VAHEVERU 3

₁Hikwalaho, vamakwerhu lavo kwetsima, mi nga ni ku vitaniwa ka le tilweni, xiyani swinene la nga muapostola ni muprista lonkulu wa ku pfumela ka hina, ₂a nga Yesu, la tshembiwaka hi la n'wi vekeke, kukotisa Muxe, na yena, a tshembekeke endlwini ya yena hinkwayo. ₃Hikuva u ringanisiwile leswaku swi n'wi fanele ku tlula Muxe swonghasi hi ku twala, hikuva la akeke yindlu u tlula swonghasi yindlu hi vukulu. ₄Hikuva yindlu yin'wana ni yin'wana yi akiwile hi muaki; kutani la akeke swilo hinkwaswo i Xikwembu. ₅Kambe loko a ri Muxe, u tshembekile endlwini ya yena hinkwayo kukotisa nandza, u tivisile vanhu leswi faneleke ku vuriwa; ₆kambe Kriste u tshembekile kukotisa n'wana eku fumeni ka yindlu ya yena, kutani yindlu ya yena hi hina, loko kunene hi hlayisa hi ku tiya ku ya fika emakumu, ku tshemba ka hina loku hi tidzunisaka hikwalaho ka kona, hi nga siveriwi ha nchumu.

₇Hikwalaho, hilaha Moya lowo Kwetsima wu vulaka hakona: “Namuntlha, loko mi twa rito ra yena, ₈mi nga tshuki mi nonon'hwisa timbilu ta n'wina, kukotisa loko va n'wi pfukile hi siku ra ndzingo, emananga, ₉laha vatata wa n'wina va nga ndzi ringa kona, va ndzi kamba, va vona mitirho yanga hi malembe ya mune wa makume. ₁₀Hikwalaho ndzi nga karihela rixaka lero, ndzi ku: ‘Timbilu ta vona ti hambukile hi masiku, valavo a va tivangi tindlela ta mina.’ ₁₁Hilaha ndzi nga hlambanya hakona evukarini bya mina leswaku va nga ti nghena eku wiseni ka mina.”

₁₂Tivoneleni, vamakwerhu, leswaku ku nga tshuki ku va na un'we exikarhi ka n'wina loyi mbilu ya yena yi nga leyo biha, yi tiarisaka, yi fularhela Xikwembu lexi hanyaka, ₁₃kambe mi khongotelana hi masiku hinkwawo, ka ha hlayiwa leswaku: “Namuntlha” leswaku ku nga ti va na un'we exikarhi ka n'wina la tinonon'hwisaka hi ku xisiwa ka vudyoho. ₁₄Hikuva hi averiwile Kriste, loko ntsena hi hlayisa hi ku tiya, ku ya fika emakumu, ku tshemba loku hi nga sungula hakona, ₁₅ka ha vuriwa leswaku: “Namuntlha, loko mi twa rito ra yena, mi nga tshuki mi nonon'hwisa timbilu ta n'wina, kukotisa loko va n'wi pfukile.” ₁₆Hikuva i vamani xana lava a va kariheleke hi malembe ya mune wa makume xana? ₁₇A hi vona lava dyoheke, volavo mitsumbu ya vona yi nga sala emananga xana? ₁₈Kambe i vamani xana xi nga hlambanya eka vona leswaku va nga tshuki va nghena eku wiseni ka xona, loko va nga ri lava tiariseke xana? ₁₉Kutani ha swi vona leswaku swi va tsandzile ku nghena, hikwalaho ka leswi va nga pfumelangiki.