Ta Korexe loko a hlawuriwa hi Yehovha ku kutsula Israele.
1“Yehovha u vule sweswo eka muhlawuriwa wa yena, eka Korexe, loyi ndzi n'wi tekeke hi voko ra xinene, leswaku a wisa emahlweni ka yena matiko, a tshunxa vamba ra tihosi, a pfuleriwa tinyangwa, ti nga pfariwi; u ri: 2Hi mina ndzi nga ta famba emahlweni ka wena, ndzi ta mbundzumuxa switsunga; ndzi ta tshova tinyangwa ta nsuku, ndzi wisa timhandze ta nsimbhi; 3ndzi ta ku nyika rifuwo leri fihliweke, ni xuma lexi nga exihundleni, u ta tiva leswaku hi mina Yehovha Xikwembu xa Israele la ku vitaneke hi vito ra wena. 4Hikwalaho ka rirhandzu ra mina eka Yakobo ni ka Israele, muhlawuriwa wa mina, ndzi ku vitanile hi vito ra wena, ndzi vulavurile na wena hi tintswalo loko u nga si ndzi tiva. 5Hi mina Yehovha, ku hava un'wana; ehandle ka mina, ku hava Xikwembu. Ndzi ku tsimbile loko u nga si ndzi tiva, 6leswaku ku sukela evuxeni, ku fika evupeladyambu ku ta tiviwa leswaku a ku na un'wanyana ehandle ka mina; hi mina Yehovha, ku hava un'wana. 7Hi mina la endleke ku vonakala ni munyama, ndzi tsakisa munhu, ndzi n'wi rhumela khombo; hi mina Yehovha, la endleke swilo sweswo hinkwaswo. 8N'wina matilo, humesani mberha ya n'wina leyi humaka ehenhla! Wena misava, handzuka, u humesa ku hanya, u veleka ku lulama hi nkarhi wu ri wun'we! Mina, Yehovha, ndzi tumbuluxe swilo sweswo.
9“Khombo eka loyi a kanetanaka ni muvumbi wa yena! Yi ri mbita exikarhi ka timbita! Xana vumba byi ta ku eka muvumbi: ‘U endla yini?’ Xana lexi u xi tirhaka xi ta ku: ‘U hava mavoko’? 10Khombo eka la byelaka tata wa yena: ‘U ndzi velekele yini-ke?’ ni ka mana wa yena: ‘U ndzi tswalele yini-ke?’ 11Ku vula sweswo Yehovha, Muhlawuriwa wa Israele ni mutumbuluxi wa yena: ‘Xana va ta ndzi vutisa leswi nga ta ta? Xana mi ta ndzi lerisa swa vana va mina ni swa ntirho wa mavoko ya mina? 12Hi mina la endleke misava, la vumbeke munhu ehenhla ka yona. Hi mina ndzi endleke matilo hi mavoko ya mina; hi mina loyi ndzi fumaka nyimpi ya wona hinkwayo. 13Hi mina ndzi pfuxeke Korexe eku lulameni ka mina ndzi ta n'wi khulelela tindlela ta yena hinkwato; u ta tlhela a aka muti wa mina, u ta tshunxa vakhomiwa va mina, ku nga ri hi ku kutsula ni ku humesa nchumu,’ ku vula Yehovha wa tinyimpi.” 14Ku vula sweswo Yehovha: “Bindzu ra Egipta, ni xuma xa Etiyopiya ni xa va Xeba lavo leha, swi ta ta eka wena, swi va swa wena, swi ku landza. Va ta ta va bohiwile va ta korhama emahlweni ka wena, va ta ku khongela: ‘Ku hava Xikwembu ehandle ka wena; xin'wana ku hava ni lexitsanana.’ ” 15Hakunene, u Xikwembu lexi tifihlaka, Xikwembu xa Israele, wena Muponisi! 16Hinkwavo va khomiwa hi tingana, va vaviseka, va suka va ri ni tingana vona vaendli va swifaniso. 17Israele u ponisiwe hi Yehovha hi ku pona loku nga heriki, a mi nga ha vi na tingana ni ku soriwa, hi laha ku nga heriki.
18Hikuva u vurile sweswo Yehovha, la endleke matilo, xona Xikwembu lexi endleke misava ni ku yi vumba lexi yi sunguleke xi ri xona; a nga yi endlanga mananga, kambe u yi endlile leswaku yi akiwa. “Hi mina Yehovha, ku hava un'wana! 19A ndzi vulavulanga exihundleni, endhawini ya munyama ya misava, a ndzi byelanga vatukulu va Yakobo ndzi ku: ‘Mi ta ndzi lava mahala!’ Mina Yehovha, ndzi vula leswo lulama, ndzi vula leswi tiyeke. 20Hlengeletanani, tanani, tshinelani swin'we, n'wina lava seleke exikarhi ka vamatiko! Va pfumala ku twisisa lava rhwalaka xifaniso xa vona xa ntsandze, lava khongelaka xikwembu lexi nga kotiki ku ponisa. 21Vulani, mi va vitana, va kanela swin'we! La bvumbheke swilo sweswo eku sunguleni, la swi vuleke khale, i mani? Xana a hi mina Yehovha? A ku na Xikwembu xin'wana ehandle ka mina, hi mina ntsena Xikwembu lexi lulameke lexi ponisaka. 22Hundzulekani eka mina, mi va mi ponisiwa, n'wina hinkwenu va le emakun'wini ya misava, hikuva ndzi Xikwembu, ku hava xin'wana. 23Ndzi hlambanya ha mina; swo lulama swi humile enon'wini wa mina, ri ri rito leri nga taka ri nga kanetiwi, leswaku tsolo rin'wana ni rin'wana ri ta ndzi korhamela, ni leswaku ririmi rin'wana ni rin'wana ri ta hlambanya ha mina. 24Va ta ku: ‘Eka Yehovha ntsena ku kumiwa matimba ni ku lulama!’ ” Va ta ta eka yena va tele tingana, hinkwavo lava nga n'wi karihela. 25Eka Yehovha va ta lulamisiwa, va va va dzunisiwa hinkwavo va rixaka ra Israele.
