GENESA 12

₁Kutani Yehovha a byela Abrama, a ku: “Huma etikweni ra wena ni le rixakeni ra wena, ni le ndlwini ya tata wa wena, u ya etikweni leri ndzi nga ta ku kombisa rona. ₂Ndzi ta ku endla tiko lerikulu; ndzi ku katekisa, ndzi kurisa vito ra wena, u va xihlovo xa mikateko. ₃Ndzi ta katekisa lava nga ta ku katekisa, ndzi rhuketela lava nga ta ku rhuketela, kambe ha wena ku ta katekisiwa tinxaka hinkwato ta misava.”

₄Kutani Abrama a rhurha, hilaha Yehovha a n'wi byeleke hakona, na yena Lota a suka na yena. Abrama a a ri ni malembe ya 75, loko a huma eHarana. ₅Abrama a teka Sarayi, nsati wa yena, na Lota, n'wana wa makwavo, ni swa vona hinkwaswo leswi va swi fuweke, ni vanhu lava va va velekeke eHarana, kutani va suka va ya etikweni ra Kanana; kutani va ya fika etikweni ra Kanana.

₆Abrama a tsemakanya etikweni, a fika exivandleni xa Xikeme, ku nga eMikuhlwini ya More; kambe Vakanana a va ri etikweni lero enkarhini wolowo. ₇Kutani Yehovha a humelela eka Abrama, a ku eka yena: “Misava leyi, ndzi ta yi nyika vatukulu va wena.” Kutani a akela kona gandzelo eka Yehovha la nga humelela eka yena. ₈Kutani a suka kona, a ya entshaveni ya le vuxeni ka Betele, a dzima kona ntsonga wa yena, a ri na Betele hitlhelo ra vupeladyambu, na Ayi hitlhelo ra vuxa: a aka kona gandzelo ra Yehovha, a khongela vito ra Yehovha. ₉Kutani Abrama a suka, a famba mimpfhuka, a ya tlhelo ra dzonga.

₁₀Ku we ndlala etikweni lero, kutani Abrama a rhelela eEgipta ku ya tshama kona, hikuva ndlala a yi kurile etikweni. ₁₁Kuteloko a lave ku nghena eEgipta, a byela Sarayi, nsati wa yena, a ku: “Waswivo, ndza swi tiva leswaku u mbhuri ya wansati; ₁₂kutakuloko Vaegipta va ku vona, va ta ku: ‘I nkatakwe!’ Kutani va ta ndzi dlaya, wena va ku tshika u hanya.” ₁₃Hikwalaho u nge u makwerhu, ndzi ta tiva ku rhurheriwa swinene hikwalaho ka wena, ndzi va ndzi hanya ha wena. ₁₄Kutani kakuloko Abrama a nghena eEgipta, Vaegipta va vona nsati wa yena leswaku u sasekile ngopfu. ₁₅Tindhuna ta Faro na tona ti n'wi vona, ti n'wi dzunisa emahlweni ka Faro, kutani nsati loyi, a yisiwa endlwini ya Faro. ₁₆Kutani Abrama a rhurheriwa swinene hikwalaho ka nsati wa yena, a kuma swifuwo leswitsongo ni leswikulu, ni timbhongolo, ni makhumbi ya xinuna ni ya xisati, ni matswele ya timbhongolo, ni tikamela.

₁₇Kambe Yehovha a ba Faro ni yindlu ya yena hi makhombo lamakulu hikwalaho ka Sarayi, nkata Abrama. ₁₈Kavaloko Faro a vita Abrama, a ku eka yena: “U ndzi endlise yini? A ku ndzi tivisanga ha yini-ke leswaku i nsati wa wena? ₁₉U vurise ku yini u ku: ‘I makwerhu,’ ndzi ko ndzi n'wi endla nsati wa mina? Kutani sweswi, nsati wa wena hi loyi; n'wi teke u famba na yena.” ₂₀Kutani Faro a lerisa malandza ya yena leswaku ma n'wi hlongola, yena ni nsati, ni hinkwaswo leswi ngi a ri na swona.