EZEKIELE 6

₁Kutani rito ra Yehovha ri ta eka mina, ri ku: ₂“N'wana wa munhu, langutisisa mombo wa wena eka tintshava ta Israele, u bvumbha eka tona u ku: ₃N'wina tintshava ta Israele, yingisani rito ra Hosi Yehovha! Ku vula Hosi Yehovha eka tintshava ni switsunga, eka mikova ni timbala. Vonani, ndzi ta tisa fumu ehenhla ka n'wina, ndzi ta onha switsunga leswi va gandzelaka eka swona. ₄Tialitari ta n'wina ti ta hlanhliwa, ni swifaniso swa n'wina swa dyambu swi ta tshoviwa, ndzi ta wisa tinkuveri ta n'wina emahlweni ka swikwembu swa n'wina swahava. ₅Ndzi ta etlerisa mitsumbu ya vana va Israele emahlweni ka swifaniso swa vona, ndzi hangalasa marhambu ya n'wina ematlhelo ya tialitari ta n'wina. ₆Hinkwako laha mi akeke kona, miti ya n'wina yi ta hundzuka marhumbi, ni switsunga swa n'wina swi ta hlanhliwa, tialitari ta n'wina ti ta tshikiwa, ti fularheliwa; swifaniso swa n'wina swi ta fayeteriwa, swi susiwa, ni swifaniso swa dyambu swa n'wina swi ta tsemiwa, ni mitirho hinkwayo ya n'wina yi ta kukuriwa. ₇Tinkuveri ti ta wa exikarhi ka n'wina hi kona mi nga ta tiva leswaku hi mina Yehovha. ₈Hambiswiritano, ndzi ta siya masalela lama nga ta pona fumu exikarhi ka matiko, loko mi ta va mi hangalakile exikarhi ka wona. ₉Lava nga ta pona va ta ndzi anakanya va ri ematikweni laha va nga ta bohiwa kona, hikuva ndzi ta va ndzi tshovile timbilu ta vona leti hombolokeke, leti nga tshembekiki, ni mahlo ya vona lama oswaneke ni swikwembu swa vona. Va ta tinyenya va ri vona hikwalaho ka swidyoho hinkwaswo leswi va swi endleke, ni manyala hinkwawo ya vona. ₁₀Va ta tiva leswaku hi mina Yehovha, ni leswaku a ndzi vulanga mahala loko ndzi te: ‘Ndzi ta mi vavisa.’ ”

₁₁Hosi Yehovha u ri: “Bana hi swandla swa wena, u raha hi nenge wa wena, u ku: Yo! Hikwalaho ka manyala hinkwawo lama chavisaka ya yindlu ya Israele, leyi nga ta wa hi fumu ni ndlala ni ntungu. ₁₂La nga ta va ekule u ta fa hi ntungu, la nga ta va ekusuhi u ta wisiwa hi fumu, la nga ta sala u ta lovisiwa hi ndlala. Hi mukhuva lowo ndzi ta hetisa ehenhla ka vona vukari bya mina. ₁₃Kutani mi ta tiva leswaku hi mina Yehovha, loko tinkuveri ta vona ti ta wa exikarhi ka swifaniso swa swikwembu swa vona, ematlhelweni ya tialitari ta vona, ni le henhla ka switsunga hinkwaswo, ni le tinhlohlorhini hinkwato ta tintshava ni le hansi ka mirhi hinkwayo leya matluka, ni le hansi ka mikuhlu hinkwayo laha va gandzelaka kona swikwembu hinkwaswo swa vona hi magandzelo lama nun'hwelaka. ₁₄Ndzi ta va tshambulutela voko ra mina, ndzi onha tiko ra vona, ri ta tlula mananga ya Ribila hi ku biha ka rona, hinkwako laha va tshamaka kona; kutani va ta tiva leswaku hi mina Yehovha.”