GENESA 25

₁Abrahama a tlhela a teka nsati; vito ra yena a a ri Ketura. ₂Nsati yeloyi, a n'wi velekela Zimrana, Yokixani, Medani, Midiyani, Yixibaka na Xuwaka. ₃Kutani Yokixani a veleka Xeba na Dedani. Vana va Dedani a a ri Axuru na Letuxa na Lewumi. ₄Vana va Midiyani: Efa, Efere, Hanoko, Abida na Elida. Hinkwavo volavo a va ri vana va Ketura.

₅Abrahama a nyika Isaka hinkwaswo leswi ngi a ri na swona. ₆Loko va ri vana va tinhlantswa leti Abrahama a a ti tekile, a va avela tinyiko, a va rhuma a ha hanya, kule na Isaka, n'wanakwe, tlhelo ra vuxa, etikweni ra le vuxeni.

₇Masiku ya malembe ya ku hanya ka Abrahama hi walawo: u hanye malembe ya 175. ₈Kutani Abrahama a nyiketa moya, a fa, a dyuhele swinene, a a hanye ngopfu, ni ku tsaleriwa hi masiku, kutani a amukeriwa eka varikwavo. ₉Kutani Isaka na Iximaele, vana va yena, va n'wi yimbela ebakweni ra Makapela, ensin'wini ya Efroni, n'wana Sohara, wa Muhiti, ku vandzakana na Mamre, ₁₀yi nga nsimu leyi Abrahama ingi a yi xavile eka Vahiti. Hi kona ku nga lahliwa Abrahama, swin'we na Sara, nsati wa yena. ₁₁Kuteloko Abrahama a file, Xikwembu xi katekisa Isaka, n'wana wa yena; Isaka a tshama ekusuhi ni xihlovo xa Berilahayi-Royi.

₁₂Hi vona volavo vatukulu va Iximaele, n'wana Abrahama, yeloyi Hagara, wa Muegipta, nandza wa Sara, i ngi a velekerile Abrahama. ₁₃Hi wona lawo mavito ya vana va Iximaele, hi mavito ya vona ni tinxaka ta vona: Lowa mativula wa Iximaele a a ri Nebayoto; na Kedari, na Adibiele, na Mibisama, ₁₄Mixima, Duma, na Masa, ₁₅Hadada, Tema, Yeturu, Nafixi, na Kedema. ₁₆Hi volavo vana va Iximaele, ni mavito ya vona hi walawo hi miti ya vona ni mindyangu ya vona; ti ri tihosi ta khume na timbirhi ta matiko ya vona. ₁₇Malembe ya ku hanya ka Iximaele hi wolawo, a ma ri 137. ₁₈Kutani a nyiketa moya, a fa a amukeriwa eka varikwavo. Kutani vana va yena va aka ku suka eka Havhila ku fika eka Xuru, hi ku vandzakana na Egipta, loko ku yiwa Asiriya; va tshamile kona va lavana ni vamakwavo hinkwavo va vona.

₁₉Rixaka ra Isaka, n'wana Abrahama, hi leri: Abrahama a veleka Isaka. ₂₀Kuteloko Isaka a ri munhu wa malembe ya mune wa makume, a teka Rhaveka, n'wana Betuwele wa Muaramu, wa le Padani-Aramu, ni makwavo wa Labani, wa Muaramu, a va nsati wa yena. ₂₁Kutani Isaka a khongelela nsati wa yena eka Yehovha, hikuva a a ri mhika; kutani Yehovha a amukela ku khongela ka yena; kavaloko Rhaveka, nsati wa yena, a tika nyimba. ₂₂Kambe vana a va susumetana endzeni ka yena, kutani a ku: “Loko swi ri tano, ndzi xurhele yini-ke nyimba leyi?” Kutani a ya vutisisa Yehovha.

₂₃Yehovha a ku eka yena: “Matiko mambirhi ma le khwirini ra wena. Tinxaka timbirhi ti ta avana siku ti humaka eka wena. Rixaka rin'wana ri ta hlula lerin'wana, ni lonkulu u ta tirhela ndzisana.”

₂₄Nkarhi wa ku veleka wu fika, kutani maswivo, a ku ri ni mahahlwa enyimbeni ya yena. ₂₅Kutani lowo rhanga la humeke a tshwukile, a fana ni xifunengelo xa voya hinkwako, kutani va n'wi thya vito ra Esawu (hileswaku n'wa-voya). ₂₆Endzhaku, ku huma ndzisana a khomile xirhendze xa Esawu; yena va n'wi thya vito ra Yakobo (hileswaku muhlungi). Isaka a a ri munhu wa malembe ya 60 loko vana va velekiwa.

₂₇Kutani varisanyana lavo va tshama va kula. Esawu a endla muhloti lowo tlhariha, a ri munhu wa nhova, kasi Yakobo a a ri munhu wo rhula, la tshamaka emitsongeni. ₂₈Isaka a a rhandza Esawu, hikuva a a n'wi hlotela tinyama, kambe Rhaveka a a rhandza Yakobo.

₂₉Kutani kuteloko Yakobo a sweka matsavu, Esawu a vuya emasin'wini, a karhele ngopfu. ₃₀Kutani Esawu a ku eka Yakobo: “Ndzi nyike ndzi dya leswo tshwuka, leswo tshwuka leswi, hikuva ndzi karhele.” Hilaha va nga thya vito ra yena Edomu (hileswaku swo tshwuka).

₃₁Yakobo a ku: “Rhanga u ndzi xavisela vukulukumba bya wena.”

₃₂Esawu a ku: “Leswi ndzi lavaka ku fa, byi nga ndzi pfunisa ku yini vukulukumba lebyi?”

₃₃Yakobo a ku: “Rhanga u ndzi hlambanyela.”

A n'wi hlambanyela; a xavisa sweswo vukulukumba bya yena eka Yakobo. ₃₄Kavaloko Yakobo a nyika Esawu vuswa, ni murhu wa tinyawa; kutani a dya a nwa, a suka a famba. Esawu u sandzise sweswo vukulukumba bya yena.