EZEKIELE 9

₁Kutani a huwelela hi rito lerikulu etindleveni ta mina, a ku: “Tshinelani ekusuhi, n'wina vaonhi va muti, un'wana ni un'wana a a tamele fumu ra yena ra ku onha evokweni ra yena!” ₂Kutani, vonani, vavanuna va ntlhanu na un'we va ta hi ndlela ya nyangwa ya le henhla, tlhelo ra n'walungu; un'wana ni un'wana a tamele tlhari ra yena ra ku onha evokweni; exikarhi ka vona a ku ri ni munhu un'wana, a ambele nguvu ya ntsembyana, a a ri ni nkotloto wa mutsari, wu bohiwile exifungheni xa yena, kutani va nghena, va yima ekusuhi ni alitari ya koporo.

₃Kutani ku kwetsima ka Xikwembu xa Israele ku suka eka tikerubu leti ingi ku ri kona, ku ya enyangweni ya yindlu. Kutani Yehovha a vitana mutsari loyi a ambaleke nguvu ya ntsembyana, ₄a ku eka yena: “Tsemakanya exikarhi ka muti, exikarhi ka Yerusalema, u fungha emombyeni vanhu lava hlunameke, lava rilaka hikwalaho ka manyala hinkwawo lama endliwaka exikarhi ka vona.” ₅Ni ka lavan'wana a ku, etindleveni ta mina: “Tsemakanyani xikarhi ka muti endzhaku ka yena, mi tlhava, mi nga tsetseleri vanhu mi nga va tweli vusiwana. ₆Dlayani, hetisani swidyuhati, ni majaha, ni vanhwana, ni swihlangi, ni vavasati; kambe mi nga khumbi mani na mani la funghiweke. Mi sungula hi vukwetsimelo bya mina.” Kutani va sungula hi vakulukumba lava nga tshama emahlweni ka yindlu. ₇A ku eka vona: “Nyamisani yindlu, mi tatisa xivava hi mitsumbu! Humani!” Kutani va huma va engeta va dlaya emutini. ₈Loko va ri karhi va dlaya, mina ndzi sele ndzhaku, ndzi wa hi mombo wa mina, ndzi huwelela, ndzi ku: “Yo! Hosi Yehovha! Xana u ta lovisa hinkwaswo leswi seleke swa Israele hi ku halata vukari bya wena ehenhla ka Yerusalema xana?” ₉A ku eka mina: “Ku homboloka ka yindlu ya Israele ni ya Yuda ku kurile ngopfu; tiko ri tele hi ngati, ni muti wu tele hi lunya, va ri: ‘Yehovha u fularhele tiko, Yehovha a nga voni nchumu.’ ₁₀Na mina ndzi nga ka ndzi nga va tsetseleri, ndzi nga ka ndzi nga va tweli vusiwana, ndzi ta va rihisa mitirho ya vona etinhlokweni ta vona.” ₁₁Kutani mutsari loyi a ambaleke nguvu ya ntsembyana, a vuya, a ku: “Ndzi endlile hilaha u ndzi leriseke ha kona.”