ESAYA 63

₁I mani loyi a pfaka eEdomu, la humaka eBosira a ambele tinguvu leto tshwuka, leto vangama, la tikurisaka evukulukumbeni bya matimba ya yena? “Hi mina la vulavulaka hi ku lulama, la kotaka ku ponisa.” ₂Tinguvu ta wena ti tshwukile hikwalaho ka yini xana? Ti fana ha yini ni tinguvu ta lava khuvutaka exikhuvutelweni xana? ₃“A ndzi khuvuta ndzi ri swanga exikhuvutelweni, exikarhi ka matiko a ku na loyi ngi a ri na mina, ndzi va khuvutile evukarini bya mina, ndzi va pyanyaterile eku kariheni ka mina; ngati ya vona yi phyandlekele tinguvu ta mina kutani ndzi onhile nguvu ya mina hinkwayo. ₄Hikuva siku ra ku tirihisela a ri ri kona embilwini ya mina, kutani lembe ra vakutsuriwa va mina ri fikile. ₅Ndzi langutile, kutani a ku nga ri na munhu ku ndzi pfuna; ndzi hlamarile, kambe a ku nga ri na munhu ku ndzi seketela; hilaha voko ra mina ri ndzi pfuneke, kutani vukari bya mina byi ndzi seketerile. ₆Ndzi pyanyaterile matiko evukarini bya mina, ndzi va pyopyisile eku kariheni ka mina, ndzi halatile ngati ya vona emisaveni.”

₇Ndzi ta dzunisa tintswalo ta Yehovha, ni ku dzuneka ka yena, hilaha swi fanekelaka hinkwaswo leswi Yehovha a nga hi endlela swona, ni vunene bya yena lebyikulu eka yindlu ya Israele lebyi a nga va kombisa byona hi tintswalo ta yena, ni vukulu bya rirhandzu ra yena. ₈U vurile, a ku: “Kunene tiko ranga hi vona, vana lava nga ka va nga ndzi xisi!” Kutani a a ri muponisi wa vona. ₉Eku karhatekeni ka vona, a a karhateka na yena, kutani ntsumi ya mombo wa yena yi va ponisile. Erirhandzwini ra yena ni le vuneneni bya yena, u va kutsurile a ri yena, u va seketerile, u va tlakurile emasikwini hinkwawo ya khale. ₁₀Kambe vona va tiarisile, kutani va vavisile moya wa yena lowo kwetsima; kutani yena u hundzuke nala wa vona, a va a lwa na vona.

₁₁Tiko ra yena ri tsundzuka masiku ya khale ya Muxe: u kwihi la nga va humesa elwandle, ni murisi wa ntlhambi wa yena? U kwihi la nga veka exikarhi ka vona moya wa yena lowo kwetsima; ₁₂la nga fambisa voko ra xinene ra Muxe hi voko ra yena lero kwetsima; la nga avanyisa mati emahlweni ka vona, ku tiendlela vito leri nga heriki, ₁₃la nga va fambisa exikarhi ka swiwa, tanihi mangwa exikarhi ka mananga, va nga ti khunguvanyeka? ₁₄Tanihi swifuwo leswi rhelelaka enkoveni, moya wa Yehovha wu va yisile eku wiseni. Hi mukhuva wolowo u fambisile tiko ra wena, ku tiendlela vito leri twalaka.

₁₅Languta u ri ematilweni, u vona u le ndlwini ya wena leyo kwetsima, leyo twala: Ku chivirika ka wena ku kwihi ni matimba ya wena? Ku tshuka ka marhumbu ya wena, ni tintswalo ta wena a swa ha tirhi ka mina. ₁₆Hambiswiritano, u tata wa hina, hikuva Abrahama a nga hi tivi, na Israele a nga hi tivisisi; wena Yehovha, u tata wa hina, vito ra wena i mukutsuri wa hina hi masiku. ₁₇Hikwalaho ka yini, o Yehovha, u hi tsendzelekisaka ekule ni tindlela ta wena, kutani u nonon'hwisa timbilu ta hina leswaku ti nga ha ku chavi? Tlhela, hikwalaho ka rirhandzu ra wena eka malandza ya wena, ni ka tinxaka ta ndzhaka ya wena! ₁₈Vanhu va tiko ra wena lero kwetsima va fuwile tiko nkarhinyana ntsena; valala va hina, va pyanyatele yindlu ya wena ya ku kwetsima. ₁₉Khale sweswi hi fana ni tiko leri u nga ri fumiki, leri nga vuriwiki hi vito ra wena.