1Endzhaku ka timhaka teto, mucheleri wa hosi ya Egipta ni muphameri wa xinkwa, va dyohela n'wini wa vona, hosi ya Egipta. 2Kutani Faro a karihela tindhuna letimbirhi ta yena, ndhuna ya vacheleri ni ndhuna ya vaphameri; 3kutani a va nyiketa leswaku va hlayisiwa endlwini ya hosi ya valanguteri, ekhotsweni laha Yosefa a a bohiwile kona. 4Kutani ndhuna ya valanguteri a byela Yosefa loyi a va tirhelaka leswaku a va hlayisa, kutani va tshama masiku ekhotsweni.
5Kutani mucheleri ni muphameri wa hosi ya Egipta, lava bohiweke ekhotsweni, va lorha milorho havambirhi, un'wana ni un'wana norho wa yena hi vusiku byi ri byin'we; wun'wana ni wun'wana wu ri ni ku hlamuseriwa ka wona. 6Yosefa a ta eka vona wa ha ri mixo, a va vona, kutani maswivo, a va tsuvile. 7A vutisa tindhuna ta Faro leti khotsiweke na yena endlwini ya n'wini wa yena, a ku: “Hikwalaho ka yini mimombo ya n'wina yi nga tsakanga namuntlha xana?”
8Kutani va ku eka yena: “Hi lorhile milorho, kambe a ku na loyi a hi hlamuselaka.”
Yosefa a ku eka vona: “Ku hlamusela a ku humi eka Xikwembu xana? Mi nga ndzi byela yona.”
9Ndhuna ya vacheleri yi byela Yosefa norho wa yona, yi ku eka yena: “Ndzi lorhile ndzi vona murhi wa vhinya emahlweni ka mina; 10murhi lowu, a wu ri ni marhavi manharhu; kuteloko ma hlukile, ma baleka swiluva, kutani swidzumba swa wona swi humesa vana lava vupfeke. 11Xidzuvulo xa Faro a xi ri evokweni ra mina; kutani ndzi teka vana va wona, ndzi kamela xidzuvulweni xa Faro, ndzi nyiketa Faro xidzuvulo emandleni.”
12Yosefa a ku eka yena: “Ku hlamusela ka wona, hi loku: Marhavi lamanharhu, i masiku manharhu. 13Ka ha ta hundza masiku manharhu, Faro u ta yimisa nhloko ya wena, a ku tlherisela entirhweni wa wena, u ta ya nyiketa Faro xidzuvulo evokweni ra yena, kukotisa leswi u nga tama u endla swona khale, loko wa ha ri mucheleri wa yena. 14Kutakuloko u tshamile swinene, u ndzi tsundzuka na wena; ndzi endlele hi tintswalo, u ndzi vika eka Faro a ta ndzi humesa endlwini leyi. 15Hikuva ndzi susiwe etikweni ra Vaheveru hi ku yiviwa, kambe ni kwala a ndzi onhangi nchumu lexi va nga ndzi khotselaka xona.”
16Ndhuna ya vaphameri, loko yi vona leswaku ku hlamusela ku ri lokunene, yi ku eka Yosefa: “Na mina ndzi lorhile norho wa mina; a ndzi ri ni swirhundzu swinharhu swa swinkwa leswo basa swi ri enhlokweni ya mina; 17kutani exirhundzwini lexi ngi xi ri ehenhla, a ku ri ni swakudya swa tinxakaxaka, leswi swekeriwaka Faro; kambe tinyanyana ti dya exirhundzwini lexi ndzi xi rhweleke enhlokweni ya mina.”
18Yosefa a n'wi hlamula, a ku: “Ku hlamusela ka kona hi loku: Swirhundzu leswinharhu, i masiku manharhu; 19ku ta hundza masiku manharhu, Faro u ta yimisa nhloko ya wena, a ku hayeka emurhini, kutani tinyanyana ti ta dya nyama ya wena ehenhla ka wena.”
20Kutani hi siku ra vunharhu, siku ra ku tswariwa ka Faro, a endlela malandza ya yena hinkwawo nkhuvo; a tlakusa nhloko ya ndhuna ya vacheleri, ni nhloko ya ndhuna ya vaphameri exikarhi ka malandza ya yena; 21a tlherisela ndhuna ya vacheleri eku cheleleni ka yena, leswaku a tama a nyiketa Faro xidzuvulo emandleni, 22kambe a hayeka ndhuna ya vaphameri, hilaha Yosefa a nga n'wi hlamusela hakona. 23Kambe ndhuna ya vacheleri a nga tsundzukanga Yosefa, kambe a n'wi rivala.
