YEREMIYA 52

₁Sedekiyasi a a ri ni malembe ya 21 loko a sungula ku fuma, a fuma malembe ya khume na rin'we Yerusalema. Vito ra mana wa yena a a ri Hamutala, n'wana Yeremiya, wa Libina. ₂A endla leswo biha emahlweni ka Yehovha, swi ri hinkwaswo leswi Yoyakimi a endleke swona. ₃Hikuva, hikwalaho ka vukari bya Yehovha ehenhla ka Yerusalema, na Yuda, a va cukumeta emahlweni ka yena; kutani Sedekiyasi a hundzukela hosi ya Babilona.

₄Hi lembe ra ntlhanu na mune ra ku fuma ka yena, hi n'hweti ya khume, hi siku ra khume ra n'hweti, Nebukadnetsara, hosi ya Babilona, a ta ni nyimpi hinkwayo ya yena ku hlasela Yerusalema. A gova emahlweni ka wona, kutani va wu akela tinhulu ematlhelweni hinkwawo. ₅Muti wu rhendzeriwa ku fikela lembe ra khume na rin'we ra hosi Sedekiyasi. ₆Hi siku ra ntlhanu na mune ra n'hweti, ndlala a yi ri kona emutini, vanhu va tiko a va pfumala vuswa. ₇Kutani rirhangu ra muti ri boxiwa, vavanuna hinkwavo va nyimpi va huma nivusiku hi ndlela ya nyangwa, exikarhi ka makhumbi mambirhi, ekusuhi ni ntanga wa hosi; kutani va famba hi ndlela ya rivala loko Vakalediya va ri karhi va rhendzela muti. ₈Kambe nyimpi ya Vakalediya yi hlongorisa hosi, va yi kuma erivaleni ra Yeriko, kutani nyimpi hinkwaro ya yona yi yi tshika yi hangalaka. ₉Va khoma hosi, kutani va n'wi yisa eka hosi ya Babilona eRibila, etikweni ra Hamata, kutani a n'wi avanyisa kona.

₁₀Hosi ya Babilona yi dlaya vana va Sedekiyasi emahlweni ka yena; a dlaya ni tihosana hinkwato ta Yuda eRibila. ₁₁Kutani a boxa mahlo ya Sedekiyasi, a va a lerisa leswaku va n'wi boha hi tiketana timbirhi ta koporo; kutani hosi ya Babilona yi n'wi yisa eBabilona, yi n'wi nghenisa ekhotsweni ku fika eku feni ka yena.

₁₂Hi n'hweti ya vuntlhanu hi siku ra khume ra n'hweti (a ri ri lembe ra 19 ra ku fuma ka Nebukadnetsara, hosi ya Babilona), Nebuzaradani, ndhuna ya valanguteri, nandza wa hosi ya Babilona, a nghena eYerusalema. ₁₃A hisa yindlu ya Yehovha, ni yindlu ya hosi; a hisa tindlu hinkwato ta Yerusalema ni tindlu hinkwato ta vakulukumba. ₁₄Kutani nyimpi hinkwayo ya Vakalediya leyi ngi yi ri ni ndhuna ya valanguteri, yi mbundzuxa rirhangu leri rhendzelaka Yerusalema, exikarhi. ₁₅Loko swi ri swisiwana swa tiko, ni vanhu lava seleke, lava tshameke emutini, ni lava balekeke, lava tinyiketeke eka hosi ya Babilona, ni leswi seleke swa vunyingi bya vanhu, Nebuzaradani, ndhuna ya valanguteri, a va yisa evukhumbini. ₁₆Ntsena, hosi ya valanguteri, yi siya van'wana exikarhi ka swisiwana swa tiko ku hlayisa tivhinya ni ku rima masimu.

₁₇Vakalediya va faya timhandze ta koporo leti ngi ti ri endlwini ya Yehovha, ni swikhato, ni lwandle ra koporo leri ngi ri ri endlwini ya Yehovha; kutani va yisa koporo hinkwayo ya swona eBabilona. ₁₈Va teka ni timbita, ni tifoxolo, ni mikwana, ni mikombe, ni swibya hinkwaswo swa koporo leswi va tirhaka ntirho ha swona. ₁₉Ndhuna ya valanguteri yi teka ni swimbitana swa mirhi ya risuna, ni mindzheko, ni hinkwaswo leswi ngi swi ri swa nsuku ni swa silivhere. ₂₀Loko ti ri timhandze timbirhi, ni lwandle, ni tihomu ta koporo leti nga ehansi ka rona ni swikhato leswi hosi Solomoni a swi endleleke yindlu ya Yehovha, koporo ya swilo leswi hinkwaswo, a yi pimiwanga exikalweni. ₂₁Ku leha ka mhandze yin'wana ni yin'wana a swi ri swisungunhu swa 18; ngoti ya swisungunhu swa 12 yi kota ku ti rhendzela; ku tsindziyela ka tona a ti ri tintiho ta mune; kambe timhandze a ti nga ri na nchumu endzeni. ₂₂Swirhendzevutana leswi ngi swi ri ehenhla ka tona a swi ri swa koporo kutani ku tlakuka ka xirhendzevutana a swi ri swisungunhu swa ntlhanu. Ematlhelweni hinkwawo ya swirhendzevutana a ku ri ni ntirho wa longwe ni magirenada; hinkwaswo a swi ri swa koporo; a swi ri tano eka mhandze ya vumbirhi; a yi ri ni magirenada, na yona. ₂₃A ku ri ni magirenada ya 96 ematlhelweni; kutani magirenada hinkwawo ematlhelweni ya ntirho wa longwe a ma ri dzana.

₂₄Ndhuna ya valanguteri yi teka Seraya, muprista lonkulu, na Sofoniya muprista wa vumbirhi, ni valanguteri vanharhu va nyangwa; ₂₅emutini, a teka nandza wa mutsheniwa la ngi a ri ndhuna ya vanhu va nyimpi, ni vavanuna va ntlhanu lava tshamaka va vona mombo wa hosi, lava kumiweke emutini, ni mutsari la nga ndhuna ya nyimpi, loyi ngi a ri ni ntirho wa ku rhamba vanhu va tiko, ni vavanuna va 60 va tiko lava ngi va ri emutini. ₂₆Nebuzaradani, ndhuna ya valanguteri, a va teka a va yisa eka hosi ya Babilona, eRibila. ₂₇Kutani hosi ya Babilona yi va dlaya eRibila, etikweni ra Hamata. Kutani va Yuda va yisiwa evukhumbini ekule ni tiko ra vona.

₂₈Hi vona vanhu lava Nebukadnetsara a va yiseke evukhumbini: Hi lembe ra ntlhanu na mambirhi, Vayuda va 3 023, ₂₉hi lembe ra 18 ra Nebukadnetsara, vanhu va 832 va Yerusalema; ₃₀hi lembe ra 23 ra Nebukadnetsara, Nebuzaradani, ndhuna ya valanguteri, a yisa kambe eku bohiweni Vayuda va 745, loko va ri hinkwavo, a va ri vanhu va 4 600.

₃₁Hi lembe ra 37, ra ku bohiwa ka Yoyakini, hosi ya Yuda, hi n'hweti ya 12, hi siku ra 25 ra n'hweti, Evhili-Merodaka, hosi ya Babilona, hi lembe leri a sunguleke ku fuma, a tlakusa nhloko ya Yoyakini, hosi ya Yuda a n'wi humesa ekhotsweni. ₃₂A vulavula na yena hi tintswalo, kutani a n'wi tlakusa ehenhla ka tihosi leti ngi ti ri na yena eBabilona. ₃₃A n'wi tshikisa tinguvu ta yena ta mukhomiwa kutani a dya swakudya emahlweni ka hosi hi masiku hinkwawo ya ku hanyaka yena. ₃₄Loko swi ri leswi a swi pfumaleke, a nyikiwa hi hosi ya Babilona hi siku rin'wana ni rin'wana, ku fikela siku ra rifu ra yena, hi masiku hinkwawo ya ku hanyaka yena.