VAAVANYISI 1

₁Kuteloko Yoxuwa a file vana va Israele va vutisa Yehovha va ku: “I mani exikarhi ka hina la nga ta rhanga a khandziya eka Vakanana, a lwa na vona?” ₂Yehovha a hlamula a ku: “Ku ta huma Yuda; vonani, ndzi nyiketile tiko emavokweni ya yena.” ₃Kutani Yuda a byela makwavo Simiyoni, a ku: “A hi tlhandluke swin'we etikweni leri ndzi ri averiweke, hi ya pfuka Vakanana, hi lwa na vona. Kutani ndzi ta ya na wena eka leri averiweke wena.” ₄Simiyoni a famba na yena; kutani Yuda a tlhandluka, Yehovha a nyiketa Vakanana ni Vaperesi emavokweni ya vona, kutani va dlaya vavanuna va 10 000 eBezeki. ₅Kutani va kuma Adoni-Bezeki emutini wa Bezeki, va lwa na yena, va hangalasa Vakanana ni Vaperesi. ₆Kambe Adoni-Bezeki a baleka, kutani va n'wi hlongorisa, va ya n'wi khoma, va n'wi tsema makhudzu ya mavoko ni ya milenge. ₇Adoni-Bezeki a ku: “Ku ni tihosi ta 70 leti tsemiweke makhudzu ya mavoko ni ya milenge, leti a ti tshama ti rholela mahlanhla ehansi ka tafula ra mina. Xikwembu xi ndzi tlherisele leswi ndzi swi endleke.” Kutani va n'wi yisa eYerusalema, a ya fela kona. ₈Kutani vana va Yuda va pfukela Yerusalema, va wu nghena, va dlaya vaaki va kona hi ku kariha ka fumu, va hisa muti. ₉Vana va Yuda va ngirimela va ya pfuka Vakanana lava akeke etintshaveni, ni le dzongeni, ni le timbaleni. ₁₀Kambe va Yuda va pfukela Vakanana lava akeke eHebroni. (Vito ro sungula ra Hebroni a a ri Kiriyata-Araba.) Va hlula miti ya Xexayi, na Ahimani, na Talimayi. ₁₁Kuteloko va suka kona, va pfuka lava akeke eDebiri; (vito ro sungula ra Debiri a a ri Kiriyata-Sefere).

₁₂Kutani Kalebe a ku: “La nga ta hlula Kiriyata-Sefere, a wu teka, ndzi ta n'wi nyika n'wana wa mina Akisa, a va nsati wa yena.” ₁₃Otiniele, n'wana Kenazi, ndzisana ya Kalebe, a wu teka, kutani Kalebe a n'wi nyika n'wana wa yena, Akisa, a va nsati wa yena. ₁₄Kuteloko Akisa a fikile ekaya, a kucetela nuna wa yena leswaku a kombela nsimu eka tata wa yena. ₁₅Kavaloko Akisa a xika embhongolweni, kutani Kalebe a ku eka yena: “U na yini?” Yena a ku: “Ndzi nyike xilo xin'wana, hikuva u ndzi nyikile tiko leri nga etlhelo ra le dzongeni, u ndzi ha ni swihlovo.” Hikwalaho Kalebe a n'wi nyika swihlovo swa le henhla ni swihlovo swa le hansi.

₁₆Loko, va ri vana va Mukeni, mukon'wana wa Muxe, a va sukile emutini wa micindzu, va tlhandlukela ni vana va Yuda emananga ya Yuda, edzongeni ka Aradi; kutani va ya kona, va aka ni vanhu va kona. ₁₇Kambe Yuda a famba swin'we na Simiyoni, makwavo, va ya hlula Vakanana lava akeke eSefata, va va endla lavo yila (anathema). Hikwalaho muti wolowo wu thyiwile vito ra Horma (anathema). ₁₈Yuda a teka na Gaza ni tiko ra kona, na Axikeloni, ni tiko ra kona, na Ekroni, ni tiko ra kona. ₁₉Yehovha a va na Yuda, kutani a hlongorisa lava akeke etintshaveni, kambe a tsandzeka ku hlongorisa lava akeke erivaleni, hikuva a va ri ni tigolonyi ta nsimbhi. ₂₀Kalebe a nyikiwa Hebroni, hilaha Muxe a nga vula hakona, kutani a hlongorisa kona vana va Anaka lavanharhu va vavanuna.

₂₁Loko, va ri vana va Benjamini, a va hlongorisanga Vayebusi lava akeke eYerusalema; hikwalaho Vayebusi va ha akile eYerusalema, kun'we ni vana va Benjamini ni namuntlha. ₂₂Va yindlu ya Yosefa va tlhandlukele eBetele, kutani Yehovha a va na vona. ₂₃Va yindlu ya Yosefa va rhumela ku ya kambela Betele (vito ro sungula ra muti wolowo a wu ri Luzi). ₂₄Kutani tinhlori ti vona munhu la humaka emutini, ti ku eka yena: “Hi kombise laha ku nga ngheniwaka emutini, hi ta ku endlela hi tintswalo.” ₂₅Kuteloko a va kombisile laha ku nga ngheniwaka hakona emutini, va dlaya va muti wolowo hi ku kariha ka fumu, kambe va tshika munhu yeloyi, ni va yindlu ya yena hinkwavo, va tifambela. ₂₆Kutani munhu yeloyi a rhurhela etikweni ra Vahiti; a aka muti kona, a wu thya vito ra Luzi. Ra ha ri vito ra wona ni namuntlha.

₂₇Manase, yena, a nga hlongorisangi va Beta-Xeyani ni va miti ya kona, hambi va ri va Taanaka ni va miti ya kona, hambi va ri lava akeke eDori ni va miti ya kona, hambi va ri lava akeke eYibiliyamu ni va miti ya kona hambi va ri lava akeke eMegido ni va miti ya kona; kambe Vakanana va alela etikweni rero. ₂₈Kuteloko Vaisraele va kumile matimba, va luvisa Vakanana, kambe va tsandzeka ku va hlongolela makumu.

₂₉Loko a ri Efrayimi, a nga hlongolanga Vakanana lava akeke eGezere kutani Vakanana va aka na vona eGezere.

₃₀Zebuloni, na yena, a nga hlongolangi lava akeke eKitironi, hambi va ri lava akeke eNahalala; kutani Vakanana va aka na vona, kambe va va humesisa ndzuvo.

₃₁Loko a ri Asere, a nga hlongolanga lava akeke eAko, hambi va ri lava akeke eSidoni, na Ahalabu, na Akizibi, na Heliba, na Afeke, na Rehobo. ₃₂Va Asere va aka ni Vakanana lava akeke etikweni rero, va nga va hlongorisi.

₃₃Na yena Neftali, a nga hlongolangi lava akeke eBeta-Xemexe, hambi va ri lava akeke eBeta-Anati, a aka ni Vakanana lava akeke etikweni rero; lava akeke eBeta-Xemexe na Beta-Anati va n'wi humesela ndzuvo.

₃₄Kutani Vaamori va va ni sindziso eka vana va Dani entshaveni, va nga va pfumeleri ku xikela erivaleni. ₃₅Hikwalaho Vaamori va alela Hara-Herexi, na Ayaloni, na Xaalabimi, hambiswiritano, va nyimba ya Yosefa va va tikela, va ko va humesisiwa ndzuvo. ₃₆Loko ri ri tiko ra Vaamori, a ri sukela entshaveni ya Akrabimi, eribyeni, ku ya etlhelo ra le henhla.