1U ni khombo wena muonhi la nga siki onhiwaka! Wena muyivi, ku nga siki yiviwaka swa wena! Kutakuloko u hetile ku onha, u ta onhiwa, loko u hetile ku yiva, ku ta yiviwa swa wena.
2Yehovha, hi tsetselele! Hi tshemba wena. U va ku pfurha ka hina hi siku rin'wana ni rin'wana, ni ku hlayiseka ka hina hi siku ra khombo! 3Hi rito ra wena leri pfumaka, vamatiko va baleka; loko u pfuka, matiko ma hangalaka. 4Rifuwo ra n'wina leri mi ri phangeke ri ta tekiwa hi mukhuva lowu njiya yi tekaka ha wona; vanhu va ta tihoxela eka rona kukotisa tinjiya. 5Yehovha u tlakukile, hikuva u akile endhawini ya le henhla; u tatile Siyoni hi ku lulama ni vunene. 6Masiku ya wena ma ta tiya; kutani kuluko wu ta va kona wa ku hlayiseka, ni vutlhari, ni ku tiva; kutani ku chava Yehovha ku ta va rifuwo ra Yuda.
7Vonani, tinhenha ta vona ti kolola ehandle tintsumi ta ku rhula ti rila hi ku vaviseka. 8Mitila ya hela a ka ha fambiwi etindleleni. Hosi ya Asiriya yi tshovile xinakulobye, yi sandzile miti, a yi vuri nchumu hi vanhu. 9Tiko ri le nkosini ri ni tingana; Lebanoni u ni tingana, u omile; Xaroni u fana ni mananga; Baxani na Karmele va hlanhleka makamba.
10“Sweswi ndzi ta pfuka,” ku vula Yehovha, “kutani ndzi ta titlakusa, ndzi va ndzi tikurisa. 11Nyimba ya n'wina yi ta va byanyi, mi ta tswala mungu; ku hefemula ka n'wina ku ta kondletela ndzilo lowu mi hisaka. 12Kutani matiko ma ta tshwa kukota mhemba loko yi hisiwa; ma ta hisiwa hi ndzilo kukota mitwa leyi tsemiweke.”
13N'wina matiko ya le kule, yingisani lexi ndzi xi endleke, na n'wina va le kusuhi, tsundzukani matimba ya mina! 14Vadyohi va khomiwa hi ku chava le Siyoni, vasandzi va rhurhumela, va ku: “I mani exikarhi ka hina la nga ta tiya, a yima emahlweni ka ndzilo lowu hisaka? I mani la nga ta tiya a yima emahlweni ka malangavi lama nga timekiki?” 15U ta va loyi a fambaka endleleni ya ku lulama, la vulavulaka swo lulama, la sandzaka rifuwo leri tekiweke hi matimba, la nikinaka mavoko ya yena a nga ti tshuka a amukela tinyiko, a tisiva tindleve, leswaku a nga tshuki a twa timhaka ta ku dlaya, la swinyaka mahlo leswaku a nga voni swo biha. 16Hi yena la nga ta aka endhawini leyi tlakukeke; vuchavelo bya yena ma ta va makhokholo lama sunguriweke emaribyeni; u ta nyikiwa vuswa bya yena, kutani mati ya yena a ma nga phyi.
17Mahlo ya wena ma ta hlalela hosi eku sasekeni ka yona, ma ta vona misava eku anameni ka yona. 18Mbilu ya wena yi ta anakanya ku chava ka yona, u ta ku: “U kwihi mutsari? U kwihi la pimaka mali? U kwihi loyi ngi a hlaya makhokholo?” 19A ku nga ha voni tiko ro nonon'hwa, tiko ra marito lama nga twakariki, ni va marito ya manghanghamela, lawa munhu a nga ka a nga ma twisisi. 20Languta Siyoni, muti wa mikhuvo ya hina! Mahlo ya wena ma ta vona Yerusalema, byi ri vuako byo tsaka, ni tende leri nga susiwiki, leri timhingu ta rona ti nga hlomuriwiki, leri mapindza ya rona ma nga tshunxiwiki. 21Hikuva kona Yehovha i Mukwetsimi eka hina; u fana ni milambu, ni mativa lamakulu eka hina, laha ku nga ngheniki mabyatso lama tlutiwaka laha ku nga fikiki ngalava ni yin'we. 22Hikuva Yehovha i muavanyisi wa hina; Yehovha i mulawuri wa hina; Yehovha i hosi ya hina; u ta hi hlayisa! 23Mapindza ya wena ma tshunxiwile a ma nga ha tiyisi ntsintsi wa ngalava, ni ku koka matsanga! Enkarhini wolowo, rifuwo ni mitirho leyo tala ngopfu swi ta avanyisiwa; ni swilema swi ta averiwa. 24Kutani a ku nga vi na munhu la akeke eYerusalema la nga ta ku: “Ndza vabya!” Tiko leri akeke kona ri rivaleriwile swidyoho swa rona.
