DEUTERONOMA 15

₁“Loko ku hundzile malembe ya ntlhanu na mambirhi, u ta va ni lembe ra ku tshunxa: ₂Hi yona mhaka ya ku tshunxa: Un'wana ni un'wana la lombeke mali u ta tshunxa warikwavo enandzwini wa yena. Kutakuloko ku tshunxa ku tivisiwile hi vito ra Yehovha, a nga tshuki a sindzisa warikwavo ni makwavo. ₃U ta tiva ku sindzisa muluveri, kambe leswi u swi lombeke makwenu, voko ra wena ri ta swi tshunxa. ₄Kambe ku nga ka ku nga vi na xisiwana eka rikwenu, hikuva Yehovha u ta ku katekisa kunene etikweni leri Yehovha, Xikwembu xa wena, a ku nyikaka ku ri fuwa, yi ri ndzhaka ya wena; ₅ntsena u ta yingisa rito ra Yehovha, Xikwembu xa wena, u tivonela ku endla hi milawu hinkwayo leyi ndzi ku lerisaka yona namuntlha. ₆Hikuva Yehovha, Xikwembu xa wena, u ta ku katekisa hilaha a ku byeleke hakona; u ta lomba mali eka matiko layo tala, kambe wena u nga ka u nga lombiwi, u ta fuma matiko layo tala, kambe ma nga ka ma nga ku fumi.

₇“Kutakuloko un'wana wa vamakwenu xi ri xisiwana emutini wun'wana wa wena, etikweni leri Yehovha, Xikwembu xa wena, a ku nyikaka, u nga tshuki u nonon'hwisa mbilu ya wena, ni ku pfalela makwenu wa xisiwana xandla xa wena, ₈kambe u ta n'wi pfulela xandla xa wena, u n'wi lomba leswi ringanaka hinkwaswo leswi a swi pfumalaka. ₉Tilangutele leswaku ku nga tshuki ku ve embilwini ya wena miehleketo ya ku biha, u ta ku: ‘Lembe ra ntlhanu na mambirhi ra ku tshunxa ra tshinela,’ kutani u languta makwenu wa xisiwana, hi tihlo ra wena ra ku biha u nga n'wi nyiki nchumu; hikuva a nga huwelela eka Yehovha, kutani u nga kumiwa u ri ni nandzu. ₁₀N'wi nyike hi ku tsaka, kambe kungakuloko u n'wi nyika, mbilu ya wena yi nga tshuki yi vilela; hikuva hikwalaho ka mhaka leyi, Yehovha, Xikwembu xa wena, xi ta ku katekisa emitirhweni hinkwayo ya wena, ni le ku endleni hinkwako ka mavoko ya wena. ₁₁Hikuva mupfumari a nga ka a nga tshiki ku va kona etikweni; hikwalaho ndzi ku nyikaka nawu lowo namuntlha, ndzi ku: ‘U ta pfulela makwenu ni xisiwana, ni mupfumari la nga etikweni ra wena voko ra wena.’

₁₂“Kungakuloko makwenu, hambi wanuna, hambi wansati, exikarhi ka Vaheveru a tixavisile eka wena, u ta ku tirhela malembe ya ntlhanu na rin'we; hi lembe ra ntlhanu na mambirhi, u ta n'wi humesa endlwini ya wena a tshunxiwile. ₁₃Kutakuloko u n'wi humesile, u n'wi tshunxile, u nga ka u nga n'wi rhumeli karikwavo a nga tamelanga nchumu. ₁₄U ta n'wi nyika xilo xin'wana xa swifuwo leswitsongo swa wena, ni swa xivuya xa wena, ni swa xikhuvuto xa wena, u n'wi nyika, u pambula eka leswi Yehovha, Xikwembu xa wena, a ku katekiseke ha swona; ₁₅u ta tsundzuka leswaku a wu ri khumbi eEgipta; ni leswaku Yehovha, Xikwembu xa wena, a ku kutsurile; hikwalaho ndzi ku nyikaka nawu lowo namuntlha. ₁₆Kungakuloko khumbi ra wena ri ku eka wena: ‘Ndzi nga ka ndzi nga humi eka wena,’ hi leswi a ku rhandzaka, wena ni yindlu ya wena, kambe u tsakile eka wena, ₁₇u ta teka xitlhavo kutani u n'wi boxa ndleve enyangweni; hi kona a nga ta va nandza wa wena hi masiku; u ta endlela nandza wa wena wa wansati sweswo. ₁₈Yi nga tshuki yi va mhaka leyi nonon'hwaka emahlweni ka wena ku n'wi humesa eka wena a tshunxiwile, hikuva a ku tirhele malembe ya ntlhanu na rin'we, u ku kumisile kambirhi hakelo ya mutirhi; kutani Yehovha, Xikwembu xa wena, u ta ku katekisa eswilweni hinkwaswo leswi u nga ta swi endla.

₁₉“U ta hlawulela Yehovha, Xikwembu xa wena, mativula hinkwawo ya xinuna ya swifuwo leswikulu ni leswitsongo swa wena. U nga tshuki u tirhisa mativula ya swifuwo leswikulu swa wena, kambe u nga tshuki u tsemela mativula ya swifuwo leswitsongo swa wena. ₂₀U ta ma dya hi lembe rin'wana ni rin'wana u ri ni yindlu ya wena, emahlweni ka Yehovha, Xikwembu xa wena, exivandleni lexi Yehovha a nga ta xi hlawula. ₂₁Kungakuloko xifuwo lexi, xi ni vulema, loko xi khwita, kumbe loko xi file mahlo, kumbe loko xi ri ni vulema lebyikulu byin'wana, u nga ka u nga xi humeseli Yehovha, Xikwembu xa wena egandzelweni, ₂₂u ta xi dya endyangweni wa wena; la nga tengangiki ni la tengeke va ta dya hinkwavo, kukotisa loko va dya mhunti ni nhlangu. ₂₃Ntsena u nga tshuki u dya ngati ya xona; u ta yi halata ehansi kukotisa mati.