YOBO 14

₁“Munhu la velekiweke hi wansati

U ni masiku ma nga ri mangani; u xurha makhombo;

₂Wa mila, kutani a tsemiwa kukota xiluva;

Wa hundza kukotisa ndzhuti, a nga tshami a va kona.

₃Hi yena loyi u n'wi langutaka!

Kutani hi mina u ndzi yisaka emitengweni na wena!

₄Xana ku nga huma munhu la baseke eka munhu wa thyaka?

Ku nga ka ku nga humi na un'we.

₅Loko masiku ma hlayiwile,

ni ntsengo wa tin'hweti ta yena loko wu tiviwile hi wena,

Loko a vekiwile endzilakaneni wolowo, a nga ka a nga wu tluli.

₆Susa mahlo ya wena eka yena, u n'wi ha nkarhi leswaku a tsaka

Kukota la thoriweke loko a tsakela ku hela ka ntirho wakwe.

₇Hikuva ku dzuna ku kona eka murhi;

Hambi wu tsemiwa, wu tlhela wu mila, a wu tshiki ku hluka,

₈Hambi timitsu ta wona ti nga dyuhala emisaveni,

Xikundzu xa wona xi nga fela entshurini.

₉Hi ku twa mati wu pfuka,

Wu hluketa marhavi kukota murhi lowuntshwa.

₁₀Kumbe munhu, loko a file, a herile matimba;

U nyiketa moya, kutani u kwihi xana?

₁₁Mati ma helela emativeni,

Nambu wu phya, wu omelela;

₁₂Hi mukhuva wolowo munhu u etlela a nga ha pfuki,

Ku ko ku hela matilo, a nga ka a nga ha pfuki,

A nga ka a nga khindlimuki evurhongweni bya yena.

₁₃Yo! Loko ngi u ndzi fihlile exivandleni xa vafi,

U ndzi pfalela hi nkarhi, vukari bya wena byi ko byi hundza,

U ndzi vekela siku leri u nga ta ndzi anakanya ha rona.

₁₄Loko ngi munhu la feke a nga tlhela a hanya,

A ndzi ta yingisela hi masiku hinkwawo ya tinyimpi ta mina,

Ku fikela enkarhini lowu timhaka ta mina ti nga ta hundzuka.

₁₅A u ta ndzi vitana, a ndzi ta pfumela;

A u ta navela ntirho wa mavoko ya wena.

₁₆Kambe u hlaya vukandziyo bya mina,

U xiya swidyoho swa mina.

₁₇Ku dyoha ka mina ku lemiwile enkwameni,

U fungha hi fungho ku homboloka ka mina.

₁₈“Loko yi ri ntshava, loko yi mbundzuxiwile yi hela,

Ni ribye ri rhetemuka evutshan'weni bya rona.

₁₉Mati ma hlula maribye;

Maboboma ma kukuta ntshuri wa misava;

U onhisa sweswo ku dzuna ka munhu.

₂₀U n'wi sungula hi masiku, a kondza a suka;

U khwanyanisa mombo wa yena, u va u n'wi tlherisa.

₂₁Vana va yena, ni loko va chaviwa, a nga swi tivi;

Hambi va tsongahatiwa, a nga va tsundzuki.

₂₂Nyama ya yena yi twa ku vaviseka ka yona ntsena;

Moya wa yena wu ni gome ha swa wona ntsena.”