DEUTERONOMA 23

₁“La nga mutsheniwa, hambi hi ku kamiwa, hambi hi ku tsemiwa, a nga ka a nga ngheni enhlengeletanweni ya Yehovha.

₂“La tswariweke hi lava nga tekanangiki a nga ka a nga ngheni enhlengeletanweni ya Yehovha: hambi ri ri rixaka ra yena ra vukhume, vatukulu va yena va nga ka va nga ngheni enhlengeletanweni ya Yehovha.

₃“Vaamoni ni Vamowabu va nga ka va nga ngheni enhlengeletanweni ya Yehovha hambi rixaka ra vona ra vukhume ri nga ka ri nga ngheni enhlengeletanweni ya Yehovha; va nga ka va nga ngheni ni siku ni rin'we, ₄hikuva a va hlangananga na n'wina hi vuswa ni mati endleleni, loko mi humile eEgipta, na swona hikuva va hakerile Balaama, n'wana Beyori, wa Petoro, muti wa Mesopotamiya, leswaku a ta eka wena a ku rhukana. ₅Kambe Yehovha, Xikwembu xa wena, a nga rhandzanga ku yingisa Balaama, kutani Yehovha, Xikwembu xa wena, u ku hundzuluxele ku rhukana ku kateka, hikuva Yehovha, Xikwembu xa wena, a ku rhandzile. ₆U nga tikarhati, ku va ni ku rhula na vona, hambi ku ri hi ku tsaka ka vona eku hanyeni ka wena hinkwako, hilaha ku nga heriki.

₇“U nga tshuki u sandza Vaedomu, hikuva i vamakwenu; u nga sandzi Vaegipta, hikuva u luvele etikweni ra vona. ₈Vana va vona va rixaka ra vunharhu va ta tiva ku nghena enhlengeletanweni ya Yehovha.

₉“Kutakuloko u hume nyimpi, u nghene emixaxeni ku lwa ni valala va wena, u ta chava swilo hinkwaswo leswo biha. ₁₀Kungakuloko ku tshama eka wena, munhu la nga tengangiki hikwalaho ka leswi n'wi humeleleke nivusiku, u ta huma emixaxeni; a nga ka a nga ngheni emixaxeni, ₁₁nimadyambu u ta hlamba ematini, kutakuloko ri perile u ta tlhela a nghena emixaxeni. ₁₂U ta va ni xivandla ehandle ka mixaxa; u ta huma kona loko u ya ehandle. ₁₃U ta va ni xikomu etimpahleni ta wena, kutani loko u rhandza ku ya ehandle, u ta cela hi xikomu lexi, kambe loko u suka, u ta funengeta thyaka ra wena. ₁₄Hikuva Yehovha, Xikwembu xa wena, a famba exikarhi ka mixaxa ya wena ku ku ponisa ni ku nyiketa valala va wena emavokweni ya wena; mixaxa ya wena yi ta va leyi hlawuriweke, Yehovha a nga tshuki a vona leswo biha eka wena, leswaku a nga suki eka wena.

₁₅“U nga tshuki u nyiketa n'wini wa rona khumbi leri chaveleke eka wena loko ri balekele n'wini wa rona; ₁₆ri ta tshama eka wena ni le tikweni ra wena exivandleni lexi ri nga ta xi hlawula, ni le mutini lowu ri nga ta wu rhandza; kambe u nga tshuki u ri xanisa.

₁₇“Ku nga tshuki ku va ni wansati la nyiketiweke vuoswi exikarhi ka vanhwanyana va Israele, kambe ku nga tshuki ku va ni wanuna la nyiketiweke vuoswi exikarhi ka vana va Israele.

₁₈“U nga tshuki u tisa endlwini ya Yehovha Xikwembu xa wena hakelo ya nsati wa mbhisa, hambi mali ya mbyana, ku tiyisa rito rin'wana ra ku hlambanya; hikuva swilo leswimbirhi swa yila eka Yehovha, Xikwembu xa wena.

₁₉“U nga ka u nga lavi bindzu eka makwenu, hambiloko u n'wi lombile mali, hambi swakudya, hambi xilo xin'wana lexi lombiwaka hi bindzu. ₂₀U nga lava bindzu eka wamatiko, kambe u nga ka u nga lavi bindzu eka makwenu, leswaku Yehovha Xikwembu xa wena a ku katekisa emitirhweni hinkwayo ya wena, etikweni leri u nga ta nghena eka rona ku ri fuma.

₂₁“Kutakuloko u tibohile hi ku hlambanya eka Yehovha, Xikwembu xa wena, ku endla xilo, u nga tshuki u hlwela ku xi endla; hikuva Yehovha, Xikwembu xa wena, u ta swi lava eka wena, kutani u nga kumiwa u ri ni nandzu. ₂₂Loko u nga tibohi hi ku hlambanya ku endla mhaka u nga ka u nga vi na nandzu. ₂₃Kambe u fanele ku tiyisa rito leri humeke enon'wini wa wena, hilaha u hlambanyeke hakona eka Yehovha, Xikwembu xa wena, hi ku rhandza ka wena, ni laha u vuleke hakona hi nomu wa wena, u endla hakona.

₂₄“Kungakuloko u nghena ensin'wini ya vhinya ya warikwenu, u ta dya mihandzu hi ku rhandza ka mbilu ya wena, u xurha, kambe u nga tshuki u nghenisa nchumu exirhundzwini xa wena: ₂₅Kutakuloko u nghena emaveleni ya warikwenu, u ta tshova min'oko hi voko, kambe u nga tshuki u nghenisa sikela emaveleni ya warikwenu.