Ta Yerusalema lontshwa.
1Yehovha u vulavula sweswo, a ku: “Matilo i xiluvelo xa mina, ni misava i vunavelo bya mikondzo ya mina; hi yihi yindlu leyi mi nga ta ndzi akela Yona, ni xivandla xa ku wisa ka mina xi nga va xihi xana? 2Swilo leswi hinkwaswo, voko ra mina ri swi endlile kutani sweswo hinkwaswo swi humelele,” ku vula Yehovha. “Vona, loyi ndzi nga ta n'wi languta, hi loyi a titsongahataka, loyi mbilu ya yena yi nga leyi tshovekeke, ni loyi a rhurhumelaka hi rito ra mina. 3La tlhavaka homu, a kotisa loyi a dlayaka munhu, la gandzelaka hi nyimpfu, a kotisa loyi a tlhavaka mbyana; la humesaka nhlengo, a kotisa la humesaka ngati ya nguluve, la hisaka mirhi ya risuna, a fana ni la katekisaka swifaniso swa swikwembu. Valavo hinkwavo va titsakela etindleleni ta vona, kutani moya wa vona wu tsakela manyala ya vona. 4Na mina ndzi ta tsakela khombo ra vona, kutani ndzi ta vitanela ehenhla ka vona lexi va xi chavaka; hikuva ndzi vitanile, kambe a ku na loyi a nga hlamula, ndzi vulavurile kambe a va yingisanga; va endlile leswi biheke emahlweni ya mina, va titsakele ka leswi ndzi nga swi rhandziki.”
5Yingisani rito ra Yehovha, n'wina lava chavaka rito ra yena! “Vamakwenu lava mi vengaka, lava mi tlherisaka hikwalaho ka vito ra mina, va ku: ‘Yehovha a a kombise ku twala ka yena leswaku hi ta vona ku tsaka ka n'wina!’ Kambe va ta khomiwa hi tingana. 6Ku twakala huwa emutini, rito ri huma etempeleni: i rito ra Yehovha, la tirihiselaka eka valala va yena.
7“Loko a nga si twa ku vaviseka, u velekile; ku lumiwa ku nga si humelela, u velekile n'wana wa xinuna. 8I mani la nga twa mhaka leyo tano, ni siku ni rin'we xana? I mani la nga vona leswo tano ni siku rin'we-ke? Xana tiko ri nga tswariwa hi siku rin'we xana? Xana tiko ri nga velekiwa kan'we, leswaku Siyoni a nga veleka vana va yena, a nga si twa ku lumiwa-ke? 9Xana ndzi ta boxa mbeleko wa munhu leswaku a ta tsandzeka ku veleka?” ku vula Yehovha. “Xana mina la tswalaka, ndzi ta sivela ku veleka xana?” ku vula Xikwembu xa wena. 10“Titsakeleni hikwalaho ka Yerusalema, mi va mi tsakisisa hikwalaho ka yena, n'wina hinkwenu lava n'wi rhandzaka! Mi tshukatshuka hi ku tsaka swin'we na yena, n'wina hinkwenu lava rilaka nkosi, ehenhla ka yena; 11leswaku mi ta dya, mi va mi xurha hi mafi ya ku chavelela ka yena; leswaku mi ta tsakela hi ku tlurisa, ku tala ka ku twala ka yena.” 12Hikuva Yehovha u vulavurile sweswo a ku: “Waswivo, ndzi ta fambisa ka yena ku rhula tanihi nambu, ni ku twala ka matiko tanihi boboma leri halakaka, kutani mi ta an'wa, mi va mi velekiwa, ni ku vukarhiwa. 13Tanihi munhu la chaveleriwaka hi mana wa yena, ndzi ta mi chavelela xisweswo kutani mi ta chaveleriwa emutini wa Yerusalema.” 14Mi ta swi vona, timbilu ta n'wina ti ta tsaka, marhambu ya n'wina ma ta kuma matimba lamantshwa tanihi byanyi; voko ra Yehovha ri ta tikombisa hi rirhandzu eka malandza ya yena, kambe u ta kombisa ku kariha eka valala va yena.
15Hikuva, waswivo, Yehovha u ta ta ni ndzilo ni golonyi ya yena tanihi xihuhuri, ku halata vukari bya yena, byi va byi pfurha, ni ku chavisa ka yena, ma va malangavi ya ndzilo. 16Hikuva Yehovha u yimisa ku lulama ka yena hi ndzilo, u laya nyama hinkwayo hi tlhari kutani lava Yehovha a nga ta va dlaya, va ta tala ngopfu. 17“Lava tihlawulaka, lava tibasisaka ku ya emitangeni, va ri karhi va etisa loyi a va fambisaka, lava dyaka nyama ya nguluve, ni swilo swa manyala, ni makondlo, valavo hinkwavo va ta lova,” ku vula Yehovha. 18“Ndzi tiva mitirho ya vona, ni miehleketo ya vona.
“Nkarhi wu fikile wa ku hlengeleta matiko hinkwawo ni tindzimi hinkwato; va ta ta, va ta vona ku kwetsima ka mina. 19Ndzi ta endla xikombiso exikarhi ka vona, kutani ndzi ta rhuma ematikweni lava nga ta pona exikarhi ka vona, eka Tarxixi, ni ka Pulu, ni ka Ludu, lava copaka hi vurha, eka Tubala ni ka Yavhani, eswihlaleni leswi nga ekule, leswi nga siki twaka ta mina, leswi nga siki vonaka ku kwetsima ka mina, kutani va ta twarisa ku vonakala ka mina exikarhi ka vamatiko; 20va ta vuyisa vamakwenu hinkwavo hi le xikarhi ka matiko hinkwawo, u ku va humesela Yehovha; va ta ta va khandziyile tihanci, ni tigolonyi, van'wana va tlakuriwa, va khandziyile ni timulwa ni tikamela, entshaveni ya mina leyo kwetsima, le Yerusalema,” ku vula Yehovha; “kukotisa loko vana va Israele va tisa nhlengo wa vona embiteni ya ku basa, endlwini ya Yehovha. 21Na swona, ndzi ta teka exikarhi ka vona, lava nga ta va vaprista ni Valevhi,” ku vula Yehovha.
22“Hikuva hilaha matilo lamantshwa, ni misava leyintshwa, leyi ndzi nga ta yi tumbuluxa, swi ta tshama swi va kona, emahlweni ka mina,” ku vula Yehovha, “hi sweswo rixaka ra n'wina, ni vito ra n'wina swi ta tshama swi va kona. 23Kutani ku ta humelela leswaku n'weti yin'wana ni yin'wana ni Savata rin'wana ni rin'wana, nyama hinkwayo yi ta ta ku ndzi khinsamela,” ku vula Yehovha. 24“Kutani loko a ta huma, va ta vona mitsumbu ya vanhu lava tiariseke ka mina; hikuva xivungu xa vona xi nga ka xi nga fi, ni ndzilo wa vona wu nga ka wu nga timeki; kutani va ta nyenyetsa nyama hinkwayo.”
