EKSODA 9

₁Kwalaho Yehovha a ku eka Muxe: “Yana eka Faro, u ku eka yena: Yehovha, Xikwembu xa Vaheveru, xi te: ‘Tshunxa tiko ra mina, ri ya ndzi tirhela. ₂Hikuva loko u ala ku ri tshunxa, u ri sivela kambe, ₃voko ra Yehovha ri ta va ehenhla ka mitlhambi ya wena leyi nga enhoveni, ni le henhla ka tihanci, ni le henhla ka timbhongolo, ni le henhla ka tikamela, ni le henhla ka tihomu, ni le henhla ka tinyimpfu, wu ta va ntungu lowukulu. ₄Kambe Yehovha u ta hlawula swifuwo swa Vaisraele exikarhi ka swifuwo swa Vaegipta, ku nga ka ku nga fi nchumu eka swilo hinkwaswo swa vana va Israele.’ ” ₅Yehovha u vekile nkarhi a ku: “Mundzuku Yehovha u ta endla mhaka leyi etikweni leri.”

₆Kutani ku sungula nimixo, Yehovha a endlisa sweswo. Swifuwo hinkwaswo swa Vaegipta swi fa; kambe a ku fanga nchumu emitlhambini ya vana va Israele. ₇Faro a vutisa leswi humeleleke, kutani a ku nga fanga ni xifuwo xin'we emitlhambini ya vana va Israele. Kambe mbilu ya Faro yi nonon'hwa, kutani a nga tshunxangi tiko.

₈Kutani Yehovha a ku eka Muxe na Aroni: “Tekani nkuma exitikweni xa mufuri, mi tata mavoko, kutani Muxe a ta wu tsutsuxa ehenhla emahlweni ka Faro; ₉wu ta hundzuka ntshuri lowu nga ta funengeta tiko hinkwaro ra Egipta, wu humesa matshumba lama endlaka swilondza eka vanhu ni le ka swifuwo etikweni hinkwaro ra Egipta.” ₁₀Kutani va teka nkuma exitikweni xa mufuri va ya emahlweni ka Faro; kuteloko Muxe a wu tsutsuxile henhla, wu humesa matshumba lama endlaka swilondza eka vanhu ni le ka swifuwo. ₁₁Kutani tin'anga ti tsandzeka ku endlisa sweswo emahlweni ka Muxe hikwalaho ka matshumba, hikuva tin'anga ta Vaegipta a ti ri ni matshumba swin'we ni Vaegipta hinkwavo. ₁₂Kambe Yehovha a nonon'hwisa mbilu ya Faro, a nga yingisanga Muxe na Aroni, hilaha Yehovha a nga byela Muxe hakona.

₁₃Yehovha a ku eka Muxe: “U ta pfuka wa ha ri mixo, u ya emahlweni ka Faro, u ku eka yena: Yehovha, Xikwembu xa Vaheveru xi te: ‘Tshunxa tiko ra mina ri ya ndzi tirhela. ₁₄Hikuva sweswi ndzi ta rhumela embilwini ya wena makhombo hinkwawo, ni le henhla ka malandza ya wena, ni le tikweni ra wena, u ta tiva leswaku a ku na un'wana la fanaka na mina emisaveni hinkwayo. ₁₅Hikuva loko a ndzi tlakusile voko ra mina, ndzi ku ba hi ntungu, wena ni tiko ra wena, i ngi u lovile emisaveni. ₁₆Kambe ndzi ku tshikile hikwalaho leswaku u vona matimba ya mina, ni leswaku vito ra mina ri twakala emisaveni hinkwayo. ₁₇Loko u tikurisa ehenhla ka tiko ra mina, u engeta u ala ku ri tshunxa, ₁₈nimixo, hi nkarhi wolowo, ndzi ta nisa xihangu lexikulu ngopfu, lexi mi nga tshamiki mi xi vona etikweni ra Egipta, ka ha ri mpfhuka ri tumbuluka ku fikela sweswi. ₁₉Sweswi, rhuma u vuyisela swifuwo ni swilo hinkwaswo swa wena leswi nga enhoveni. Xihangu xi ta wela vanhu hinkwavo ni swifuwo hinkwaswo leswi nga ta kumiwa enhoveni, leswi nga ka swi nga pfaleriwi etindlwini, kutani swi ta fa.’ ” ₂₀Lava yingiseke ku lerisa ka Yehovha exikarhi ka malandza ya Faro, va tsutsumisa malandza ya vona ni swifuwo swa vona etindlwini. ₂₁Kambe lava nga xiyangiki rito ra Yehovha, va tshike malandza ya vona ni swifuwo swa vona enhoveni.

₂₂Kutani Yehovha a ku eka Muxe: “Tlakusa voko ra wena ehenhla, xihangu xi wa etikweni hinkwaro ra Egipta, xi wela vanhu ni swifuwo, ni byanyi hinkwabyo bya tiko.” ₂₃Kavaloko Muxe a yimisa nhonga ya yena ehenhla, kutani Yehovha a pfumisa tilo a nisa ni xihangu, ni ndzilo a wu pfurha emisaveni; Yehovha a nisa xihangu etikweni ra Egipta. ₂₄Xihangu xi va kona, ni ndzilo lowu pfanganeke ni xihangu, kutani a xi ri lexikulu ngopfu, lexi nga sike voniwaka etikweni hinkwaro ra Egipta, ka ha ri mpfhuka tiko ri tumbuluka. ₂₅Xihangu xi be tiko hinkwaro ra Egipta, ni hinkwaswo leswi nga enhoveni, vanhu ni swifuwo, ni byanyi hinkwabyo bya tiko; ku tshoveka ni mirhi hinkwayo ya tiko. ₂₆Xihangu a xi nga ri kona etikweni ra Goxeni ntsena, laha i ngi vana va Israele va ri kona.

₂₇Kutani Faro a vitana Muxe na Aroni, a ku eka vona: “Sweswi, ndzi dyohile; i Yehovha la lulameke; mina ni tiko ra mina hi vadyohi. ₂₈Khongelani Yehovha leswaku ku nga tshuki ku va ni ku pfuma ni xihangu, kutani ndzi ta mi tshunxa mi famba, mi nga ha siveriwi.”

₂₉Muxe a ku eka yena: “Kutakuloko ndzi huma emutini, ndzi ta tlakusa mavoko ya mina eka Yehovha, kutani ku pfuma ku ta miyela, xihangu na xona xi ta hela, u ta tiva leswaku misava i ya Yehovha. ₃₀Kambe loko u ri wena ni malandza ya wena, ndza swi tiva leswaku a mi nga chavi Xikwembu.”

₃₁Ntsembyana ni barley swi onhaka, hikuva barley a yi rhumbukile ni ntsembyana a wu balekile swiluva. ₃₂Koro ni swifake a swi biwanga, hikuva swi hlwele ku mila.

₃₃Kutani Muxe a suka eka Faro, a huma emutini, kuteloko a tlakuse mavoko ya yena eka Yehovha, ku pfuma ni xihangu swi hela, ni mpfula yi xa emisaveni. ₃₄Kambe Faro, kuteloko a vonile leswaku mpfula ni xihangu ni ku pfuma swi miyele, a engeta a dyoha, a ti nonon'hwisa mbilu, yena ni malandza ya yena. ₃₅Mbilu ya Faro yi nonon'hwa, a ala ku tshunxa vana va Israele, hilaha Yehovha a nga vula hi nomu wa Muxe.