ESAYA 32

₁Vonani, hosi yi ta fuma hi ku lulama, tihosana, na tona, ti ta risa hi ku lulama. ₂Un'wana ni un'wana wa vona u ta kotisa xisirhelelo loko moya wu hunga, kukota xichavelo loko xidzedze xi fika, kukota xinambyana xa mati etikweni ra dyandza, ni ndzhuti wa ribye leri tlakukeke etikweni leri omeke. ₃Mahlo ya lava vonaka ma nga ha siveriwi, ni tindleve ta lava yingisaka ti ta yingisela. ₄Timbilu ta lava magugu ti ta lulamela ku twisisa, ni ririmi ra lava ri kotlaneke ri ta vulavula hi ku hlamusela. ₅Mbabva a yi nga ha vuriwi nkulukumba, ni mudyeleri a nga ka a nga vuriwi munhu wa tintswalo. ₆Hikuva mbabva yi vulavula ta vumbabva ntsena, kutani mbilu ya yena yi tele ku biha, u ta endla vumbabva, a hleva Yehovha hi marito yo hemba, a tshika moya wa loyi a karheleke endlaleni, a tsona wa torha ku nwa. ₇Loko a ri mudyeleri, matlhari ya yena i ya vumbabva; u endla makungu ku lovisa xisiwana hi ku vulavula swa mavunwa, hambi mhaka ya mupfumari yi lulamile. ₈Kambe munhu wa vunene u kanela ta ku lulama, u phikelela ta vunene.

₉Pfukani, n'wina vavasati vo nona, yingisani rito ra mina; n'wina va nhwana lava lolohaka, yingiselani marito ya mina! ₁₀Ku ta hundza lembe rin'we ni masiku man'wana, mi ta kanakana, n'wina mi lolohaka, hikuva ku tshovela ka tivhinya ku ta va ka hava, ku nga ka ku nga tshoveriwi mihandzu. ₁₁Pfukani, n'wina vatsaki! Rhurhumelani vatidzunisi! Susani tinguvu ta n'wina, mi tiboha swisuti hi xuka lero khwaxa. ₁₂Mi ta tiba swifuva hikwalaho ka masimu lama tsakisaka, hikwalaho ka tivhinya leti velekaka ngopfu! ₁₃Mitwa ni swigatlu swi ta mila etikweni ra mina, ni le henhla ka tindlu hinkwato ta ku tsaka ta muti wa mikhuvo. ₁₄Hikuva tindlu ta vuhosi ti ta sukeriwa, muti wa pongo wu ta hundzuka rhumbi; xitsunga ni khokholo ra mulanguteri ma ta va mabako hi masiku ni masiku, yi va ndhawu ya timangwa ta nhova, ni madyelo ya mitlhambi, ₁₅ku fikela loko moya wa le henhla wu cheriwa ehenhla ka hina, ni loko mananga ma hundzuka mitanga, kutani ntanga wu fanisiwa ni xihlahla.

₁₆Hilaha ku lulama ku nga ta tiakela emananga, vunene byi ta tshama byi ri kona entangeni. ₁₇Ntirho wa ku lulama ku ta va ku rhula, ni mihandzu ya ku lulama, ku wisa ni ku tsaka loku nga heriki. ₁₈Kutani tiko ra mina ri ta aka evuakweni byo tsaka, ni le tindlwini leti tshembekaka, ni le tindhawini leti nga ni ku tsaka eku wiseni. ₁₉Kambe xihangu xi ta wela ehenhla ka xihlahla, kutani muti wu ta tsongahatiwa ehansihansi. ₂₀Ku katekile n'wina mi byalaka hinkwako laha ku cheleriweke hi mati, lava nga bohiki milenge ya homu ni mbhongolo!