DEUTERONOMA 19

₁“Kutakuloko Yehovha, Xikwembu xa wena, a susile matiko lawa Yehovha, Xikwembu xa wena, a ku nyikaka tiko ra wona ku ri fuma, kuteloko u va tekele swa vona, ni loko u akile emitini ya vona, ni le tindlwini ta vona, ₂u ta hlawula miti minharhu etikweni leri Yehovha, Xikwembu xa wena, a ku nyikaka rona ku ri fuma. ₃U ta tilunghisela tindlela ta yona, kambe u ta endla ku avanyisa kanharhu emindzilekaneni ya tiko leri Yehovha, Xikwembu xa wena, a ku nyikaka rona leswaku yi va ndzhaka ya wena; swi ta va sweswo leswaku mudlayi un'wana ni un'wana a ya chavela kona.

₄“Mhaka ya mudlayi la nga ta chavela kona leswaku a hanya, hi leyi: La beke warikwavo a nga swi tivi, ni loko a nga n'wi venganga, hambi tolo ni tolweni; ₅kukotisa loko munhu a ya exihlahleni a ri ni makwavo, va ya tsema tihunyi, kutani loko voko ra yena ri tlakusa xihloka ku tsema rikunyi, swi nga humelela leswaku nsimbhi yi huma mbhinyini, yi ba warikwavo, kutani a fa. Munhu loyi, u ta balekela emutini wun'wanyana wa leyi, hi kona a nga ta hanya. ₆Loko swi nga ri tano murihiseri wa ngati a nga n'wi landza evukarini bya yena, kutani a nga n'wi kuma loko ndlela yi lehile ku tlurisa, a n'wi dlaya; kambe a nga fanelanga ku dlawa, leswi a nga vengangiki warikwavo, hambi tolo ni tolweni. ₇Hikwalaho ndzi ku lerisa, ndzi ku: ‘Hlawula miti minharhu.’ ₈Kutakuloko Yehovha, Xikwembu xa wena a anamisa mindzilekana ya wena, hilaha xi hlambanyeke hakona eka vatata wa wena, kutani a ku nyika tiko hinkwaro leri a nga vula leswaku u ta ri nyika vatata wa wena; ₉hikuva loko kunene u hlayisa milawu hinkwayo leyi ndzi ku lerisaka namuntlha, u ri karhi u rhandza Yehovha, Xikwembu xa wena, u famba etindleleni ta yena hi masiku, ₁₀u ta engetela kambe miti yin'wanyana minharhu eka leyinharhu leyi, leswaku ngati leyi nga riki na nandzu, yi nga tshuki yi halatiwa etikweni leri Yehovha, Xikwembu xa wena, a ku nyikaka leswaku yi va ndzhaka ya wena, ni leswaku ku nga tshuki ku va ni ngati ehenhla ka wena.

₁₁“Kungakuloko munhu la vengaka warikwavo, a n'wi khunguvanyisa, kutani a balekela emutini wun'wana wa leyi, ₁₂vakulukumba va muti wa yena, va ta rhuma vanhu va ya n'wi teka kona, va ta n'wi neha emavokweni ya murihiseri wa ngati leswaku a ta fa. ₁₃U nga ka u nga n'wi tsetseleri, kambe u ta susa ngati leyi nga riki na nandzu eIsraeleni, hi kona u nga ta tsaka.

₁₄“U nga tshuki u tshineta ndzilakana wa warikwenu, wu ri lowu vakulu va n'wina va wu vekeke endzhakeni leyi u nga ta yi kuma etikweni leri Yehovha, Xikwembu xa wena, a ku nyikaka rona ku ri fuma.

₁₅“Mbhoni yin'we yi nga ka yi nga ringani ku vula mhaka ehenhla ka munhu, hambi u endlile xidyoho xihi, ni nandzu wa yena wu nga va wihi, mhaka yi ta tiyisiwa hi milomu ya timbhoni timbirhi kumbe tinharhu.

₁₆“Kungakuloko mbhoni ya vunwa yi yima ku hehla munhu, ₁₇vanhu lavambirhi lava tengisanaka va ta yima emahlweni ka Yehovha, ni le mahlweni ka vaprista ni vaavanyisi lava nga ta va kona hi masiku lawa. ₁₈Vaavanyisi va ta lavisisa swinene mhaka, kutani waswivo loko mbhoni leyi yi ri ni vunwa, yi hembele makwavo, ₁₉mi ta n'wi endla hilaha a rhandzeke ku endlela makwavo hakona, u ta susa lowo biha exikarhi ka n'wina. ₂₀Van'wana va ta swi twa, va chava, kutani va nga ka va nga ha endli swo biha leswotano exikarhi ka n'wina. ₂₁Tihlo ra wena ri nga tshuki ri va ni musa: vutomi byi rihisiwa hi vutomi, tihlo hi tihlo, tino hi tino, voko hi voko, nenge hi nenge.