GENESA 21

₁Yehovha a endzela Sara, hilaha a nga vula hakona; kutani Yehovha a endlisa Sara hilaha a n'wi tshembiseke hakona. ₂Sara a tika nyimba, a velekela Abrahama n'wana eku dyuhaleni ka yena, enkarhini lowu Xikwembu i ngi xi va byerile wona. ₃Kutani Abrahama a thya n'wana loyi a nga tswaleriwa yena, loyi Sara a n'wi velekeleke, vito ra Isaka. ₄Kutani Abrahama a yimbisa Isaka, n'wana wa yena, a ri ni masiku ya ntlhanu na manharhu, hilaha Xikwembu xi n'wi leriseke hakona. ₅Abrahama a a ri munhu wa dzana ra malembe siku Isaka, n'wanakwe, a velekeriweke yena. ₆Kutani Sara a ku: “Xikwembu xi ndzi endlile nkarhi wa ku hleka, kutani hinkwavo lava nga swi twa va ta ndzi hleka.” ₇A engeta a ku: “I mani loyi i ngi a ta byela Abrahama, a ku: ‘Sara u ta an'wisa vana!’ Kasi ndzi n'wi nyikile n'wana eku dyuhaleni ya yena.”

₈Kambe n'wana a kula, a va a lumuriwa; Abrahama a endla nkhuvo lowukulu siku Isaka a lumuriwaka ha rona.

₉Kutani Sara a vona n'wana Hagara, wa Muegipta, loyi a nga n'wi velekela Abrahama, a ri karhi a hleka. ₁₀Kutani a byela Abrahama, a ku: “Hlongola khumbi leri ni n'wana wakwe, hikuva n'wana wa khumbi leri a nga ka a nga dyi ndzhaka ni n'wananga, Isaka.” ₁₁Kambe rito leri ri vavisa Abrahama, hikwalaho ka n'wana wa yena. ₁₂Kutani Xikwembu xi ku eka Abrahama: “U nga tshuki u vaviseka hikwalaho ka wandzisanyana ni ka khumbi ra wena; hinkwaswo leswi Sara a nga ta ku byela, pfumela, hikuva eka yena Isaka, ku ta huma rixaka leri nga ta thyiwa ha wena. ₁₃Hambiswiritano, ndzi ta endla tiko ha yena n'wana wa khumbi, hikuva u hume eka wena.”

₁₄Kutani Abrahama a pfuka wa ha ri mixo, a teka vuswa ni nghotsa ya mati a nyika Hagara, a swi rhwexa ekhatleni ra yena, a n'wi nyika ni n'wana, kutani a n'wi hlongola. Yena a tifambela, a ya lahleka emananga ya Berexeba. ₁₅Kavaloko mati ya nghotsa ma hela, kutani Hagara a lata n'wana wa yena ehansi ka ximudyana, ₁₆a ya tshamisa a langutana na yena empfhukeni wa ku copa ka vurha, hikuva a a ku: “Ndzi nga ti vona ku fa ka n'wananga!” A tshama a langutana na yena, kutani a tlakusa rito, a rila.

₁₇Kambe Xikwembu xi twa rito ra wandzisanyana, kutani ntsumi ya Xikwembu yi vitana Hagara yi ri etilweni, yi ku: “U na yini, Hagara? U nga chavi, hikuva Xikwembu xi twile rito ra wandzisanyana laha a nga kona. ₁₈Pfuka, u pfuxa wandzisanyana, u n'wi khoma hi voko, hikuva ndzi ta endla ha yena tiko lerikulukumba.” ₁₉Xikwembu xi n'wi pfula mahlo, a vona xihlovo xa mati; a ya tata nghotsa hi mati, a nwisa wandzisanyana. ₂₀Xikwembu xi va ni wandzisanyana, a va a kula, kutani a tshama emananga, a va mucopi wa vurha. ₂₁A aka emananga ya Parani, kutani mana wa yena a n'wi tekela nsati etikweni ra Egipta.

₂₂Enkarhini wolowo, Abimeleke na Pikolo, ndhuna ya nyimpi ya yena, a vulavula na Abrahama a ku: “Xikwembu xi na wena eswilweni hinkwaswo leswi u swi endlaka. ₂₃Sweswi, ndzi hlambanyele kwala, hi Xikwembu, leswaku u nga ka u nga ndzi xisi, hambi va ri vana va mina ni vatukulu va mina. Kukotisa loko ndzi ku endlele hi tintswalo, na wena, endlisa sweswo na mina, ni tiko leri u endzelaka eka rona.”

₂₄Abrahama a ku: “Ndzi ta hlambanya.”

₂₅Kambe Abrahama a sola Abimeleke hikwalaho ka xihlovo xa mati lexi malandza ya Abimeleke i ngi ma xi tekile hi matimba. ₂₆Kutani Abimeleke a ku: “A ndzi n'wi tivi loyi a nga endla leswo, kambe wena, a ku ndzi tivisanga swona, na mina, a ndzi nga si swi twa, loko ku nga ri namuntlha.” ₂₇Kutani Abrahama a pambula swifuwo leswitsongo ni leswikulu, a nyika Abimeleke, va endla xinakulobye vona havambirhi. ₂₈Abrahama a veka tlhelo tinyimpfu letitsongo ta ntlhanu na timbirhi. ₂₉Kutani Abimeleke a ku eka Abrahama: “Tinyimpfu letitsongo leti ta ntlhanu na timbirhi u ti vekeke tlhelo, hi ku yini xana?”

₃₀Abrahama a ku: “Hi leswaku u amukela evokweni ra mina tinyimpfu letitsongo ta ntlhanu na timbirhi, ti va timbhoni ta leswaku hi mina loyi ndzi nga cela xihlovo lexi.” ₃₁Hi laho-ke, xivandla lexi, xi vuriwaka Berexeba (hileswaku xihlovo xa ku hlambanya), hikuva va hlambanyile kona havambirhi.

₃₂Kutani va endla xinakulobye kona eBerexeba. Abimeleke na Pikolo, ndhuna ya nyimpi ya yena, va suka, va tlhelela etikweni ra Vafilista. ₃₃Kutani Abrahama a byala mikuhlu eBerexeba, a khongela kona vito ra Yehovha, Xikwembu xa mikarhi leyi nga heriki. ₃₄Kutani Abrahama a tshama nkarhi lowo leha etikweni ra Vafilista.