DEUTERONOMA 33

₂“Yehovha u hume Sinayi,

U va tsuvukele a ri Seyira;

U vonakile a ri entshaveni ya Parani,

U suke exikarhi ka mavandla layo kwetsima.

Evokweni ra xinene ra yena, ndzilo wa nawu wu va humelele.

₃Kunene, wa rhandza matiko;

Vahlawuriwa va yena hinkwavo va le vokweni ra yena;

Vona va tshama emilengeni ya wena,

Va amukela marito ya wena.

₄Muxe u hi lerisile nawu,

Yi nga ndzhaka ya nhlengeletano ya Yakobo.

₅A a ri hosi ya Yexuruni (Israele).

Siku tihosi ta tiko ti hlengeletene

Ni tinyimba ta Israele.

₆“A ku hanye Rhuveni; a nga tshuki a fa,

Ni vanhu va yena va ve lavo tala!”

₇Ku katekisa Yuda, a ku:

“Oho Yehovha, yingisa rito ra Yuda,

U n'wi vuyisa etikweni ra yena.

Mavoko ya yena a ma ve ni matimba,

U ve mupfuni wa yena ku n'wi kutsula eka valala va yena!”

₈Eka Levhi, a ku:

“Mathumimi ni Maurimi ya wena a ma vekiwe ka muhlawuriwa wa wena,

Loyi u n'wi ringeke Masa,

Loyi u n'wi tengiseke ematini ya Meriba,

₉La nga te henhla ka tata wa yena ni mana wa yena:

A ndzi va vonanga!

La nga tivangiki vamakwavo,

La nga tiviki vana va yena,

Hikuva va hlayisa rito ra wena,

Va chivirikela ntwanano wa wena,

₁₀Va dyondzisa ku lerisa ka wena eka Yakobo,

Ni nawu wa wena eka Israele.

Va vekela mirhi ya risuna etinhompfini ta wena,

Ni holokosta ealitarini ya wena.

₁₁Oho! Yehovha, katekisa matimba ya yena,

U amukela ntirho wa mavoko ya yena.

Tshova nhlana wa valala va yena, ni wa lava n'wi vengaka

Leswaku va nga ha pfuki.”

₁₂Eka Benjamini, a ku:

“I murhandziwa wa Yehovha,

U ta aka hi ku tshemba kusuhi na yena;

Yehovha u ta n'wi funengeta hi masiku,

U ta tshama emakatleni ya yena.”

₁₃Eka Yosefa, a ku:

“Tiko ra yena ri ta katekisiwa i Yehovha

Hi leswo saseka swa le tilweni, yi ri mberha,

Ni swa le xidziveni lexi nga ehansi,

₁₄Ni mihandzu yo nandziha ya dyambu,

Ni mihandzu yo nandziha ya tin'hweti,

₁₅Ni mihandzu yo nandziha ya tintshava ta khale,

Ni mihandzu yo nandziha ya mitsunga leyi nga heriki,

₁₆Ni mihandzu yo nandziha ya misava,

ni ya ndzalo ya yona.

Tintswalo ta Loyi a humeleleke exihlahleni

A ti tshame enhlokweni ya Yosefa,

Emombyeni wa hosi ya vamakwavo!

₁₇Nkunzi ya yena ya mativula i ku kwetsima ka yena,

Timhondzo ta yona i timhondzo

ta nyarhi;

U ta tlhava ha tona matiko hinkwawo swin'we,

Ku ya fika emakun'wini ya misava.

Hi byona vunyingi bya Efrayimi,

Hi wona madzanadzana ya Manase.”

₁₈Eka Zebuloni, a ku:

“Titsakele, Zebuloni, eku humeni ka wena,

Na wena Isakara, emitsongeni ya wena!

₁₉Va ta vita matiko entshaveni;

Va humesa kona magandzelo ya ku lulama,

Hikuva va ta an'wa endzalweni ya malwandle,

Ni le rifuweni leri fihliweke esaveni.”

₂₀Eka Gadi, a ku:

“Ku katekile loyi a tshunxaka Gadi!

U etlele kukotisa ntswele ya nghala,

Wa handzula voko ni nhloko.

₂₁U hlawurile swirhangana swa tiko,

Hikuva ku averiwa ka hosi ku vekeriwe yena kona,

A famba ni tihosi ta tiko,

A endla leswo lulama emahlweni ka Yehovha,

Ni ku lerisa ka yena eka Israele.”

₂₂Eka Dani, a ku:

“Dani i mbhuri ya nghala

Leyi humaka eBaxani.”

₂₃Eka Neftali, a ku:

“Oho Neftali! U xurhe tintswalo,

U tarile hi ku kateka ka Yehovha!

Yana u fuma tlhelo ra vupeladyambu ni le dzongeni!”

₂₄Eka Asere, a ku:

“Asere u ta katekisiwa hi vana

va vavanuna va yena,

U ta rhandziwa hi vamakwavo!

U ta peta nenge wa yena emafurheni.

₂₅Swilotlelo swa wena i swa tinsimbhi ni swa koporo,

Matimba ya wena ma ta fana ni masiku ya wena.

₂₆“Oho Yexuruni! A nga kona la fanaka ni Xikwembu.

Lexi ku tiyisaka xi ri etilweni:

Evukulwini bya xona, xi tlakusiwe emapapeni.

₂₇Xikwembu xa khale i vuchavelo!

Mavoko lama nga heriki ma ku tlakusile.

Xi hlongorile nala emahlweni ka wena,

Kutani xi ku: ‘Herisa!’

₂₈Israele u akile hi ku rhula,

Xihlovo xa Yakobo xi pfelela

Etikweni ra koro ni ra vhinyo;

Kunene tilo ra yena ri tshona mberha.

₂₉U katekile, Israele!

I mani la fanaka na wena,

U nga tiko leri ponisiweke i Yehovha!

Xi nga xitlhangu xa ku pfuna ka wena,

Ni tlhari ra vukulu bya wena!

Valala va wena va ta tsongahatiwa emahlweni ka wena,

Kambe wena u ta kandziyela swivandla leswi tlakukeke swa vona!”