Ta ku kwetsimisiwa ka vaprista.
1“Kutakuloko u va hlawula leswaku va endla vuprista emahlweni ka mina, u ta endla hi mukhuva lowo:
2“U ta teka xinkuzana, ni makhuna mambirhi lama nga riki na xivati, ni xinkwa lexi nga riki na comela; ni swinkwanyana leswi kalaka comela leswi pfuviweke hi mafurha; ni swimbundzunyana leswi kalaka comela leswi totiweke hi mafurha; u swi endla hi mapa lama hleriweke ya koro; 3u swi veka exirhundzwini, u swi neha hi xirhundzu, swin'we ni xinkuzana ni makhuna mambirhi. 4Kutani u ta tshineta Aroni ni vana va yena enyangweni ya Tabernakela ya nhlengeletano, u va hlantswa hi mati. 5Kutani u ta teka tinguvu, u ambexa Aroni baji, ni nguvu ya efodi, ni efodi, ni nguvu ya xifuva, u n'wi tsimba hi vamba ra efodi. 6U n'wi vehela ni xihuku enhlokweni, u boha ka xona xiphepherhele xo kwetsima. 7U ta teka mafurha ya ku tola, u n'wi chela enhlokweni u n'wi tota. 8U ta tshineta ni vana va yena, u va ambexa tinguvu. 9Kutani u ta tsimba Aroni ni vana va yena hi mavamba, u va vehela swihuku, kutani vuprista byi ta va bya vona hi masiku hinkwawo; i ku lerisa loku nga heriki. U ta hlawurisa sweswo Aroni ni vana va yena.
10“Kutani u ta tshineta xinkuzana emahlweni ka Tabernakela ya nhlengeletano, kutani Aroni ni vana va yena va ta tlhandleka mavoko enhlokweni ya xona. 11Kutani u ta xi tlhava emahlweni ka Yehovha enyangweni ya Tabernakela ya nhlengeletano. 12Kutani u ta teka ngati ya nkunzi, u yi tota etimhondzweni ta alitari hi ritiho; ngati hinkwayo yin'wana, u yi chela ekusuhi ni alitari. 13U ta teka mafurha hinkwawo lama pambelaka marhumbu ni mpambana wa xivindzi, ni tinswo timbirhi, ni mafurha ya tona, u swi hisa ealitarini. 14Loko yi ri nyama ya nkunzi, ni dzovo ra yona ni swanyi wa yona, u ta swi hisa ehandle ka mixaxa: i gandzelo ra xidyoho.
15“U ta teka khuna rin'wana, Aroni ni vana va yena va ta ri tlhandleka mavoko enhlokweni, 16kutani u ri tlhava, u teka ngati ya rona, u yi chela ematlhelo hinkwawo ya alitari. 17Kutani u ta ri phatlula hi swirho swa rona, u hlantswa marhumbu ya rona ni masondzo ya rona, u swi veka eswirhweni ni le nhlokweni, 18kutani u hisa khuna hinkwaro ealitarini; i gandzelo ra Yehovha leri nun'hwelaka swo nandziha; i gandzelo leri hiseriwaka Yehovha.
19“U ta teka khuna ra vumbirhi, Aroni ni vana va yena va ta tlhandleka mavoko ya vona enhlokweni ya khuna, 20kutani u ri tlhava, u teka ngati yin'wana, u yi tota emakumu ka ndleve ya xinene ya Aroni, ni makumu ka ndleve ya xinene ya vana va yena, ni le nkudzwini ra nenge ra swinene ra vona, ni le nkudzwini ra nenge wa xinene wa vona; ngati yin'wana u yi chela ematlhelweni hinkwawo ya alitari. 21U ta teka ngati leyi nga ealitarini ni mafurha ya ku tola, kutani u ta xuva Aroni ni tinguvu ta yena, ni vana va yena ni tinguvu ta vona; u ta va la hlawuriweke, ni vana va yena, ni tinguvu ta vona.
22“Kutani u ta teka mafurha ya nyimpfu, ni ncila, ni mafurha lama pambelaka marhumbu, ni mpambana wa xivindzi, ni tinswo timbirhi, ni mafurha ya tona, ni voko ra xinene, hikuva i nyimpfu leyi hlawulekeke; 23u ta teka ni ximbundzu, ni xinkwa lexi pfuviweke hi mafurha ni xinkwa lexi nga exirhundzwini xa swilo leswi nga riki na comela, lexi vekiweke emahlweni ka Yehovha. 24U ta veka swilo leswi hinkwaswo eswandleni swa Aroni, ni le swandleni swa vana va yena, u swi ndziwita emahlweni ka Yehovha; 25kutani u swi susa emavokweni ya vona, u swi hisa ealitarini, ehenhla ka gandzelo, swi ta nun'hwela emahlweni ka Yehovha: i magandzelo lama hiseriwaka Yehovha.
26“Kutani u ta teka xifuva xa nyimpfu ya ku hlawuleka ka Aroni u xi ndziwita kukota nyiko leyi ndziwitiweke emahlweni ka Yehovha; ku ta va ku averiwa ka wena. 27Kutani u ta hlawula xifuva lexi ndziwitiweke, ni voko leri tlakusiweke, hileswaku swa nyimpfu ya ku hlawuleka leswi nga ndziwitiwa, ni ku tlakusiwa, leswi nga swa Aroni ni vana va yena; 28swi ta va swa Aroni ni vana va yena hi ku lerisa loku nga heriki exikarhi ka vana va Israele, hikuva i ku nyika loku pamburiweke eka vana va Israele loku va nga ta ku pambulela emagandzelweni ya vona ya ku khensa; i ku nyika ka vona loku pambuleriweke Yehovha.
29“Tinguvu ta Aroni leti hlawuriweke ti ta va ta vana va yena endzhaku ka yena leswaku va ti ambala siku va nga ta hlawuriwa ni ku totiwa. 30N'wana wa yena la nga ta va muprista endzhaku ka yena, la nga ta nghena endlwini ya nhlengeletano ku tirha ntirho evukwetsimelweni, u ta ti ambala hi masiku ya ntlhanu na mambirhi.
31“U ta teka nyama ya nyimpfu ya ku vekiwa, u yi sweka exivandleni lexo kwetsima. 32Kutani Aroni ni vana va yena va ta dya nyama ya nyimpfu, ni vuswa lebyi nga exirhundzwini, enyangweni ya yindlu ya nhlengeletano. 33Va ta dya swilo leswi va gandzeleke ha swona loko va vekiwa, ni loko va hlawuleriwa ntirho. Swi nga tshuki swi dyiwa hi munhu un'wana, hikuva i swilo leswi hlawuriweke. 34Loko ku salela mundzuku nyama yin'wana ya ku hlawuriwa, ni xinkwa xa kona, u ta swi hisa; swi nga tshuki swi dyiwa, hikuva swi hlawuriwile.
35“U ta endlela Aroni ni vana va yena hinkwaswo leswi ndzi ku leriseke swona, Ku vekiwa ka vona ku ta endliwa hi masiku ya ntlhanu na mambirhi. 36Siku rin'wana ni rin'wana u ta tlhava nkunzi ya xivi u endla mhamba ya ku susa xivi ealitarini, u yi tota ku yi hlawulela ntirho. 37Hi masiku ya ntlhanu na mambirhi, u ta endlela alitari mhamba ku yi hlawulekisa; kutani alitari yi ta va xilo lexi hlawulekeke ngopfu; hinkwaswo leswi nga ta khumba alitari swi ta va swi hlawulekile.
Ta gandzelo ra masiku hinkwawo.
38“Leswi u nga ta swi tlhava ealitarini hi leswi: swinyimpfana swimbirhi swa lembe rin'we siku rin'wana ni rin'wana hi malembe hinkwawo. 39Xinyimpfana xin'wana u xi tlhava nimixo, xin'wana u xi tlhava nimadyambu; 40u ta swi humesa ni mpin'wanyana wa mapa lama hleriweke, lama pfuviweke hi hafunyana ya hini ya mafurha yo tenga, ni hafunyana ya hini ya vhinyo: i swa xinyimpfana xo rhanga. 41U ta tlhava xinyimpfana xa vumbirhi nimadyambu, u xi endlela mhamba ni ku xuva kukota xa mixo, ma ta va magandzelo lama hiseriwaka Yehovha, lama nun'hwelaka. 42Ri ta va rona gandzelo ra masiku hinkwawo etinxakeni ta n'wina, leri tisiwaka enyangweni ya yindlu ya nhlengeletano emahlweni ka Yehovha, laha ndzi nga ta hlengeletana na n'wina ku vulavula na n'wina. 43Ndzi ta hlengeletana kona ni vana va Israele, yindlu leyi yi ta endliwa leyi hlawuriweke hi ku vonakala ka mina; 44ndzi ta hlawula yindlu ya nhlengeletano ni alitari; ndzi ta hlawula Aroni ni vana va yena leswaku va ndzi tirhela entirhweni wa vuprista; 45ndzi ta aka exikarhi ka vana va Israele, ndzi va Xikwembu xa vona; 46va ta tiva leswaku hi mina Yehovha, Xikwembu xa vona lexi va humeseke etikweni ra Egipta, leswaku ndzi aka exikarhi ka vona. Hi mina Yehovha Xikwembu xa vona.”
