HOSIYA 14

₁Israele, tlhelela eka Yehovha, Xikwembu xa wena, hikuva u wile hikwalaho ka ku dyoha ka wena. ₂Tekani marito, kutani mi tlhelela eka Yehovha mi ku eka yena: “Susa swidyoho hinkwaswo, u hi amukela swinene, kutani hi ta ku tlangela hi magandzelo ya tindzimi ta hina. ₃Vaaxuru va nga ka va nga hi hanyisi; tihanci, hi nga ka hi nga ti khandziyi, kutani ntirho wa mavoko ya hina, a hi nga ha wu viti swikwembu swa hina, hikuva eka wena, xisiwana xi vona tintswalo.”

₄Ndzi ta horisa vuhundzuki bya vona ndzi va rhandza hi mbilu hinkwayo ya mina; hikuva vukari bya mina byi sukile eka vona. ₅Ndzi ta fana ni mberha eka Israele; u ta baleka ku fana ni khon'wa, a mila timitsu kukotisa Lebanoni. ₆Marhavi ya yena ma ta hluka; ku saseka ka yena ku ta va tanihi ka mutlhwari, ni ku nun'hwela ka yena ku fana ni ka Lebanoni.

₇Lava nga ta aka endzhutini wa yena va ta pfuxa koro, va baleka swiluva ku fana ni vhinya; ku twala ka yena ku ta kotisa ku twala ka vhinyo ya Lebanoni. ₈Wena, Efrayimi, ndzi ni mhaka yihi ni swifaniso? Hi mina ndzi n'wi hlamulaka, ndzi n'wi langutelaka; mina ndzi kotisaka murhi wa kipresi lowu tsakamaka; mihandzu leyi kumiwaka eka wena yi huma eka mina.

₉Hi wihi lowa vutlhari, la nga twisisaka timhaka leto, ni la nga ni ku anakanya, leswaku a ti tiva? Hikuva tindlela ta Yehovha ti lulamile; lava lulameke va ta famba eka tona, kambe vatiarisi va ta khunguvanyeka eka tona.