YOHANE 4

₁Kuteloko Hosi yi tiva leswaku Vafarisi va twile vanhu va ku: “Yesu u tlula Yohane hi ku endla vadyondzisiwa, ₂ni ku khuvula vanhu” (hambi a a nga ri yena Yesu la khuvulaka, kambe va ri vadyondzisiwa va yena); ₃a suka eYudiya a tlhelela eGaleliya. ₄Kambe a a fanekele ku tsemakanya tiko ra Samariya.

₅Kutani a fika emutini wun'wana wa le Samariya lowu vuriwaka Sikari, ekusuhi ni tiko leri Yakobo a nga ri nyika Yosefa, n'wana wa yena. ₆Xihlovo xa Yakobo a xi ri kona kwalaho. Kutani Yesu, hikuva a karhele hi ku famba, a tshama exihlobyeni. A ku lava ku va nkarhi wa ntlhanu na wun'we.

₇Kutani wansati wa Musamariya a ta eku keni ka mati. Yesu a ku eka yena: “Ndzi siyele ndzi nwa.” ₈Hikuva vadyondzisiwa va yena a va yile emutini ku ya xava swakudya. ₉Wansati wa Musamariya a ku eka yena: “Leswi u nga Muyuda u komberisa ku yini mati eka mina ndzi nga wansati wa Musamariya xana?” (Kasi Vayuda a va tolovelani ni Vasamariya.) ₁₀Yesu a hlamula, a ku eka yena: “Loko a wu tivile ku nyika ka Xikwembu, ni loyi a nge eka wena: ‘Ndzi siyele ndzi nwa,’ ingi u komberile eka yena, kutani a a ta va a ku nyikile mati lama pfelelaka.” ₁₁Wansati a ku eka yena: “Hosi, a ku na xikelelo xa ku ka, naswona xihlovo xi entile; mati walawo lama pfelelaka, u nga ma kuma kwihi xana? ₁₂Xana u nkulu eka Yakobo, tata wa hina, la hi nyikeke xihlovo lexi, a nga nwa eka xona, ni vana va yena, ni tihomu ta yena?” ₁₃Yesu a n'wi hlamula, a ku: “Un'wana ni un'wana la nwaka mati lawa, u ta tlhela a twa torha. ₁₄Kasi un'wana ni un'wana la nwaka mati lawa ndzi n'wi nyikaka wona, a nga ka a nga ha tlheli a twa torha ni siku ni rin'we; kambe mati walawo a nyikiwaka hi mina, xi ta va eka yena, xihlovo xa mati lama khulukelaka evutomini lebyi nga heriki.” Wansati a ku eka yena: ₁₅“Hosi, ndzi he mati wolawo, ndzi nga ha ti tama ndzi tela hi torha, ndzi nga ha ti tlhela ndzi ta eku keni kwala.” ₁₆Yesu a ku eka yena: “Famba u ya vitana nuna wa wena a ta halenu.” ₁₇Wansati a hlamula, a ku: “A ndzi na nuna.” Yesu a ku eka yena: “Wa vurisa loko u ku: ‘A ndzi na nuna,’ ₁₈hikuva u hanyile ni vanuna va ntlhanu, kutani loyi u nga na yena sweswi, a hi nuna wa wena; kwalaho wa vurisa.”

₁₉Wansati a ku eka yena: “Hosi, ndza swi vona leswaku u muprofeta. ₂₀Vatata wa hina va gandzerile entshaveni leyi, kutani n'wina mi ku, xivandla lexi va fanelaka ku gandzela eka xona, i Yerusalema.” ₂₁Yesu a ku eka yena: “Wansati, ndzi pfumele; nkarhi wa ta, lowu mi nga taka mi nga gandzeri Tatana entshaveni leyi, hambi ku ri eYerusalema. ₂₂N'wina mi gandzela lexi mi nga xi tiviki; hina hi gandzela lexi hi xi tivaka; hikuva ku hlayiseka ku huma eka Vayuda. ₂₃Kambe nkarhi wa ta, ni sweswi wu kona, lowu vagandzeri lavanene va nga ta gandzela Tatana hi moya ni ntiyiso, hikuva Tatana u lava lava n'wi gandzerisaka sweswo. ₂₄Xikwembu i Moya, lava xi gandzelaka va fanele ku xi gandzela hi moya ni ntiyiso.”

₂₅Wansati a ku eka yena: “Ndza swi tiva leswaku Mesiya, la vuriwaka Kriste, wa ta; loko a tile, u ta hi tivisa timhaka hinkwato.” ₂₆Yesu a ku eka yena: “Hi mina loyi ndzi vulavulaka na wena.”

₂₇Kutani vadyondzisiwa va yena va fika, va hlamala hikuva a a vulavula ni wansati; hambiswiritano, a ku vanga na un'we la nga te eka yena: “U lava yini?” kumbe: “U vulavulela yini na yena?” ₂₈Kutani wansati a siya khuwana ra yena, a ya emutini, a ku eka vanhu: ₂₉“Tanani mi ta vona munhu la ndzi byeleke hinkwaswo leswi ndzi nga swi endla, xana a nga ka a nga vi yena Kriste xana?” ₃₀Kutani va huma emutini va ta eka Yesu. ₃₁Enkarhini wolowo vadyondzisiwa va yena a va n'wi khongotela, va ku: “Rabi, dyana!” ₃₂A ku eka vona: “Ndzi ni swakudya leswi ndzi swi dyaka, leswi mi nga swi tiviki.” ₃₃Vadyondzisiwa va vutisana, va ku: “Kumbe un'wana u n'wi tiserile swakudya xana?” ₃₄Yesu a ku eka vona: “Swakudya swa mina i ku endla ku rhandza ka la ndzi rhumeke, ni ku heta ntirho wa yena. ₃₅Xana a mi hlayi leswaku ku sele tin'hweti ta mune, kutani ku ta tshoveriwa? Kambe ndzi ri eka n'wina: Tlakusani mahlo ya n'wina, mi languta masimu, hikuva ma vupfele ku tshoveriwa. ₃₆Kambe la tshovelaka u teka hakelo, a hlengeletela vutomi lebyi nga heriki mavele, leswaku la byalaka a tsakisana ni la tshovelaka. ₃₇Hikuva kwalaho rito ra vurisa leri nge: ‘Un'wana wa byala, un'wana wa tshovela.’ ₃₈Mina ndzi mi rhumile ku tshovela laha mi nga tirhangiki kona; van'wana va tirhile, kutani n'wina mi nghenile entirhweni wa vona.”

₃₉Vasamariya lavo tala va muti wolowo va pfumela eka yena hi marito lama nga vuriwa hi wansati loko a te: “U ndzi byerile timhaka hinkwato leti ndzi ti endleke.” ₄₀Kuteloko Vasamariya va fikile eka yena, va n'wi khongela leswaku a tshama na vona; kutani a xwa masiku mambirhi kona. ₄₁Kambe lava nga pfumela eka yena hikwalaho ka marito ya yena, va tlurisa hi ku tala. ₄₂Kutani va ku eka wansati: “A ha ha pfumeri hikwalaho ka rito ra wena; hikuva na hina hi n'wi twile, kutani ha swi tiva leswaku loyi, hi yena Kriste kunene, mukutsuri wa misava.”

₄₃Loko ku hundzile masiku mambirhi, a suka kona a ya eGaleliya. ₄₄Hikuva na yena Yesu a a vurile, a ku: “Muprofeta a nga khensiwi etikweni ra rikwavo.” ₄₅Kuteloko a fikile eGaleliya, Vagaleliya va n'wi amukela, hikuva a va vonile hinkwaswo leswi a swi endleke eYerusalema hi siku ra nkhuvo; hikuva na vona a va yile enkhubyeni. ₄₆Kambe Yesu a tlhela a ya eKana wa Galeliya laha a nga hundzula mati vhinyo kona.

Ndhuna ya hosi a yi ri kona, leyi n'wana wa yona a a vabya eKapernawume. ₄₇Kuteloko munhu loyi a twile leswaku Yesu u tile eGaleliya a huma eYudiya, a ta eka yena a n'wi khongela leswaku a ngirimela a ya hanyisa n'wana wa yena, hikuva a a ri ekusuhi ni ku fa. ₄₈Yesu a ku eka yena: “Loko mi nga voni mahlori ni masingita, a mi pfumeri.” ₄₉Ndhuna ya hosi yi ku eka yena: “Hosi, wanga ngirimela, n'wananga a nga si fa.” ₅₀Yesu a ku eka yena: “Famba, n'wana wa wena u hanyile.” Kutani munhu loyi a pfumela mhaka leyi Yesu a n'wi byeleke yona, a tifambela. ₅₁Kuteloko a ha ngirimela, a hlangana ni malandza ya yena ma n'wi tivisa, ma ku: “N'wana wa wena u hanyile.” ₅₂A va vutisa nkarhi lowu a nga hanya ha wona. Va ku eka yena: “Tolo, hi nkarhi wa ntlhanu na mimbirhi, ku rhurhumela ku n'wi sukele.” ₅₃Kutani tata wa n'wana a tsundzuka leswaku hi wona nkarhi lowu Yesu a nga te eka yena: “N'wana wa wena u hanyile;” kutani a pfumela ni va yindlu ya yena hinkwavo.

₅₄Hi xona xikombiso xa vumbirhi lexi Yesu a xi endleke loko a fikile eGaleliya, a huma eYudiya.