Ta ku tlhela ka lava yeke eku bohiweni.
1Rito leri humaka eka Yehovha ri ta eka Yeremiya, ri ku:
2“Ku vula Yehovha, Xikwembu xa Israele, a ku: Tsala marito hinkwawo lawa ndzi ku byeleke wona ebukwini. 3Hikuva vona, ku vula Yehovha, ma ta masiku lawa ndzi nga ta tlherisa ha wona e vabohiwa va tiko ra mina ra Israele ni ra Yuda, ku vula Yehovha, ndzi va vuyisela etikweni leri ndzi ri nyikeke vatatana wa vona va ri fuma.” 4Hi wona marito lawa Yehovha a ma vuleke ehenhla ka Israele na Yuda:
5“Marito ya Yehovha: Hi twa huwa ya nchavo; ku nga ku pfuka, ku nga ri ku tsaka. 6Ma nga vutisa mi ta vona xana wanuna a nga veleka xana? Ndzi vonisile ku yini mavoko ya wanuna un'wana ni un'wana loko ma le xisutini xa yena, kukotisa wansati la velekaka; kutani mombo wa un'wana ni un'wana wu hundzukele yini? 7Yo! Mina! Siku leri hi lerikulu, a ku na rin'wana ro fana na rona; i mikarhi ya makhombo eka Yakobo; hambiswiritano, u ta pona ka swona.
8“Siku rolero ku vula Yehovha wa mavandla, ndzi ta tshovelela joko ra yena enhan'wini ya wena, ndzi tsema tinghole ta wena; vamatiko a va nga ha ku fumi. 9Kambe va ta tirhela Yehovha, Xikwembu xa vona, na Davhida, hosi ya vona, loyi ndzi nga ta n'wi veka ka vona. 10Kutani wena Yakobo, nandza wa mina, u nga chavi, ku vula Yehovha, u nga rhurhumeli, Israele, hikuva vona, ndzi ta ku ponisa, ndzi ku vita emisaveni ya le kule, ndzi lava ni rixaka ra wena etikweni ra vukhumbi. Yakobo a ta vekiwa, a titshamela a tsakile, a nga ha chavisiwi hi munhu. 11Hikuva, ndzi na wena ku ku ponisa, ku vula Yehovha; hikuva ndzi ta heta hinkwako matiko hinkwawo lawa ndzi ku hangalaseke ka wona; kambe wena ndzi nga ka ndzi nga ku herisi, ndzi ta ku laya hi ku lulama, a ndzi nga ku tshiki ntsena u nga avanyisiwanga.
12“Hikuva, ku vula Yehovha: Mbanga ya wena yi bihile, ni swilondza swa wena swa vava. 13A ku na la ku ongolaka ku pfatlanya; ku ongola, ni mirhi, ku hava ka wena. 14Varhandziwa va wena hinkwavo va ku rivele; a va ha vuri nchumu ha wena hikuva ndzi ku tlhavile swa nga i nala, ni ku holoveriwa loku nonon'hwaka, hikwalaho ka ku tala ka ku homboloka ka wena, hikuva swidyoho swa wena swi tele ngopfu.
15“U rilela yini hikwalaho ka mbanga ya wena? Mbanga ya wena a yi nga holi. Ndzi ku endlele sweswo hikwalaho ka ku tala ka ku homboloka ka wena, hikuva swidyoho swa wena swi tele. 16Hambiswiritano hinkwavo lava ku dyaka va ta dyiwa hinkwavo lava ku kamanyetaka va ta yisiwa eku bohiweni, lava ku nyenyemukaka va ta nyenyemukiwa hinkwavo lava ku onhaka ndzi ta va nyiketa eku onhakeni. 17Hikuva ndzi ta tlhela ndzi horisa timbanga ta wena, ku vula Yehovha; hikuva va ku vula mulahliwa, ‘Siyoni loyi va nga ha vuliki nchumu ha yena!’
18“Hikuva, ku vula Yehovha: Ndzi ta tlherisa lava khomiweke emitsongeni ya Yakobo, ndzi twela vuako bya vona vusiwana; muti wu ta vuyisiwa exiteni xa wona, ni yindlu ya vuhosi yi ta akiwa hi mukhuva wa yona. 19Ka ha ta huma eka yona ku khensa ni rito ra lava tsakeke; ndzi ta va tatisa, va nga ha ti tshama va hungutiwa; ndzi ta va dzunisa, va nga ti soriwa. 20Vana va yena va ta tshama kukotisa khale; nhlengeletano ya yena yi ta tiya emahlweni ka mina; ndzi ta holovela lava ku kamanyetaka hinkwavo. 21Hosi ya wena yi ta huma eka yena mufumi wa yena u ta huma exikarhi ka yena ndzi ta n'wi tshineta, kutani u ta ta eka mina; hikuva i mani la nga ta kanya mbilu leswaku a tshinelela ka mina, ku vula Yehovha. 22Ma ha ta tshama mi ri tiko ra mina, mina ndzi va Xikwembu xa n'wina.
23“Vona xihuhuri xa Yehovha hi xexo; ku kariha loku hisaka ku humele ehandle, i xihuhuri lexi mbvungunyaka, xi ta mbvungunyisa etinhlokweni ta lavo biha. 24Vukari bya Yehovha byi nga ka byi nga tlheri a nga si endla ni ku heta ku anakanya ka mbilu ya yena. Emikarhini yo hetelela, mi ta va ni ku twisisa ka kona.
