EKSODA 34

₁Kutani Yehovha a ku eka Muxe: “Vatla maribye mambirhi lama fanaka ni lawo rhanga, kutani ndzi ta tsala emaribyeni lawa marito lama ngi ma ri emaribyeni yo sungula lawa u ma fayeke. ₂U tilunghisa nimixo, kutani u tlhandlukela entshaveni ya Sinayi, u ta yima kona emahlweni ka mina, enhlohlorhini ya ntshava. ₃Munhu a nga tshuki a khandziya na wena; ku nga tshuki ku vonaka munhu entshaveni, swi tsandza ni tinyimpfu ni tihomu, ti nga tshuki ti dya ekusuhi ni ntshava leyi.” ₄Muxe a vatla maribye mambirhi lama fanaka ni layo rhanga, a pfuka wa ha ri mpundzu, a khandziya ntshava ya Sinayi, hilaha Yehovha a nga n'wi lerisa hakona, a khomile maribye mambirhi emavokweni ya yena. ₅Kutani Yehovha a xikela epapeni, a yima kona ekusuhi na yena, a vula vito ra Yehovha. ₆Kutani Yehovha a hundza emahlweni ka yena, a ku: “Yehovha, Yehovha, Xikwembu xa tintswalo ni vunene, lexi hlwelaka ku kariha, lexi teleke tintswalo ni ku tshembeka, ₇lexi tsetselelaka tinxaka ta madzana ya khume, lexi khomelaka munhu ku homboloka ni ku dyoha, ni xivi; kambe lexi nga landzuriki nandzu wa loyi a nga na wona; lexi baka vana ni vatukulu ku yisa erixakeni ra vunharhu, ni ra vumune hikwalaho ka ku dyoha ka vatata wa vona.” ₈Kutani Muxe a hatlisa a khinsama ehansi, a ku: ₉“Hosi, loko kunene ndzi vonile tintswalo ta wena, Hosi a yi fambe na hina, hikuva kunene i tiko ra tinhamu leto nonon'hwa, kambe u hi khomela ku dyoha ka hina, ni ku homboloka ka hina, kutani u hi fuwa, hi va ndzhaka ya wena.”

₁₀Yehovha a hlamula, a ku: “Waswivo, ndzi endla ntwanano. Ndzi ta endla emahlweni ka tiko hinkwaro masingita lama nga siki endliwaka emisaveni hinkwayo, hambi ku ri etikweni rihi ni rihi, kutani tiko hinkwaro leri u nga exikarhi ka rona, ri ta vona ntirho wa Yehovha; hikuva lexi ndzi nga ta xi endla ha wena, xi ta va xilo lexi chavisaka.

₁₁“Hlayisa lexi ndzi ku lerisaka xona namuntlha. Ndzi ta hlongola emahlweni ka wena, Vaamori, ni Vakanana ni Vahiti, ni Vaperesi, ni Vahivhi, ni Vayebusi. ₁₂Chava ku endla ntwanano ni lava akeke etikweni leri u nga ta fika eka rona, va nga ti tshuka va hundzuka ntlhamu exikarhi ka wena. ₁₃Kambe mi ta hlanhla tialitari ta vona, mi faya swifaniso swa vona, mi susa tiAxera.

₁₄“U nga ka u nga khinsameli xikwembu xin'wana, hikuva Yehovha u vuriwa la lavetaka; i Xikwembu xa rilondzo. ₁₅U nga tshuki u endla ntwanano ni vaaki va tiko lero, leswaku loko va oswa ni swikwembu swa vona, ni loko va tlhavela swikwembu swa vona, va ku vitana ku ya dya nyama ya magandzelo ya vona; ₁₆kutani u vutela vana va wena vanhwanyana va vona, kutani vanhwanyana va vona va hambukisa vana va wena, leswaku va landzela swikwembu swa vona.

₁₇“U nga tshuki u tiendla xikwembu lexi chuluriweke.

₁₈“U ta hlayisa nkhuvo wa vuswa lebyo kala comela hilaha ndzi leriseke ha kona. U ta dya vuswa lebyo kala comela hi masiku ya ntlhanu na mambirhi, enkarhini wa swona, en'hwetini ya Abibi, hikuva en'hwetini ya Abibi, u humile eEgipta.

₁₉“Mativula hinkwawo i ya mina hambi ma ri mativula hinkwawo ya xinuna ya tihomu, ni ya tinyimpfu ta mitlhambi hinkwayo ya wena. ₂₀U ta kutsula mativula ya mbhongolo hi xinyimpfana; loko u nga ri kutsuli, u ta ri tshova nhamu. U ta kutsula mativula hinkwawo ya vana va wena.

“U nga tshuki u humelela emahlweni ka mina u nga tamelanga nchumu.

₂₁“U ta tirha hi masiku ya ntlhanu na rin'we, kutani u wisa hi siku ra ntlhanu na mambirhi; u ta wisisa sweswo, hambi ku ri loko ku rimiwa, hambiloko ku tshoveriwa.

₂₂“U ta endla nkhuvo wa mavhiki, lowu nge wa swirhangana swa ku tshovela koro, ni nkhuvo wa ku tleketlela, loko lembe ri hundzile.

₂₃“Vavanuna hinkwavo exikarhi ka n'wina, va ta humelela kanharhu hi lembe emahlweni ka Hosi Yehovha, Xikwembu xa Israele; ₂₄hikuva ndzi ta hlongola matiko emahlweni ka wena, ndzi engetelela mindzilekana ya wena; a ku na munhu la nga ta navela tiko ra rikwenu, loko u ya humelela kanharhu hi lembe emahlweni ka Yehovha, Xikwembu xa wena.

₂₅“U nga tshuki u humesa ngati ya magandzelo ya mina yi ri ni vuswa lebyi nga ni comela. Gandzelo ra nkhuvo wa Paseka ri nga tshuki ri sala ri hundza vusiku ku fika nimixo.

₂₆“U ta tisa endlwini ya Yehovha Xikwembu xa wena, swirhangana swa ku sungula swa masimu ya wena.

“U nga tshuki u sweka ximbutana hi ntswamba wa mana wa xona.”

₂₇Yehovha a engeta, a ku eka Muxe: “Tsala marito lawa, hikuva ndzi endlile ntwanano na wena na Israele hi marito lawa.” ₂₈Muxe a tshama na Yehovha hi masiku ya mune wa makume, ni vusiku bya mune wa makume, a nga dyi vuswa, a nga nwi mati; kutani Yehovha a tsala emaribyeni marito ya ntwanano, ma nge marito ya khume.

₂₉Kutani kuteloko Muxe a rhelele entshaveni ya Sinayi a ri ni maribye mambirhi ya vumbhoni evokweni ra yena, kambe Muxe a a nga tivi leswaku nhlonge ya mombo wa yena a yi hatima, loko a ri karhi a vulavula na Yehovha; ₃₀kutani Aroni ni vana va Israele hinkwavo, loko va languta Muxe va vona nhlonge ya mombo wa yena yi hatima, kutani va chava ku n'wi tshinelela. ₃₁Kavaloko Muxe a va vitana, kutani Aroni ni tihosana hinkwato ta nhlengeletano va ta eka yena, kutani Muxe a vulavula na vona. ₃₂Endzhaku ka swona, vana va Israele hinkwavo va tshinelela, kutani a va lerisa timhaka hinkwato leti Yehovha a n'wi byeleke tona entshaveni ya Sinayi. ₃₃Kuteloko Muxe a hetile ku vulavula na vona, a tifunengeta mombo hi nguvu. ₃₄Kutani loko Muxe a nghena emahlweni ka Yehovha ku vulavula na yena, a susa nguvu a ko a huma; kuteloko a humile, a byela vana va Israele leswi a swi lerisiweke. ₃₅Vana va Israele va vone leswaku mombo wa Muxe wa hatima, kutani Muxe a tlhela a tifunengeta mombo, a ko a tlhela a nghena ku ya vulavula na Yehovha.