Ta xihlahla lexi pfurhaka; ta ku vitaniwa ka Muxe.
1Muxe a a ri murisi wa tinyimpfu ta Yetro, mukon'wana wa yena, muprista wa Midiyani; kutani a yisa ntlhambi etlhelo ra mananga, a fika entshaveni ya Xikwembu, eHorebe. 2Ntsumi ya Yehovha yi humelela eka yena emalangavini ya ndzilo, exikarhi ka xihlahla; kuteloko Muxe a langutile, a vona xihlahla xi pfurha hi ndzilo, kambe xihlahla xi nga heli. 3Muxe a ku: “Ndza ha hambuka, ndzi ya vona masingita lamakulu lawa, xihlahla xi nga heli ha yini hi ku tshwa.”
4Yehovha a vona leswaku u hambukele ku ta languta, Xikwembu xi n'wi vitana xi ri exikarhi ka xihlahla, xi ku: “Muxe, Muxe!”
Yena a ku: “Hi mina loyi.”
5Xikwembu xi ku: “U nga tshuki u tshinela la; susa tintanghu emilengeni ya wena, hikuva xivandla lexi u yimeka eka xona i misava leyo kwetsima.” 6Xi engeta xi ku: “Hi mina Xikwembu xa tata wa wena, Xikwembu xa Abrahama, ni Xikwembu xa Isaka, ni Xikwembu xa Yakobo.” Kavaloko Muxe a funengeta mombo wa yena, hikuva a a chava ku languta Xikwembu.
7Kutani Yehovha a ku: “Ndzi vonisisile ku xaniseka ka tiko ra mina eEgipta, ndzi yingisile ku rila ka vona hikwalaho ka lava va va xanisaka; hikuva ndzi tiva nhlomulo wa vona; 8ndzi xikele ku ta va kutsula emavokweni ya Vaegipta, ni ku va humesa etikweni lero, ndzi va yisa etikweni lerikulu, lero saseka, etikweni ra ntswamba ni vulombe, evutshan'weni bya Vakanana, ni Vahiti, ni Vaamori, ni Vaperesi, ni Vahivhi, ni Vayebusi. 9Sweswi, ku huwelela ka vana va Israele ku fikile eka mina; ndzi ku vonisisile ku xaniseka loku Vaegipta va va xanisaka hakona. 10Sweswi, famba, ndza ku rhuma eka Faro, u ya humesa eEgipta tiko ra mina, vana va Israele.”
11Muxe a ku eka Xikwembu: “Ndzi mani mina, ku ya eka Faro, ndzi ya humesa vana va Israele eEgipta?”
12Xikwembu xi ku: “Ndzi ta va na wena. Xikombiso xa leswaku hi mina la ku rhumaka, hi lexi: kutakuloko u humesile tiko ra mina eEgipta, mi ta tirhela Xikwembu entshaveni leyi.”
13Kutani Muxe a ku eka Xikwembu: “Waswivo, loko ndzi ta famba eka vana va Israele, ndzi va byela, ndzi ku: ‘Xikwembu xa vatata wa n'wina xi ndzi rhumile eka n'wina,’ vona va ku eka mina: ‘Vito ra xona i mani?’ ndzi ta ku yini eka vona?”
14Xikwembu xi ku eka Muxe: “Hi mina Loyi a nga kona.” Kambe xi ku: “U ta vurisa sweswo eka vana va Israele, u ku: ‘Loyi a nga kona u ndzi rhumile eka n'wina.’ ” 15Xikwembu xi engeta xi ku eka Muxe: “U ta va byela, u ku: ‘Yehovha, Xikwembu xa vatata wa n'wina, Xikwembu xa Abrahama, Xikwembu xa Isaka, Xikwembu xa Yakobo, xi ndzi rhumile eka n'wina.’ Hi rona vito ra mina hilaha ku nga heriki; hi xona xitsundzuxo xa mina etinxakeni ta tinxaka. 16Famba, u ya hlengeleta vakulukumba va Israele, u ku eka vona: ‘Yehovha, Xikwembu xa vatata wa n'wina, Xikwembu xa Abrahama, ni xa Isaka, ni xa Yakobo, xi tikombisile eka mina,’ xi ku: ‘Ndzi mi kambile kunene; ndzi vonile leswi mi endliwaka swona eEgipta,’ 17kutani ndzi ku: ‘Ndzi ta mi kutsula enhlomulweni wa n'wina wa Egipta, ndzi mi akisa etikweni ra Vakanana ni ra Vahiti, ni ra Vaamori, ni ra Vaperesi, ni ra Vahivhi, ni ra Vayebusi, etikweni ra ntswamba ni vulombe.’
18“Va ta yingisa rito ra wena; kutani u ta famba ni vakulukumba va Israele eka hosi ya Egipta, mi ku eka yona: ‘Yehovha, Xikwembu xa Vaheveru, u humelele eka hina; sweswi wanga hi pfumelela ku famba riendzo ra masiku manharhu emananga, hi ta gandzela Yehovha, Xikwembu xa hina hi magandzelo.’ 19Kambe ndza swi tiva leswaku hosi ya Egipta yi nga ka yi nga mi pfumeleri ku famba, hambi mi nga endla hi matimba. 20Kambe ndzi ta tlakusa voko ra mina, ndzi ba Egipta hi masingita hinkwawo lawa ndzi nga ta ma endla kona. Endzhaku ka swona, yi ta mi pfumelela ku famba.
21“Ndzi ta endla leswaku tiko leri ri kuma tintswalo eka Vaegipta; kutani kutakuloko mi famba, mi nga ka mi nga fambi ntsena, 22kambe wansati un'wana ni un'wana u ta kombela eka loyi a akeke na yena, ni le ka loyi a tshameke endlwini ya yena mitirho ya silivhere ni ya nsuku ni tinguvu; mi ta ambexa vana va n'wina ha tona; mi ta phangisa sweswo Vaegipta.”
