Swidyoho swa Israele swi ta n'wi lovisa.
1Loko ndzi ku ndzi dyaha Israele, hilaha ku humelelaka vudyohi bya Efrayimi ni mona wa Samariya, Hikuva va endla swa mavunwa, ni khamba ri nghena etindlwini, ntlawa wa lava yivaka wu hangalaka ehandle. 2Kutani etimbilwini ta vona a va vuri leswaku ndzi tsundzuka mona wa vona. Sweswi, swiendlo swa vona swi va rhendzerile; swi le mahlweni ka mombo wa mina.
3Hi mona wa vona va tsakisa hosi; ni tindhuna, hi vunwa bya vona. 4I vaoswani hinkwavo; va kotisa xitiko lexi tshiveriwaka hi musweki, u tshika ku kondletela ndzilo, loko a sungula ku pfuva, mbila yi ko yi kukumuka. 5Hi siku ra nkhuvo wa hosi ya hina, tindhuna ti tivabyisa hi vukari bya vhinyo, yena a tshambuluta voko ra yena eka lava hlekisaka. 6Hikuva va yisa timbilu ta vona emakungwini ya vona kukotisa exitikweni; musweki wa vona u etlela vusiku hinkwabyo; nimixo xitiko xi pfurha hi malangavi ya ndzilo. 7Hinkwavo va hisa tanihi xitiko, va dya vaavanyisi va vona; tihosi ta vona hinkwato ta lova; a nga kona eka vona la vitanaka eka mina.
8Efrayimi u tipfanganisa ni vamatiko, Efrayimi i xinkwa lexi nga hundzuluxiwangiki. 9Vamatiko va dyela mandla ya yena, kambe yena a nga swi voni. U mirile misisi ya timpfu, kambe a nga swi tivi. 10Ku tikukumuxa ka Israele i vumbhoni bya xidyoho xa yena emahlweni ka yena kambe, hambiswiritano, a va tlhelelanga eka Yehovha, Xikwembu xa vona; ni ku n'wi lava, a va n'wi lavanga.
11Efrayimi u fana ni tuva lero rivala; a nga na ku anakanya. Va ka Efrayimi va vita Vaegipta, va rhumela eka Vaaxuru. 12Va ku va ha ya, ndzi ta cela rindzi ra mina ehenhla ka vona, ndzi va hlawula kukotisa nyanyana loko yi ri ehenhla, ndzi va tshinya hilaha va tivisiweke hakona enhlengeletanweni ya vona.
13Va ni khombo vona, hikuva va ndzi fularhela! Ku lahleka vona, hikuva va ndzi hundzukerile! Ndzi te ndza va kutsula, kambe vona va vulavula mavunwa ehenhla ka mina. 14A va huweleri hi timbilu ta vona eka mina, kambe va rila emasangwini ya vona, va hlengeletana hinkwavo enkarhini wa mavele ni byalwa kutani va ndzi fularhela.
15Mina ndzi va dyondzisile, ndzi vuya ndzi tiyisa mavoko ya vona, kasi va kanele ku biha ehenhla ka mina. 16Va tlhela, kambe ku nga ri ku ya eka La nge henhla. Va fana ni nseve lowu nga tshembekiki. Tihosi ta vona ti ta wisiwa hi tlhari hikwalaho ka ku tidzunisa ka tindzimi ta vona. Va ta sandziwa hakona etikweni ra Egipta.
