Ta vatukulu va Rekaba.
1Rito ri huma eka Yehovha, ri ta eka Yeremiya enkarhini wa Yoyakimi, n'wana Yosiya, hosi ya Yuda, ri ku:
2“Yana eka vana va Rekaba u vulavula na vona, u ta na vona endlwini ya Yehovha, ekamareni yin'wana, u va nyika vhinyo va nwa.” 3Kavaloko ndzi teka Yaazaniya, n'wana Yeremiya n'wana Habasiniya, ni vamakwavo, ni vana va yena hinkwavo, ni vana hinkwavo va Rekaba; 4ndzi ya na vona endlwini ya Yehovha ekamareni ya vana va Hanana, n'wana Yigidaliya, munhu wa Xikwembu, ku langutana ni kamara ya tindhuna, ehenhla ka kamara ya Maaseya, n'wana Xalumi, mulanguteri wa nyangwa. 5Ndzi veka mindzheko leyi teleke vhinyo ni mikambana, emahlweni ka vana va Rekaba, ndzi ku eka vona: “Nwanani vhinyo!” 6Kambe va hlamula, va ku: “A hi nwi vhinyo, hikuva Yonadabu n'wana Rekaba, tata wa hina, u hi byerile, a ku: ‘Mi nga tshuki mi nwa vhinyo, n'wina, ni vana va n'wina, hilaha ku nga heriki. 7Mi nga aki tindlu, mi nga byali timbewu, mi nga byali tivhinya emasin'wini, hambi ku ri ku ti fuwa, kambe mi ta tshama ematendeni hi masiku hinkwawo ya n'wina, leswaku mi hanya masiku yo tala emisaveni leyi mi luvelaka eka yona.’ 8Hi endle hi rito ra Yonadabu, n'wana Rekaba, tata wa hina, eswilweni hinkwaswo leswi a hi byeleke swona, loko a te: Hi nga nwi vhinyo, hi masiku hinkwawo ya hina, hina ni vasati va hina, ni vana va hina, ni vana va xisati va hina; 9hi nga tshuki hi aka tindlu ku tshama eka tona, hi nga vi na nsimu, hambi yi ri vhinya, hambi ti ri timbewu. 10Hi tshame hi aka ematendeni hi yingisile, hi va hi endla hinkwaswo leswi Yonadabu, tata wa hina, a hi byeleke swona. 11Kambe, kuteloko Nebukadnetsara, hosi ya Babilona a hlasela tiko leri, hi ku: ‘Tanani, hi nghena eYerusalema, hi suka emahlweni ka mavandla ya Vakalediya, ni le mahlweni ka mavandla ya Vasiriya,’ hikwalaho hi akeke eYerusalema.”
12Rito ra Yehovha ri ta eka Yeremiya, ri ku: 13“Ku vula Yehovha wa mavandla, Xikwembu xa Israele: Yana u byela vanhu va Yuda, ni vaaki va Yerusalema, u ku: Xana mi nga ka mi nga amukeli dyondzo, mi ta yingisa rito ra mina xana? Ku vula Yehovha. 14Ku hlayisiwe marito ya Yonadabu, n'wana Rekaba, lawa a ma leriseke vana va yena leswaku va nga tshuki va nwa vhinyo; kutani a va nwanga ku fika sweswi, hikuva va yingisile ku lerisa ka tata wa vona, kambe mina ndzi tshama ndzi vulavula na n'wina, ndzi vulavula wa ha ri mixo, kambe a mi ndzi yingisanga. 15Ndzi tshama ndzi mi rhumela malandza ya mina hinkwawo vaprofeta, ndzi va rhuma wa ha ri mixo, ndzi ku: ‘Hundzukani un'wana ni un'wana emikhuveni ya yena leyo biha, mi hundzuka eku endleni ka n'wina, mi nga landzeri swikwembu swin'wana ku swi tirhela, mi tiakela etikweni leri ndzi nga ri nyika n'wina ni vatata wa n'wina,’ kambe a mi rhiyanga tindleve, a mi ndzi yingisanga. 16Kasi vana va Yonadabu, n'wana Rekaba, va hlayisile ku lerisa ka tata wa vona, kambe tiko leri, a ri ndzi yingisanga.
17“Hikwalaho Yehovha, Xikwembu xa Israele u vula a ku: Vona, ndzi ta humesela Yuda ni vaaki hinkwavo va Yerusalema, swo biha hinkwaswo leswi ndzi swi vuleke hikwalaho ka vona, hikuva ndzi tshama ndzi vulavula na vona, kambe a va ndzi yingisanga, ndzi va vitanile, kambe a va hlamulanga.”
18Loko yi ri yindlu ya vana va Rekaba, Yeremiya a va byela, a ku: “Ku vula Yehovha wa mavandla, Xikwembu xa Israele: Leswi mi yingiseke ku lerisa ka Yonadabu, tata wa n'wina mi va mi hlayisa ku lerisa ka yena hinkwako, kutani mi endla hinkwaswo leswi a nga mi lerisa swona, 19hikwalaho, ku vula Yehovha, Xikwembu xa Israele, ku nga ka ku nga pfumaleki ntukulu wa Yonadabu, n'wana Rekaba, la yimaka emahlweni ka mina, ni siku ni rin'we.”
