VAHEVERU 8

₁Kutani nhloko ya timhaka leti vuriweke hileswaku, hi ni muprista lonkulu lowo tano, la tshamaka evokweni ra xinene ra xiluvelo xa vuhosi le matilweni, ₂a nga mutirheri wa vukwetsimelo ni wa tabernakela ya xiviri, leyi yimisiweke hi Hosi ku nga ri hi munhu.

₃Hikuva muprista lonkulu un'wana ni un'wana u vekiwe ku humesa mihlengo ni magandzelo; hikwalaho swa fanela leswaku, na yena yeloyi, a va ni lexi a nga humesaka xona. ₄Hikuva loko ingi a ri la emisaveni, a a nga ti va muprista, hikuva vaprista va kona lava humesaka nhlengo hi nawu; ₅va nga lava gandzelaka hi mukhuva wa xifaniso ni ndzhuti wa leswi nga etilweni, hilaha Muxe a lerisiweke hakona, loko a ta endla tabernakela, hileswaku: “Tivonele, u endla hinkwaswo hilaha u kombisiweke hakona, u ri entshaveni.” ₆Kambe sweswi, Kriste u kumile ntirho lowu tlulaka yin'wana swonghasi, leswaku a va mulamuri wa ntwanano lowu sasekeke hi ku tluriswa lowu tiyisiweke hi ku tshembisa loku tlurisaka hi ku saseka.

₇Hikuva loko ngi lowo rhanga a wu tengile hinkwako, a ku nga ti laviwa wun'wana wa vumbirhi. ₈Hikuva xi vulavule na vona hi ku tshinya, xi ku: “Masiku ma ta, ku vula Hosi, lawa ndzi nga ta endla ha wona ntwanano lowuntshwa ni yindlu ya Israele, ni yindlu ya Yuda, ₉a wu nga vi lowu ringanaka ni lowu ndzi wu endleke ni vatata wa vona siku ndzi va khomeke hi voko, ndzi va humesa etikweni ra Egipta, hikuva vona a va tiyiselanga ntwananweni wa mina, kutani mina ndzi va tshikile, ku vula Hosi. ₁₀Hikuva ntwanano lowu ndzi nga ta wu vekela yindlu ya Israele, endzhaku ka masiku lawa, hi lowu, ku vula Hosi: Ndzi ta veka milawu ya mina eku anakanyeni ka vona, ndzi yi tsala etimbilwini ta vona, ndzi ta va Xikwembu xa vona, vona va va tiko ra mina. ₁₁Kutani a va nga ha tshami va dyondzisana, un'wana ni un'wana a dyondzisa warikwavo, kumbe makwavo, a ku: ‘Tiva Hosi!’ Hikuva va ta ndzi tiva hinkwavo ku sungula hi lontsongo, ku ya fika eka lonkulu. ₁₂Hikuva ndzi ta va twela vusiwana eku hombolokeni ka vona, kutani ndzi nga ka ndzi nga ha tshami ndzi tsundzuka ku dyoha ka vona, ni milandzu ya vona.” ₁₃Leswi a vulaka ntwanano lowuntshwa, u vula leswaku lowo sungula hi lowu hlakaleke. Kutani leswi hlakaleke ni leswi dyuhaleke, swi kusuhi ni ku hela.