GENESA 43

₁Kambe ndlala yi engeteleka etikweni. ₂Kuteloko va hetile koro leyi va nga yi xava Egipta, Yakobo a ku eka vana va yena: “Vuyelani, mi ya hi xavela swakudyanyana.”

₃Kutani Yuda a vulavula a ku: “Munhu loyi, u tiyisile eka hina, a ku: ‘Mi nga ka mi nga voni mombo wa mina loko mi nga ti ni ndzisana ya n'wina.’ ₄Loko u hi pfumelela ku famba ni makwerhu, hi ta rhelela hi ya ku xavela swakudya; ₅kambe loko u nga hi rhumi na yena, hi nga ka hi nga rheleli, hikuva munhu loyiya u te eka hina: ‘Mi nga ka mi nga voni mombo wa mina loko mi nga vuyi ni makwenu.’ ”

₆Kutani Israele a ku: “Mi ndzi endle yini swo biha swonghasi, hi ku byela munhu yeloyi, leswaku mi ni makwenu un'wana?”

₇Vona va hlamula va ku: “Munhu yeloyi, u hi vutisisile ehenhla ka hina ni rixaka ra hina, a ku: ‘Tata wa n'wina wa hanya xana? Makwenu un'wana u kona xana?’ Kutani hi n'wi byela hi hlamula marito walawo. A hi ta swi tivisa ku yini leswaku a a ta ku: ‘Fambani, mi ya teka makwenu?’ ”

₈Yuda a ku eka Israele, tata wa yena: “Rhuma wandzisanyana loyi, na mina, hi ta pfuka hi famba; sweswo hi ta hanya, hi nga ta fa, hina na wena ni swihlangi swa hina. ₉Ndzi tibohile hikwalaho ka yena, u ta n'wi lavela eka mina; kungakuloko ndzi nga vuyi na yena eka wena, ndzi n'wi veka emahlweni ka wena, ndzi ta va ni nandzu emahlweni ka wena hi masiku hinkwawo; ₁₀loko ngi a hi hlwelanga, i ngi hi tlhele hi vuyela kambirhi sweswi.”

₁₁Israele, tata wa vona, a ku eka vona: “Loko swi ri tano, mi fanele ku endlisa sweswo: Tekani emikwameni ya n'wina leswo saseka, leswi humesiwaka hi tiko mi ya nyika munhu yeloyi: mi teka balsama, ni vulombe, ni asitiragala, ni ladano, ni timanga, ni tialimondi; ₁₂mi teka ni mali yin'wana yi hlayiwe kambirhi emavokweni ya n'wina, ni mali leyi yi nga tlherisiwa emilon'wini ya mikwama ya n'wina, mi yi heleketa; kumbe va hoxile. ₁₃Mi va mi teka ni makwenu, mi famba na yena eka munhu yeloyi; ₁₄kutani Xikwembu xa matimba hinkwawo a xi mi kumise tintswalo eka munhu yeloyi, a ta mi tlherisela ni makwenu lo un'wana na Benjamini. Loko ndzi ri mina, loko ndzi fanekele ku lahlekeriwa hi vana, a ndzi lahlekeriwe hi vona!”

₁₅Kavaloko va teka ndzuvo yeleyo, va teka ni mali leyi nga pimiwa kambirhi emavokweni ya vona, na Benjamini; va suka va rhelela eEgipta, va ya fika emahlweni ka Yosefa. ₁₆Kuteloko Yosefa a vona Benjamini a ri na vona, a ku eka mulanguteri wa yindlu ya yena: “Yisa vanhu lava, ekaya, u ya va tlhavela u va lunghisela, hikuva vanhu lava, va ta dya hala ka mina nhlekanhi lowu.” ₁₇Wanuna loyi, a endla hilaha Yosefa a n'wi leriseke hakona, a yisa vanhu lava endlwini ya Yosefa.

₁₈Kambe va tshuka loko va yisiwa endlwini ya Yosefa, va ku: “Hi nghenisiwa hikwalaho ka mali leyi nga tlheriseriwa emikwameni ya hina enkarhini lowuyani; hi ta tengisiwa, va ta hi pfukela matimba, va hi wela ehenhla, va hi khoma ni timbhongolo ta hina, hi ta va makhumbi ya yena.” ₁₉Kutani va tshinelela mulanguteri wa yindlu ya Yosefa, va vulavula na yena enyangweni ya yindlu, ₂₀va ku: “Oho! Hosi ya hina, leswiya hi nga ta lero rhanga hi ta xava swakudya; ₂₁kuteloko hi fike ebyetlelweni hi tshunxa mikwama ya hina, ho tshukela mali ya un'wana ni un'wana enon'wini wa nkwama wa yena, mali ya hina, hi matshamela ya yona; hi tlhela hi yi teka emavokweni ya hina; ₂₂hi teke ni yin'wanyana kambe emavokweni ya hina yo xava swakudya; a hi tivi leswaku xana i mani la nga hoxa mali ya hina emikwameni ya hina.”

₂₃Mulanguteri a ku eka vona: “Ku rhula a ku ve na n'wina, mi nga chaveni, hikuva Xikwembu xa n'wina ni Xikwembu xa tata wa n'wina, hi xona xi mi nyikeke vukosi emikwameni ya n'wina; mali ya n'wina yi fikele ka mina.” Kutani a va humesela Simiyoni.

₂₄Munhu yeloyi a va heleketa endlwini ya Yosefa, a va nyika mati, va hlantswa milenge ya vona, a fihluta ni timbhongolo ta vona. ₂₅Kutani va lunghisa ndzuvo ya vona, va ta nyika Yosefa loko a ta ta ninhlekanhi; hikuva a va twile leswaku va ta dya swakudya kona. ₂₆Kuteloko Yosefa a ta endlwini, va tisela eka yena endlwini ndzuvo leyi ngi va ri na yona emavokweni, va korhama ehansi emahlweni ka yena. ₂₇Kutani a va vutisa ku hanya ka vona, a ku: “Tata wa n'wina, lowa xikoxa, wa ha tsakile xana, loyi mi nga ndzi byela yena xana? Wa ha hanya xana?”

₂₈Va ku: “Nandza wa wena, tata wa hina, wa ha tsakile, wa ha tihanyela.” Va korhama, va n'wi khinsamela.

₂₉Yosefa a tlakusa mahlo ya yena, a vona Benjamini ndzisana ya yena, n'wana wa mana wa yena, a ku: “Xana hi yena loyi makwenu lontsongo, loyi mi nga ndzi byela yena?” A ku: “Xikwembu a xi ku katekise, n'wananga!” ₃₀Kutani Yosefa a hatlisa a huma, hikuva mbilu ya yena a yi pfurhela makwavo, a ya lava laha a nga rilelaka kona, a nghena endlwini leyi ya le xikarhi, a rila kona. ₃₁Loko a tihlangule emahlweni, a tlhela a huma, a titiyisa, a ku: “Phamani swakudya!” ₃₂Kutani va n'wi phamela hitlhelo, ni Vaegipta lava ngi va dya na vona, va va phamela hitlhelo, hikuva Vaegipta a va dyi ni Vaheveru, hikuva swi bihile eka Vaegipta. ₃₃Va tshamisa emahlweni ka Yosefa, lowa hosi hi vukulukumba byakwe, ni lowa ndzisana hi vutsongo byakwe; kutani vavanuna valavo va langutana va hlamala. ₃₄Kutani a va avela swakudya leswi nga la emahlweni ka yena, ntsena mpandzwa wa Benjamini wu tlula mipandzwa ya vona hinkwavo kantlhanu. Va nwa, va tsaka na yena.