YEREMIYA 23

₁“Va ni khombo varisi lava onhaka, lava hangalasaka ntlhambi wa madyelo ya mina,” ku vula Yehovha. ₂Hikwalaho, Yehovha, Xikwembu xa Israele, a nge eka varisi lava risaka tiko ra mina: “Mi hangalasile ntlhambi wa mina, mi wu hlongola, a mi wu kambelanga; vonani, ndzi ta tlherisela eka n'wina hi vumbabva bya ku endla ka n'wina, ku vula Yehovha. ₃Kutani mina, ndzi ta hlengeleta leswi saleke swa ntlhambi wa mina ematikweni hinkwawo laha ndzi va hangalaseleke kona, ndzi va tlherisela evudyelweni bya vona, va andzisiwa, va tala. ₄Ndzi ta va nyika varisi lava va rixaka; a va nga ha chavi, a va nga ha rhurhumeli, a ku nga ha pfumaleki na un'we wa vona, ku vula Yehovha.

₅“Vonani, ku vula Yehovha ma ta masiku lawa ndzi nga ta humesela Davhida ha wona xihluke xa ku lulama, yi va hosi ya vukosi leyi fumaka hi vutlhari, yi veka ku avanyisa ni ku lulama emisaveni. ₆Emikarhini ya yena, Yuda u ta hanya, Israele a tiakela eku tsakeni kutani hi rona vito lero va nga ta n'wi vitana ha rona: ‘Yehovha, ku lulama ka hina.’ ₇Hikwalaho, vonani, ku vula Yehovha, ma ta masiku lawa va nga ha ti ku: ‘Yehovha wa hanya la humeseke vana va Israele etikweni ra Egipta!’ ₈Kambe va ta ku: ‘Yehovha wa hanya la humeseke, a va a vuyisile rixaka ra yindlu ya Israele etikweni ra n'walungu, ni le matikweni hinkwawo laha ingi ndzi va hangalasile kona,’ kutani va ta tiakela etikweni ra vona.”

₉Mbilu yanga yi tshovekile exikarhi ka mina; marhambu ya mina hinkwawo ma karhi ma ngundzangundza, ndzi kotisa munhu la pyopyiweke ni munhu la hluriweke hi vhinyo, hikwalaho ka Yehovha, ni hikwalaho ka marito ya ku kwetsima ka yena. ₁₀Hikuva misava yi tele vaoswi; misava ya rila hi mirhukano, vudyelo bya mananga byi tshwile; ku famba ka vona ku bihile, ni mandla ya vona a ma lulamanga. ₁₁“Hikuva loko va ri vaprofeta ni vaprista, i vasandzi, na kona ndzi kume vumbabva bya vona endlwini ya mina, ku vula Yehovha. ₁₂Hikwalaho ndlela ya vona, eka vona yi ta kotisa xivandla xo rhetemuka, swa munyama; va ta susumetiwa, va wela kona, hikuva ndzi ta va humesela makhombo siku ndzi va holovelaka; ku vula Yehovha.

₁₃“Ndzi tshama ndzi vona vuphukuphuku bya vaprofeta va Samariya, a va profeta ha Baali, a va hambukisa tiko ra mina ra Israele. ₁₄Kambe evaprofeteni va Yerusalema, ndzi vone manyala, ku oswana, ni ku famba evunweni; va tiyisa mavoko ya lavo biha, va nga ti hundzuka, un'wana ni un'wana eku biheni ka yena. Eka mina, hinkwavo va kotisa Sodoma, vaaki va kona va kotisa Gomora.”

₁₅Hikwalaho, ku vula Yehovha wa mavandla ematshan'weni ya vaprofeta valavo: “Vonani, ndzi ta va dyisa absinta, ndzi va nwisa mati ya ku vavisa, hikuva ku sandza ku hume eka vaprofeta va Yerusalema, ku ya emahlweni ka tiko hinkwaro.”

₁₆Ku vula Yehovha wa mavandla, a ku: “Mi nga tshuki mi yingisela marito ya vaprofeta lava mi profetelaka; va mi kanganyisa, va vula leswi va swi vonaka etimbilwini ta vona, swi nga ri leswi humaka enon'wini wa Yehovha. ₁₇Va tshama va vula eka lava ndzi sandzaka, va ku: Rito ra Yehovha ri ri: ‘Ku tsaka ku ta va kona eka n'wina,’ ni ka hinkwavo lava fambaka hi ku nonon'hwa ka timbilu ta vona, va ku: ‘Mi nga ka mi nga humeleli hi swo biha.’ ” ₁₈Hikuva i mani la tshamaka a yima emakungwini ya Yehovha, a vona, ni ku twa rito ra yena? I mani la xiyeke ngopfu rito ra yena a ri twa xana? ₁₉Vona, xihuhuri xa Yehovha hi xolexo; vukari lebyi hisaka byi humile ehandle, xihuhuri lexi huhutelaka xi ta huhutela etinhlokweni ta lavo biha. ₂₀Vukari bya Yehovha byi nga ka byi nga tlheri a nga si endla ni ku heta ku anakanya ka mbilu ya yena; enkarhini wa makumu mi ta swi vonisisa. ₂₁A ndzi rhumanga vaprofeta valavo, kutani vona va tsutsumile; a ndzi vulavulanga na vona, kambe vona va profetile. ₂₂Loko ingi va yimele emakungwini ya mina, a va ta tivisa tiko ra mina marito ya mina, va va hundzuluxa emikhuveni ya vona leyo biha ni le vumbabveni bya ku endla ka vona!

₂₃“Xana mi ri, ndzi Xikwembu xa le kusuhi, ku vula Yehovha, a ndzi Xikwembu xa le kule na swona xana? ₂₄Xana munhu a nga fihleka exihundleni, leswaku ndzi nga n'wi voni, ku vula Yehovha? A ndzi ku: Matilo ni misava swi tele ha mina, ku vula Yehovha? ₂₅Ndzi twile leswi vuriwaka hi vaprofeta lava profetaka mavunwa hi vito ra mina, loko va ku: ‘Hi lorhile, hi lorhile.’ ₂₆Swoleswo, swi ta va tano ku fikela kwihi etimbilwini ta vaprofeta valavo, ku profeta mavunwa, ni ku profeta ku xisa ka timbilu ta vona xana? ₂₇Xana va ni miehleketo ya leswaku va ta rivarisa tiko ra mina vito ra mina hi milorho ya vona leyi va yi vulavulaka, un'wana ni un'wana eka nakulobye, hilaha vatata wa vona va tshamaka va rivala vito ra mina hikwalaho ka Baali xana? ₂₈Muprofeta la nga ni norho, a a vulavule norho; la nga ni rito ra mina, a a vulavule rito ra mina swinene. Mungu wu endla yini exikarhi ka koro xana, ku vula Yehovha? ₂₉Xana rito ra mina a ri kotisi ndzilo ku vula Yehovha, a ri kotisi nyundzu leyi fayaka ribye xana? ₃₀Hikwalaho, vonani, ku vula Yehovha, ndzi ni mitengo ni vaprofeta lava yivaka marito ya mina, un'wana eka un'wana. ₃₁Vonani, ku vula Yehovha, ndzi ni mitengo ni vaprofeta lava tikanelelaka marito, va ku: ‘Ku vule Xikwembu.’ ₃₂Vonani, ndzi ni mitengo na lava profetaka milorho ya mavunwa, ku vula Yehovha, va yi vulavulaka ku hambuxa tiko ra mina hi mavunwa ya vona, ni ku tikanganyisa ka vona; kasi a ndzi va rhumanga, a ndzi va nyikanga ku lerisa; loko ku ri ku pfuna, a va pfuni tiko leri ha nchumu, ku vula Yehovha.

₃₃“Tiko leri, hambi a ri muprofeta, kumbe muprista, loko va ku vutisa, va ku: ‘Ndzhwalo wa Yehovha hi wihi?’ Wa nga va byela, u ku: ‘Hi n'wina mi nga ndzhwalo, ndzi ta mi tshika, ku vula Yehovha!’ ₃₄Loko a ri muprofeta, ni loko a ri muprista, ni loko a ri wa tiko la nga vulavulaka, a ku: ‘Masungulo ya Yehovha,’ ndzi ta holovela munhu yeloyi, yena ni yindlu ya yena. ₃₅Mi ta byelana, mi ku: ‘Yehovha u hlamule yini?’ Kumbe, ‘Yehovha u vulavule yini?’ ₃₆Kambe ‘masungulo ya Yehovha’ a mi nga ha tshami mi ma vula sweswo, hikuva un'wana ni un'wana u ta biwa hikwalaho ka rito ra yena; hikuva mi soholote marito ya Xikwembu lexi hanyaka a nga Yehovha wa mavandla, Xikwembu xa hina.

₃₇“U ta byela muprofeta, u ku: ‘Lexi Yehovha a xi hlamulaka, ni lexi Yehovha a xi vulaka, i yini?’ ₃₈Kambe loko mi ku: ‘Masungulo ya Yehovha,’ hikwalaho ku vula Yehovha, loko mi ri karhi mi vula rito leri: ‘Hlavutelo ya Yehovha,’ kasi ndzi rhumile eka n'wina, ndzi ku: ‘Mi nga tshuki mi vula, mi ku: “Hlavutelo ya Yehovha,” ’ ₃₉hikwalaho, vonani, ndzi ta mi tsuva, ndzi mi cukumeta ekule ni mombo wa mina, n'wina, ni muti lowu ingi ndzi wu nyikile vatata wa n'wina! ₄₀Ndzi ta veka ehenhla ka n'wina xisandzu lexi nga heriki, ni tingana leti nga heriki leti nga tiki rivaleriwaka.”