Xikhongelo xa vuprista.
1Kuteloko Yesu u vurile timhaka leti, a tlakusela mahlo ya yena ehenhla, a ku:
“Tatana, nkarhi wu tile, dzunisa N'wana wa wena, leswaku N'wana wa wena a ku dzunisa na yena; 2hilaha u n'wi nyikeke vuhosi ehenhla ka nyama hinkwayo, leswaku hinkwavo lava u n'wi nyikeke vona, yena a va nyika vutomi lebyi nga heriki. 3Kambe vutomi lebyi nga heriki, hileswaku va ku tiva wena Xikwembu xi ri xin'we xa ntiyiso, na Yesu Kriste loyi u n'wi rhumeke.
4“Ndzi ku dzunisile la emisaveni, ndzi hetile ntirho lowu u ndzi nyikeke wona leswaku ndzi wu tirha. 5Sweswi, wena Tatana, ndzi dzunise eka wena hi ku dzunisiwa loku ngi ndzi ri na kona eka wena, misava yi nga si va kona.
6“Vito ra wena ndzi ri tivisile vanhu lava u ndzi nyikeke vona emisaveni; a va ri va wena, kutani u ndzi nyikile vona, kutani va hlayisile rito ra wena. 7Sweswi, va tivile leswaku hinkwaswo leswi u ndzi nyikeke swona, swi huma eka wena. 8Hikuva ndzi va nyikile marito lawa u ndzi nyikeke wona; kutani va ma amukerile, va swi tivile swinene leswaku ndzi huma eka wena, kambe va pfumerile leswaku hi wena loyi u ndzi rhumeke. 9Ndza va khongelela; a ndzi khongeleri misava, kambe ndzi khongelela lava u ndzi nyikeke vona, hikuva i va wena. 10Hinkwaswo leswi nga swa mina, i swa wena; ni swa wena, i swa mina; kutani ndzi dzunisiwa eka vona. 11A ndza ha ri la emisaveni, kambe vona va ha ri emisaveni; kutani mina ndzi ya eka wena. Tatana la kwetsimeke, hlayisa lava u ndzi nyikeke vona evitweni ra wena, va ta endla un'we kukotisa hina. 12Loko ndza ha ri na vona emisaveni, a ndzi va hlayisa evitweni ra wena. Ndzi hlayisile lava u ndzi nyikeke vona, kutani a ku na un'we la loveke, loko a nga ri n'wana wa ku lova, leswaku Matsalwa ma endleka. 13Kutani sweswi, ndzi ya eka wena, kambe ndzi vulavula timhaka leti, ndza ha ri emisaveni, leswaku ku tsaka ka mina loku hetisekeke ku va eka vona hi xiviri. 14Ndzi va nyikile rito ra wena, kutani misava yi va vengile; hikuva a hi va misava, kukotisa mina ndzi nga riki wa misava. 15A ndzi ku khongeri leswaku u va susa emisaveni, kambe swi ri leswaku u va sirhelela eka leswo biha. 16A hi va misava, kukotisa mina ndzi nga riki wa misava. 17Va kwetsimise entiyisweni wa wena; rito ra wena hi wona ntiyiso. 18Kukotisa loko u ndzi rhumile emisaveni, na mina ndzi va rhumile emisaveni. 19Kutani ndzi tibasisela vona, leswaku na vona va basisiwa entiyisweni.
20“A ndzi khongeleri vona ntsena, kambe ndzi khongelela na vona lava nga ta pfumela eka mina hi rito ra vona; 21swi ri leswaku hinkwavo va va un'we kukotisa leswi wena, Tatana, u nga eka mina, na mina ndzi nga ka wena; na vona va endla un'we na hina, leswaku misava yi ta pfumela leswaku u ndzi rhumile. 22Ku kwetsima loku u ndzi nyikeke kona, ndzi va nyikile va ta endla un'we, kukotisa na hina hi nga un'we; 23mina ndzi va ka vona, wena u va ka mina, va ta hetiseka vun'weni hakunene, misava yi ta tiva leswaku u ndzi rhumile, ni leswaku u va rhandzile kukotisa leswi u ndzi rhandzeke. 24Tatana, lava u ndzi nyikeke vona, ndzi rhandza leswaku laha ndzi nga kona, na vona va va kona na mina, va ta hamba va hlalela ku kwetsima ka mina loku u ndzi nyikeke kona, hikuva u ndzi rhandzile misava yi nga si va kona. 25Tatana la lulameke, misava a yi ku tivanga, kambe mina ndzi ku tivile; na vona lava, va swi tivile leswaku u ndzi rhumile. 26Ndzi va tivisile vito ra wena, kutani ndza ha ta va tivisa rona, leswaku rirhandzu leri u ndzi rhandzeke ha rona, ri va eka vona, na mina ndzi va eka vona.”
