EZEKIELE 40

₁Lembe ra makume mambirhi na ntlhanu ra ku khomiwa ka hina, eku sunguleni ka lembe, hi siku ra khume ra n'hweti, ku hele malembe ya khume na mune, muti wu onhiwile ha rona siku rolero, voko ra Yehovha ri va eka mina, a ndzi yisa etikweni ra Israele. ₂A ndzi yisa kona hi milorho ya mahlori ya Xikwembu, kutani a ndzi veka entshaveni leyo leha ngopfu, ehenhla ka yona a ku ri ni xilo lexi fanaka ni muti hitlhelo ra dzonga. ₃Loko a ndzi yisile kona, ndzi vona wanuna yeloyi ku vonakala ka yena ku fanaka ni ku vonakala ka koporo; a tamele pindza ra ntsembyana evokweni ra yena, ni nhonga ya ku pima, a yimile enyangweni. ₄Kutani wanuna yeloyi a ku eka mina: “N'wana wa munhu, languta hi mahlo ya wena, u yingisela hi tindleve ta wena, u xiya hinkwaswo leswi ndzi nga ta ku byela swona; hikuva loko u tisiwile haleno, hileswaku ndzi ku komba swona, u ta byela yindlu ya Israele hinkwaswo leswi u swi voneke.”

₅Kutani ndzi vona rihlampfu leri tingeke yindlu hi le handle. Evokweni ra yena munhu yeloyi a a ri ni nhonga ya ku pima, ya swisungunhu swa ntlhanu na xin'we, xisungunhu xin'wana ni xin'wana xi ringana xisungunhu xin'we ni xandla, kutani a pima ku anama ka vuako; a ku ri ka nhonga yin'we. ₆Kutani a ta enyangweni ya tlhelo ra vuxa, a tlhandluka hi xitlhandluko xa yona, a pima vukhandziyo bya nyangwa byi va nhonga yin'we; vukhandziyo lebyo byo sungula byi va nhonga yin'we eku anameni.

₇Kamara yin'wana ni yin'wana ya valanguteri, ku leha ka yona yi va nhonga yin'we, ni ku anama, ku ri ka nhonga yin'we. Exikarhi ka makamara a ku ri ni xivandla xa swisungunhu swa ntlhanu. Kutani vukhandziyo bya nyangwa, tlhelo ra rikupakupa ra nyangwa, ku lavana ni yindlu, a byi ringana nhonga yin'we. ₈A pima rikupakupa ra nyangwa ku lavana ni yindlu, ku va ku leha ka nhonga yin'we. ₉Kutani a pima ku kula ka rikupakupa ra nyangwa, swi va swisungunhu swa ntlhanu na swinharhu; ni timhandze ta rona ti va ta swisungunhu swimbirhi Rikupakupa ra nyangwa a ri lavana ni yindlu. ₁₀Loko ya ri makamara ya valanguteri va nyangwa, hitlhelo ra vuxa, manharhu a ma ri haleno manharhu man'wana hala; manharhu a ma ri ya mpimo wun'we, ni timhandze a ti ri ta mpimo wun'we, na tona, tlhelo ra haleno ni halahaya. ₁₁Kutani a pima ku anama ka nyangwa; swi ri swisungunhu swa khume; ku leha ka nyangwa swi ri swisungunhu swa khume na swinharhu. ₁₂Emahlweni ka makamara ya valanguteri a ku ri ni xisirhelelo xa xisungunhu xin'we halahaya, ni xisungunhu xin'we haleno; loko yi ri kamara yin'wana ni yin'wana ya valanguteri, yi ri ya swisungunhu swa ntlhanu na xin'we haleno, ni swisungunhu swa ntlhanu na xin'we halahaya. ₁₃Kutani a pima nyangwa, ku suka emafulelweni ya kamara ya valanguteri, ku yisa emafulelweni ya yin'wana, ku nga ku anama ka swisungunhu swa makume mambirhi na ntlhanu, ku suka enyangweni yin'wana ku ya fika eka yin'wana. ₁₄Kambe a hlayela timhandze swisungunhu swa ntlhanu wa makume na khume rin'we; ekusuhi ni timhandze, a ku ri ni rivala ri rhendzele nyangwa exikarhi hi matlhelo hinkwawo. ₁₅Ku suka enyangweni yo rhanga ku fika erikupakupeni ra nyangwa ya le xikarhi, a ku ri ni xivandla xa swisungunhu swa ntlhanu wa makume. ₁₆Emakamareni ya valanguteri a ku ri ni mafasitere lama hambanyisiweke hi tinsimbhi, ma yimile etimhandzeni ta kona, ma rhendzele ni ku languta endzeni hi matlhelo hinkwawo ya nyangwa; hi sweswo ni le rikupakupeni; kwalaho mafasitere walawo a ma ri matlhelo hinkwawo, a ma langutele endzeni; kutani timhandze a ti ri ni swifaniso swa mahanga.

₁₇Kutani a ndzi yisa exivaveni xa le handle, laha ingi ku ri ni makamara, ndzi vona ni maribye yo andlariwa, ma andlariwile erivaleni hi matlhelo hinkwawo; a ku ri ni makamara ya makume manharhu lama ngi ma xaxamerile ni maribye walawo. ₁₈Maribye lawa a ma ri ematsheveni ya tinyangwa, a ma fana ni tinyangwa hi ku leha; walawo a ma ri maribye ya hansi. ₁₉Kutani a pima ku anama, ku suka enyangweni ya le hansi, ku fika exivaveni xa rivala ra le xikarhi, swi ri swisungunhu swa dzana hitlhelo ra vuxa ni ra n'walungu.

₂₀Loko yi ri nyangwa leyi langutaka tlhelo ra n'walungu eka xivava xa le handle, a pima ku leha ka yona ni ku anama ka yona. ₂₁(Makamara ya kona ya valanguteri, ya ri manharhu haleno, kambe ya ri manharhu halahaya, ni timhandze ta kona, ni rikupakupa ra kona a swi ri ni mpimo wun'we ni wa nyangwa yo rhanga): Ku leha ka yona a swi ri swisungunhu swa ntlhanu wa makume, ni ku anama ka yona, swisungunhu swa makume mambirhi na ntlhanu; ₂₂mafasitere ya kona, ni rikupakupa ra kona, ni mahanga ya kona, a swi fana ni mpimo wa leswi nga enyangweni ya le vuxeni. A ku khandziyiwa kona hi swikhandziyo swa ntlhanu na swimbirhi. Rikupakupa, rona, a ri lavene ni swikhandziyo. ₂₃Erivaleni ra le xikarhi, na kona, a ku ri ni tinyangwa leti lavanaka ni nyangwa ya n'walungu ni ya vuxa, kutani a pima xivandla ku suka enyangweni yin'wana ku fika enyangweni yin'wana, swi ri swisungunhu swa dzana.

₂₄Kutani a ndzi fambisa etlhelo ra dzonga ndzi vona nyangwa ya dzonga. A pima timhandze ta kona ni rikupakupa ra kona, a swi ri ni mipimo leyi ringanaka. ₂₅(Nyangwa yoleyo ni rikupakupa ra yona a swi ri ni mafasitere hi matlhelo hinkwawo, a ma fana ni ya tinyangwa tin'wana): swisungunhu swa ntlhanu wa makume ku leha, ni makume mambirhi ku anama. ₂₆A va khandziya kona hi swikhandziyo swa ntlhanu na swimbirhi; emahlweni ka swona a ku ri ni rikupakupa ra nyangwa, a ku ri ni mahanga hi matlhelo mambirhi eka timhandze ta kona. ₂₇Kambe nyangwa yin'wana a yi ri kona erivaleni ra le xikarhi hitlhelo ra le dzongeni; a pima xivandla ku suka enyangweni yin'wana ku fika enyangweni yin'wana hitlhelo ra dzonga, wu ri mpimo wa dzana ra swisungunhu.

₂₈Kutani a ndzi yisa erivaleni ra le xikarhi, hi nyangwa ya dzonga, a pima nyangwa ya dzonga yi ri mipimo yoleyo na yona. ₂₉(Makamara ya yona ni timhandze ta kona, ni rikupakupa ra kona a swi ri ni mpimo wolowo; nyangwa yoleyo ni rikupakupa a swi ri ni mafasitere hi matlhelo hinkwawo): Ku leha a ku ri kantlhanu wa makume ya swisungunhu ku anama ku ri ka makume mambirhi na ntlhanu. ₃₀A ku ri ni rikupakupa hinkwako, ku leha ka rona a swi ri swisungunhu swa makume mambirhi na ntlhanu; ku anama, a swi ri swa ntlhanu. ₃₁Rikupakupa a ri languta tlhelo ra rivala ra le handle; mahanga a ma ri kona etimhandzeni ta kona; a va tlhandluka kona hi swikhandziyo swa ntlhanu na swinharhu.

₃₂Kutani a ndzi yisa erivaleni ra le xikarhi, hitlhelo ra vuxa, a pima nyangwa yi ri ni mipimo yoleyo. ₃₃(Makamara ya kona, ni timhandze ta kona, ni rikupakupa ra kona a swi ri ni mipimo min'we, nyangwa yoleyo ni rikupakupa ra kona a swi ri ni mafasitere hinkwako): Ku leha a ku ri kantlhanu wa makume ya swisungunhu, ni ku anama ka makume mambirhi na ntlhanu. ₃₄Rikupakupa a ri hlangana ni rivala ra le handle; mahanga a ma ri kona etimhandzeni ta kona; a va khandziya kona hi swikhandziyo swa ntlhanu na swinharhu.

₃₅Kutani a ndzi fambisa enyangweni ya n'walungu, a yi pima yi ri ni mipimo yoleyo; ₃₆(emakamareni ya kona, ni le timhandzeni ta kona, ni le rikupakupeni ra kona, mafasitere a ma ri kona hi matlhelo hinkwawo): Ku leha a ku ri kantlhanu wa makume ya swisungunhu, ni ku anama, makume mambirhi na ntlhanu. ₃₇Timhandze ta kona a ti hlangana ni rivala ra le handle; mahanga a ma ri kona etimhandzeni hi matlhelo mambirhi; a va khandziya hi swikhandziyo swa ntlhanu na swinharhu.

₃₈Kamara a yi ri kona leyi nga ni nyangwa ya yona ekusuhi ni timhandze ta tinyangwa; hilaha ingi va hlantswa timhamba kona. ₃₉Erikupakupeni ra nyangwa a ku ri ni matafula mambirhi haleno, ni matafula mambirhi hala; a va tlhavela eka wona timhamba ta tiholokosta ni ta magandzelo ya swidyoho ni ya milandzu. ₄₀Kutani hitlhelo ra le handle, tlhelo ra n'walungu laha va nghenaka enyangweni, a ku ri ni matafula mambirhi; na kona tlhelo rin'wana ekusuhi ni rikupakupa ra nyangwa a ku ri ni matafula mambirhi. ₄₁Loko swi ri tano a ku ri ni matafula ya mune haleno, ni matafula ya mune hala, ematlhelweni ya nyangwa; hinkwawo ma ri matafula ya ntlhanu na manharhu ya magandzelo. ₄₂Kambe a ku ri ni matafula ya mune ya tiholokosta, ma ri ya maribye lama vatliweke, ku leha ka wona a xi ri xisungunhu xin'we ni hafu, ni ku anama, xisungunhu xin'we ni hafu, ni ku tlakuka, xisungunhu xin'we, laha ku vekiwaka ehenhla ka wona mitirho ya ku tlhavela tiholokosta ni timhamba tin'wanyana. ₄₃Swikhweketana leswi leheke ku kota ku anama ka xandla a swi beriwile ekhumbini ra yindlu ematlhelweni hinkwawo; ematafuleni a ku vekiwa tinyama ta magandzelo.

₄₄Ehandle ka nyangwa ya le ndzeni a ku ri ni makamara ya vayimbeleri, erivaleni ra le xikarhi ku lavana ni nyangwa ya n'walungu, a ti languta tlhelo ra dzonga. Man'wana makamara a ma ri ekusuhi ni nyangwa ya le vuxeni, ma languta n'walungu. ₄₅Kutani a ku eka mina: “Makamara lawa langutaka tlhelo ra dzonga, i ya vaprista lava tirhelaka swa yindlu. ₄₆Makamara lawa langutaka tlhelo ra n'walungu, i ya vaprista lava tirhelaka swa alitari: i vana va Sadoki, va nga vona exikarhi ka vana va Levhi, lava tshinelelaka Yehovha ku n'wi tirhela.”

₄₇A pima rivala leri ngi ri ringana ematsheveni hinkwawo ya rona, a ri ri ni ku leha ka dzana ra swisungunhu ni ku anama ka dzana. Alitari a yi ri emahlweni ka yindlu.

₄₈Kutani a ndzi nghenisa erikupakupeni ra yindlu; a pima mhandze ya rikupakupa: a kuma ntlhanu wa swisungunhu haleno ni ntlhanu hala; a pima ku anama ka nyangwa, a kuma swisungunhu swinharhu haleno, ni hala swinharhu. ₄₉Ku leha ka rikupakupa swi va swisungunhu swa makume mambirhi ni ku anama ku va khume na xin'we; a va khandziya kona hi swikhandziyo; a ku ri ni timhandze kona ekusuhi ni marimba yin'wana ya haleno, ni ya hala.