YOHANE 2

₁Hi siku ra vunharhu, nkhuvo wa vukati wu va kona eKana wa Galeliya kutani mana wa Yesu a a ri kona. ₂Yesu na yena a a rhambiwile enkhubyeni ni vadyondzisiwa va yena. ₃Kuteloko vhinyo yi herile, mana wa Yesu a ku eka yena: “A va ha ri na vhinyo.” ₄Yesu a ku eka yena: “Wansati, mhaka ya mina na wena hi yihi xana? Nkarhi wa mina a wu si fika.” ₅Mana wa yena a ku eka malandza: “Endlani hinkwaswo leswi a nga ta mi byela swona.” ₆Kutani swikhuwana swa ntlhanu na xin'we a swi ri kona, leswi Vayuda va hlambelaka eka swona; xin'wana ni xin'wana xi enela mipimo mimbirhi, kumbe minharhu. ₇Yesu a ku eka vona: “Tatani swikhuwana leswi hi mati,” kutani va chela swi tala. ₈A ku eka vona: “Kanani sweswi, mi yisa eka mufambisi wa nkhuvo.” Kutani va yisa. ₉Kuteloko mufambisi wa nkhuvo a nantswile mati lama hundzukeke vhinyo (kambe a a nga tivi laha yi humaka kona, swi tiviwa hi malandza ntsena lama nga kelela mati), a vitana muteki, a ku eka yena: ₁₀“Munhu un'wana ni un'wana u rhanga a humesa vhinyo leyo nandziha kutani loko va nwile, ku tisiwa leyi nga nandzihiki ngopfu; kambe wena u hlayisile vhinyo leyo nandziha ku fika sweswi!”

₁₁Mahlori lawa hi wona lawa Yesu a nga sungula ha wona eKana wa Galeliya, a kombisa ku twala ka yena; kutani vadyondzisiwa va yena va pfumela eka yena.

₁₂Endzhaku ka swona, a ngirimela eKapernawume a ri ni mana wa yena, ni vamakwavo, ni vadyondzisiwa va yena; kutani va xwa kona masiku ma nga ri mangani.

₁₃Paseka ya Vayuda a yi ri ekusuhi, kutani Yesu a tlhandlukela eYerusalema. ₁₄A kuma exivandleni lexi hlawuriweke, vanhu lava xavisaka tihomu, ni tinyimpfu, ni matuva, ni lava bindzurisaka hi mali, va tshamisile kona. ₁₅Kuteloko a endlile nkharisa wa tingoti, a va humesa hinkwavo etempeleni, ni tinyimpfu ni tihomu; ni mali ya lava bindzulaka a yi hangalasa, a susumeta ni matafula ya vona. ₁₆A ku eka lava xavisaka matuva: “Susani swilo leswi kwala; mi nga tshuki mi endla yindlu ya Tatana yi va yindlu ya mixavo.” ₁₇Kutani vadyondzisiwa va yena va anakanya leswaku ku tsariwile va ku: “Ku hiseka ka yindlu ya wena ku ndzi dyile.”

₁₈Kutani Vayuda va vulavula, va ku: “Hi xihi xikombiso lexi u hi kombisaka xona leswaku u nga endla swoleswo xana?” ₁₉Yesu a va hlamula, a ku: “Hahlulani tempele leyi, ndzi ta yi pfuxa hi masiku manharhu.” ₂₀Kutani Vayuda va ku: “Tempele leyi, yi akiwile hi malembe ya mune wa makume na ntlhanu na rin'we, kutani wena u ri, u ta yi pfuxa hi masiku manharhu xana?” ₂₁Kambe yena a a vula tempele ya miri wa yena. ₂₂Kuteloko a pfukile eku feni, vadyondzisiwa va yena va tsundzuka leswaku u va byerile mhaka leyi; kutani va pfumela Matsalwa ni rito leri nga vuriwa hi Yesu.

₂₃Kakuloko a ha ri eYerusalema, hi siku ra nkhuvo wa Paseka, vanhu lavo tala va pfumela vito ra yena, loko va vona mahlori lawa a ma endlaka. ₂₄Kambe Yesu a nga va tshembanga, hikuva a a va tiva hinkwavo; ₂₅naswona a a nga fanelanga ku byeriwa swa munhu, hikuva yena a a tiva leswi nga etimbilwini ta vanhu.