1Yehovha a vulavula kambe na Muxe, a ku: 2“Waswivo ndzi vitanile hi vito ra yena Besalele, n'wana Uri, n'wana Huru, wa rixaka ra Yuda; 3ndzi n'wi chelele moya wa Xikwembu, ni vutlhari, ni ku tiva mitirho ya tinxakaxaka, 4ku endla swilo leswi nga tiviwiki hi munhu, ku tirha nsuku, ni silivhere, ni koporo, 5ku tsala emaribyeni lama nghenisiwaka eswifukwaneni, ni ku vatla mirhi, ni ku tirha mitirho ya tinxakaxaka. 6Kutani waswivo, ndzi vekile Oholiyabu, n'wana Ahisamaki, wa rixaka ra Dani, leswaku a va mupfuni wa yena; kambe ndzi nghenisile vutlhari etimbilwini ta lavo tlhariha leswaku va tirha hinkwaswo leswi ndzi ku leriseke swona: 7Yindlu ya nhlengeletano, ni areka ya vumbhoni, ni vukhongelelo lebyi nga ehenhla ka yona, ni mitirho hinkwayo ya Tabernakela, 8ni tafula ni mitirho ya rona, ni kandelari ya nsuku lowo saseka, ni mitirho ya yona, ni alitari ya mirhi ya risuna, 9ni alitari ya magandzelo layo hisiwa, ni mitirho hinkwayo ya yona, ni nkamba ni ntshako la wona, 10ni tinguvu ta ntirho, ni tinguvu leti hlawuriweke ta muprista Aroni, ni tinguvu ta vana va yena ta vuprista, 11ni mafurha ya ku tola, ni mirhi ya risuna ya vukwetsimelo. Va ta endla hinkwaswo hilaha ndzi ku leriseke hakona.”
12Yehovha a vulavula na Muxe, a ku: 13“Byela vana va Israele, u ku: ‘Mi ta hlayisa Tisavata ta mina; hikuva i xikombiso xa n'wina na mina etinxakeni ta n'wina, mi ta ti va leswaku hi mina Yehovha la mi hlawulaka. 14Mi ta hlayisa Savata, hikuva eka n'wina i siku leri hlawuriweke. Loyi a nga ri hlayisiki u ta dlawa; hikuva kungakuloko un'wana a tirha ntirho hi siku lero, u ta humesiwa exikarhi ka varikwavo. 15Ku ta tirhiwa hi masiku ya ntlhanu na rin'we, kutani ra ntlhanu na mambirhi ri ta va ra Savata, ra ku wisa, leri hlawuleriweke Yehovha. Mani na mani la tirhaka hi siku ra ku wisa, u ta dlawa. 16Vana va Israele va ta hlayisa Savata, va ri hlawula etinxakeni hinkwato ta vona, wu va ntwanano wa masiku hinkwawo. 17I xikombiso lexi nga heriki xikarhi ka mina ni vana va Israele, hikuva hi masiku ya ntlhanu na rin'we, Yehovha u endlile matilo ni misava, kutani hi siku ra ntlhanu na mambirhi u tshike ntirho, a wisa.’ ”
