1Yehovha u ri: Vona, ndza ha pfuxela Babilona ni vaaki va le tikweni ra Kalediya, moya lowu onhaka; 2kutani ndzi ta nyiketa Babilona emavokweni ya vamatiko, va ta n'wi hlungula, va hluvula tiko, ri sala ntsena; hikuva va ta n'wi rhendzela hi matlhelo hinkwawo hi siku ra khombo. 3Wa vurha, a a konge vurha, a kongoma loyi a kongaka hi vurha bya yena, ni loyi a yimeke a tshembile xisirhelelo xa yena; mi nga tshuki mi tsetselela lavantshwa va yena, mi heta nyimpi ya yena hinkwayo. 4Lava tlhaveriweke ku fa a va wele etikweni ra Kalediya, ni lava tlhaviweke emitsendzeleni ya yena. 5Hikuva Israele na Yuda a va tshikiwanga hi Xikwembu xa vona, a nga Yehovha wa tinyimpi; kutani tiko ra Vakalediya ri tele milandzu emahlweni ka Mukwetsimi wa Israele. 6Tsutsumani eBabilona, kutani un'wana ni un'wana a ponisa vutomi bya yena, leswaku mi nga lahleki hi ku homboloka ka yena, hikuva nkarhi wa ku rihisa ka Yehovha hi wona wolowo, u ta n'wi tlherisela hakelo.
7Babilona a wu ri ndzheko wa nsuku evokweni ra Yehovha, lowu phyophyisaka matiko hinkwawo; matiko ma tshama ma nwa vhinyo ya yena; hikwalaho matiko ma ve ni rihuhu. 8Babilona u wile kan'we, kutani u tshovekile. Kololani hikwalaho ka yena, mi tekela ku vaviseka ka yena murhi; kumbe u ta hanya. 9Hi tshama hi ongola Babilona, kambe a nga hanyanga; a hi n'wi tshikeni, hi tifambela un'wana ni un'wana etikweni ra yena, hikuva ku avanyisa ka yena ku fike ematilweni, ku tlakukile ku fika emapapeni. 10Yehovha u vonakisile ku lulama ka hina; tanani, hi byela Siyoni mitirho ya Yehovha, Xikwembu xa hina.
11Vangamisani miseve, mi tamela switlhangu. Yehovha u pfuxile moya wa tihosi ta Vameda, hikuva u kanelela Babilona ku n'wi onha; hikuva hi kona ku rihisa ka Yehovha, ku ri ku rihisela tempele ya yena. 12Yimiselani rirhangu ra Babilona mujeko, tiyisani valanguteri, vekani tindzaveti, mi lunghisa marindzi! Hikuva Yehovha, na yena, u kanerile, kutani a ri karhi a endla leswi a swi vuleke hikwalaho ka vaaki va Babilona. 13Wena la akeke ekusuhi ni mati lamakulu, la teleke xuma, makumu ya wena ma fikile, ni vukhamba bya wena byi ta hela. 14Yehovha wa tinyimpi u hlambanya hi ku hanya ka yena, a ku: E, kunene ndzi ta ku tatisa hi vanhu kukotisa loko ti ri tinjiya, va ta ku bela nkosi.
15“U endlile misava hi matimba ya yena, u yi lunghisile hi vutlhari bya yena, kambe a andlale matilo hi ku twisisa ka yena. 16Hi mpfumawulo wa rito ra yena, mati ma hlengeletana ematilweni; wa humesa mapapa emakun'wini ya misava; hi tindlati u nisa mpfula, kutani u humesa moya evuhlayiselweni bya yena.
17“Munhu un'wana ni un'wana u hungukile, a pfumala mano; munyukisi un'wana ni un'wana u khomisiwa tingana hi swifaniso swa yena, hikuva swifaniso swa yena i mavunwa ntsena, a ku na ku hefemula ka swona. 18Xilo sweswo i mavunwa, i ntirho wo soleka; nkarhi swi holoveriwaka swi ta hela. 19Loyi a nga ku avela eka Yakobo a nga fani na swona; hikuva hi loyi a vumbeke swilo hinkwaswo, kutani Israele i ku averiwa ka yena; Yehovha wa tinyimpi i vito ra yena.
20“A wu ri nyundzu ya mina ni matlhari ya nyimpi; ndzi tshama ndzi faya matiko ha wena, ndzi lovisa ku fuma ha wena. 21Ndzi fayile ha wena hanci ni mukhandziyi wa yona, ndzi faya ha wena golonyi ni mukhandziyi wa yona. 22Ndzi faya ha wena wanuna ni wansati; ndzi faya ha wena lonkulu ni lontsongo; ndzi faya ha wena jaha ni wanhwana. 23Ndzi tshama ndzi faya ha wena murisi ni ntlhambi wa yena; ndzi faya ha wena murimi ni tihavi ta yena, kutani ndzi faya ha wena vafumi ni tindhuna. 24Kambe ndzi ta tlherisela Babilona ni vaaki hinkwavo va Kalediya swo biha hinkwaswo swa vona leswi va swi endleke Siyoni emahlweni ka n'wina, ku vula Yehovha.
25“Vona, ndzi ta eka wena, ntshava ya ku onhaka, ku vula Yehovha, wena la onhaka misava hinkwayo; ndzi ta tshambuluta voko ra mina ehenhla ka wena, ndzi ku wisa emaribyeni, kutani ndzi ku hundzula ntshava leyi hisiweke; 26kutani a ku nga ha tshami ku tekiwa ribye ra yinhla eka wena, hambi ri ri ribye ra masungulo; kambe u ta hundzuka mananga ntsena, hilaha ku nga heriki, ku vula Yehovha.
27“Yimisani mujeko etikweni, mi yimba nanga ematikweni, mi n'wi pfuxela matiko, mi hlengeleta ku fuma ka Ararata, ni ka Mini, ni ka Axikenazi ku lwa na yena, mi veka tindhuna ta nyimpi; tshinetani tihanci, ti tlhandluka kukota tinjiya ta dyandza. 28Mi n'wi pfuxela matiko, tihosi ta Vameda, ni tihosana ta vona, ni tindhuna hinkwato ta vona, ni matiko hinkwawo lama fumiwaka hi yena.
29“Misava yi tsekatseka, yi rhurhumela, hikuva makungu ya Yehovha ma karhi ma endlakala ehenhla ka Babilona ku hundzula misava ya Babilona emananga ntsena, yi nga ri na muaki. 30Tinhenha ta Babilona ti tshikile ku lwa, ti tshamisile emakhokholweni; ti helele hi vurhenha bya tona, ti hundzukile vavasati; ku hiseriwa vuako bya tona; tinghole ta timbanti ta vona ti tshoviwile. 31Varhumiwa va hlangene ni varhumiwa, switsutsumi swi hlangana ni switsutsumi ku ya byela hosi ya Babilona leswaku muti wa yena wu ngheniwile matlhelo hinkwawo. 32Hikuva mahlaluko ma khomiwile va hisile mativa hi ndzilo; kutani vavanuna va nyimpi va rhurhumela. 33Hikuva Yehovha wa tinyimpi, Xikwembu xa Israele u te: N'wana wa Babilona u kota xivuya hi nkarhi lowo va kandzelaka eka xona; ku sele nkarhi wu nga ri wungani ku ta va nkarhi wa ku tshovela ka yena.”
34“Nebukadnetsara, hosi ya Babilona, u hi dyile, u hi hetile, u hi endlile xilo xa hava, u hi mitile kukota dragona, u tixurhisile khwiri hi ku nandziha ka hina, u hi hlongorile. 35Ku xanisiwa koloko ka mina ni nyama ya mina leyi handzuriweke, a swi ve ehenhla ka Babilona,” ku ta vula muaki wa Siyoni; “Ngati ya mina a yi ve ehenhla ka vaaki va Kalediya,” ku ta vula Yerusalema.
36Hikwalaho ku vula Yehovha, a ku: “Vonani, ndzi ta ku yimelela ehubyeni kutani ndzi ta ku rihisela; ndzi ta omisa lwandle ra yena, ndzi phyisa xihlovo xa yena; 37kutani Babilona u ta va nhulu ya maribye ni vuako bya timhungubye, xihlamariso, ni xisandzu, laha ku nga akiwiki kona.
38“Va ta dzumadzuma swin'we kukota tinghala, va rila kukota swinghalana. 39Kutakuloko va kufumela, ndzi ta va endlela nkhuvo, ndzi va pyopyisa, leswaku va ta tshuka, va kondza va ya etlela vurhongo lebyi nga heriki, va nga ha tlheli va pfuka, ku vula Yehovha. 40Ndzi ta va xikisela eku tlhaviweni kukota swinyimpfana, kukota swiphongo kun'we ni makhuna.
41“Xixaka u khomiwile ha yini? Byi phasiwile hi ku yini vubombi bya tiko hinkwaro? Babilona u endlisiwe ku yini emananga exikarhi ka matiko? 42Lwandle ri tele Babilona, u funengetiwile hi ku pfuma ka magandlati ya rona. 43Miti ya yena yi endliwile rhumbi ntsena, tiko ra ntlhava ni mananga, tiko leri nga riki na munhu la akaka eka rona, hambi a ri n'wana wa munhu la hundzaka kona. 44Ndzi ta holovela Bele eka Babilona; kutani ndzi ta humesa enon'wini wa yena lexi a xi miteke; matiko a ma nga ha hlengeletani kona; na rona rirhangu ra Babilona ri mbundzukile!
45“Humani ka wona, n'wina tiko ranga, un'wana ni un'wana a lamulela vutomi bya yena eku kariheni loku hisaka ka Yehovha. 46Timbilu ta n'wina ti nga vi na vutoya, mi nga chavi ku tshuketiwa loku taka twakala etikweni, hikuva hi lembe rin'wana nchavo wu ta ta, kutani hi lembe rin'wana nchavo wun'wana wu ta va kona, ni ku karhatiwa emisaveni hosi yin'wana yi lwaka ni hosi yin'wana.
47“Hikwalaho, vona, ma ta masiku lawa ndzi nga ta ba ha wona swikwembu leswi vatliweke swa Babilona; kutani tiko ra yena hinkwaro ri ta khomisiwa tingana ni lava tlhaviweke hinkwavo va yena va ta wa exikarhi ka yena. 48Kutani matilo ni misava, ni hinkwaswo swa kona, swi ta endla pongo ro tsaka hi Babilona, hikuva vaonhi va ta n'wi tela va huma en'walungwini, ku vula Yehovha. 49Kukotisa leswi Babilona, a wiseke lava tlhaviweke va ka Israele, na kona, lava tlhaviweke va tiko hinkwaro va ta wa eBabilona.
50“N'wina mi balekeleke fumu, sukani, mi nga yimi; anakanyani Yehovha ma ha ri kule, kutani Yerusalema, a a ve etimbilwini ta n'wina. 51Hi khomisiwile tingana hikuva hi twile xisandzu; ku tsan'wa ku funengetile mimombo ya hina hikuva vamatiko va nghenile exivandleni lexi kwetsimeke xa yindlu ya Yehovha. 52Hikwalaho, vonani, ma ta masiku lawa, ku vula Yehovha, ndzi nga ta ba ha wona swikwembu leswi vatliweke swa yena, kutani etikweni hinkwaro ra yena, lava tlhaviweke va ta tsema. 53Loko ngi Babilona a nga titlakusa etilweni, a va a nonon'hwisa khokholo leri tlakukeke ra yena, vaonhi lava humaka eka mina va ta n'wi kuma, ku vula Yehovha.
54“Huwa yi twakala eBabilona, ni ku onha kukulu etikweni ra Vakalediya. 55Hikuva Yehovha u onha Babilona, wa herisa ka yena ku pfuma lokukulu, magandlati ya vona ma pfuma kutotisa mati lamakulu, ku pfuma ka wona ku twakala. 56Kunene muonhi u tele yena Babilona, kutani tinhenha ta yena ti khomiwile mavurha ya vona ma tshovekile; hikuva Yehovha i Xikwembu xa ku tirihisela, u ta hakela hi mfanelo. 57Ndzi pyopyisa tihosana ta yena, ni tintlhari ta yena, ni tindhuna ta yena, ni vafumi va yena, ni tinhenha ta yena; va ta etlela vurhongo lebyi nga heriki, kutani va nga ha ti tshama va pfuka, ku vula Hosi; Yehovha wa tinyimpi, i vito ra yena.
58“Yehovha wa tinyimpi u vula a ku: Rirhangu ra Babilona ra ku anama ri ta mbundzuxiwa, tinyangwa ta yena leti tlakukeke ti ta hisiwa hi ndzilo; matiko ma ta va ma tirhela swahava, ni vamatiko va tikarhatile hikwalaho ka ndzilo, kutani va hele timbilu.”
59Hi leri rito ra muprofeta Yeremiya leri a nga lerisa rona Seraya, n'wana Neriya, n'wana Mahaseya, loko a ya eBabilona na Sedekiyasi, hosi ya Yuda, hi lembe ra vumune ra ku fuma ka yena, Seraya a a ri ndhuna ya valanguteri va makamara. 60Yeremiya a tsala ebukwini leswo biha hinkwaswo leswi ngi swi ta tela Babilona, ma nga marito hinkwawo lama tsariweke hikwalaho ka Babilona. 61Kutani Yeremiya a byela Seraya, a ku: “Kutakuloko u fika eBabilona, u ta hlaya marito lawa hinkwawo, 62kutani u ku: ‘Oho Yehovha, u vurile leswaku xivandla lexi xi ta mbundzuxiwa, ku nga ha tshami ku va na muaki, hambi a ri munhu, hambi xi ri xifuwo, kambe a ku ve mananga hi laha ku nga heriki!’ 63Kutakuloko u hetile ku hlaya buku leyi, u bohelela ribye eka yona, kutani u yi hoxela Yufrata, 64kutani u ku: ‘Babilona u ta petisiwa sweswo, a nga ka a nga pfuxiwi emakhombyeni lawa ndzi nga ta ma tisa ehenhla ka yena.’ ”
Marito ya Yeremiya ma hela kwala.
