1“Israele, loko u nga hundzuka, loko u tlhelela eka mina, ku vula Yehovha, kutani u susa manyala ya wena emahlweni ka mina, u nga ka u nga ha tsendzeleki. 2Loko u hlambanya hi swinene, ni ku tiyisa, ni ku lulama u ku: ‘Yehovha wa hanya,’ matiko ma ta kateka ha yena, ma tidzunisa ha yena.”
3Hikuva, Yehovha u vula eka vanhu va Yuda ni va Yerusalema, a ku: “Halulani mafusi ya n'wina, kambe mi nga byari exikarhi ka mitwa! 4Yimbelani Yehovha, kutani mi yimbisa timbilu ta n'wina, n'wina vanhu va Yuda, na n'wina lava akeke eYerusalema, swi nga ri leswaku ku kariha ka mina ku nga humi kukotisa ndzilo, kutani ka mi hisa, ku nga timiwi, hikwalaho ka ku biha ka timbilu ta n'wina.
Ta ku hlasela ka nyimpi ya matiko.
5“Byelani Yuda, mi tivisa Yerusalema, mi ku: ‘Yimbani mhalamhala etikweni, huwelelani,’ mi bongosa, mi ku: ‘Hlengeletanani, hi nghena emitini ya makhokholo.’ 6Yimisani mujeko hitlhelo ra Siyoni; tsutsumani mi nga yimi, hikuva ndzi ya tlhelo ra n'walungu ku ya teka masangu ni khombo lerikulu.” 7Nghala yi humile exihlahleni xa yona, kambe muonhi wa matiko u hlomile, u hume exivandleni xa yena ku ya onha tiko ra wena; miti ya wena yi ta herisiwa yi pfumala muaki. 8Hikwalaho mi tiboha swisuti hi nguvu leyi khwaxaka, mi rila, mi vovola; hikuva vukari lebyi hisaka bya Yehovha a byi hi tlhelelanga. 9“Enguveni yoleyo,” ku vula Yehovha, “ku ta hela timbilu ta tihosi ni ta vakulukumba, vaprista va ta hlamala, ni vaprofeta va ta tshuka.”
10Ku va laha ndzi nge: “Yo i Hosi Yehovha, kunene u kanganyisile tiko leri na Yerusalema, loko u te: ‘Mi ta va ni ku rhula!’ Kutani fumu ra va tlhava ku ya fika emoyeni!”
11Enguveni yoleyo ku ta byeriwa tiko leri na Yerusalema, leswaku moya lowu hisaka wu huma eswitsungeni swa xivandzawulo, wa hungela endleleni ya nhwanyana wu tiko ra mina; ku nga ri ku peperha, ni loko ku ri ku hlungula. 12Moya lowa matimba lama tlurisaka wu ta humesiwa hi mina; sweswi ndzi ta va byela ku avanyisa ka mina ehenhla ka vona.
13Langutani muonhi u tlhandluka kukotisa mapapa; tigolonyi ta yena ti kotisa xidzedze; tihanci ta yena ti tlula makoti hi ku tsutsuma; khombo ri le ka hina, hikuva ha borisiwa!
14Yerusalema, tihlantswe ku biha ka mbilu ya wena, leswaku u ta ponisiwa; mianakanyo leyo biha yi ta tshama ku ri kungani embilwini ya wena xana? 15Hikuva nkosi wu huma eDani, wu twakala entshaveni ya Efrayimi, wu vula khombo. 16“Byelani matiko, mi tivisa Yerusalema: ‘Lava taka ku ta n'wi rhendzela va huma etikweni leri nga ekule; va huwelela ku ta lwa ni miti ya Yuda. 17Va n'wi rhendzele kukotisa varindzi va nsimu, hikuva u tiarisile emahlweni ka mina,’ ” ku vula Yehovha. 18“I mikhuva ya wena ni swiendlo swa wena leswi ku humeseleke swilo sweswo; i mihandzu ya ku biha ka wena; kunene swa vava; kunene swi nghenile ku ya fika embilwini ya wena.”
19Marhumbu yanga! Marhumbu yanga! Yowee! Ku vaviseka ka mbilu yanga! Mbilu ya pandza, ndzi nga ka ndzi nga miyeri; hikuva moya wa mina wu twa mpfumawulo wa mhalamhala ni wa nkosi wa nyimpi. 20Ku onhaka ku vita ku onhaka kun'wana, hikuva ku ta onhiwa tiko hinkwaro; matende ya mina ma onhiwa kan'we, na yona mitsonga ya mina. 21Ndzi ta vona mujeko ku yisa kwihi? Ndzi ta twa mpfumawulo wa mhalamhala ku ri kangani xana? 22“Kunene tiko ra mina ri hungukile; a ri ndzi tivi; i vana va vuhunguki lava nga riki na ku anakanya; va tlharihile ku endla leswo biha; kambe a va tivi ku endla leswinene.”
23Ndzi languta misava, kutani vonani, yi onhakile; na wona matilo ma pfumala ku vonakala ka wona. 24Ndzi languta tintshava, vonani, ta rhurhumela, ni switsunga hinkwaswo swa tsekatseka. 25Ndzi languta, kutani maswivo, a ka ha ri na munhu kona. Kambe tinyanyana hinkwato ta tilo ti balekile. 26Ndzi languta, kutani ndzi vona Karmele a hundzukile mananga, miti hinkwayo ya kona yi mbundzuxiwile emahlweni ka Yehovha ni le mahlweni ka ku kariha loku hisaka ka yena.
27Hikuva Yehovha u vurile, a ku: “Tiko hinkwaro ri ta hundzuka mananga kambe ndzi nga ka ndzi nga ri heriseli makumu. 28Hikwalaho tiko ri ta rila, ni matilo lama nge henhlahenhla ma ta hundzuka ntima, hikuva ndzi vula leswi ndzi swi anakanyeke, ndzi nga ka ndzi nga tshiki, ndzi nga ka ndzi nga hundzuki eka swona.”
29Miti hinkwayo yi ta tsutsuma hikwalaho ka pongo ra vakhandziyi, ni ra vacopi va miseve, va ya nghena eswihlahleni, va khandziya ni le maribyeni ya tintshava; miti hinkwayo yi fularheliwa; a ku nga ha vi na munhu kona. 30Kutani wena muonhiwa, u ta endla yini xana? Hambi u nga tifunengeta hi crimson, hambi u tisasekisa hi vubombi bya nsuku, ni loko u nga tibombisa emahlweni hi murhi; vubombi bya wena a byi pfuni nchumu; swigangu swa wena hakunene swi ku sandzile; swi lave vutomi bya wena. 31Hikuva ndzi twa nkosi wo nge i wa la velekaka, mikosi ya wansati la nga ekhombyeni ra ku veleka n'wana wa mativula; i nkosi wa nhwanyana wa Siyoni, a hefemuteka, a ri karhi a tshambuluta mavoko a ku: “Yo! Yowee! Moya wa mina wu tikeriwile hi vadlayi.”
