma hundza,

Ndzi tifambela hi ndlela leyi ndzi nga tiki tlhelaka ha yona.