Vafuwi ni vakulukumba va nga ka va nga poni.
1“Mi ni khombo n'wina lava tsakeke eSiyoni, na n'wina lava tshembeke ntshava ya Samariya! N'wina tihosi ta tiko leri nga emahlweni ka man'wana, n'wina lavo va yindlu ya Israele va titisaka eka n'wina!
2“Yanani le Kaline, mi vona, loko mi suka kona, mi hundzela eHamata lonkulu, kutani mi ta rhelela le Gati wa Vafilista. Xana miti yoleyo yi sasekile ku tlula miti leyi ya n'wina xana? Kumbe tiko ra vona i rikulu eka tiko ra n'wina xana? 3N'wina mi nge mi veka siku ra ku vaviseka ekule, kutani mi veka xitshamo xa vukari ekusuhi!
4“Va seketele ehenhla ka switshamo leswi endliweke hi timhondzo ta ndlopfu, va tiolorile ehenhla ka masangu ya vona, va dya swinyimpfana swa ntlhambi, ni marhole lama nonisiweke. 5Va ri karhi va yimbelela tinsimu ta swahava hi mpfumawulo wa magupu; va tisungulela swo yimbelela ha swona kukota Davhida, 6va nwa vhinyo emikambaneni, va tola mafurha ya oli, kutani a va twisiwi ku vava hi mbanga ya Yosefa. 7Hikwalaho sweswi va ta ya evukhumbini, va rhangisiwile emahlweni ka hinkwavo lava yisiwaka kona; kutani huwa ya lava tiololaka yi ta hela.”
8Hosi, Yehovha, u hlambanyile hi moya wa yena, a ku: Ku vula Yehovha, Xikwembu xa tinyimpi: “Ndzi vengile ku tikurisa ka Yakobo, ndzi yila tindlu ta yena ta vuhosi; ndzi ta nyiketa valala muti ni hinkwaswo leswi nga eka wona.” 9Kutani hambi ku nga sala khume ra vavanuna endlwini yin'we, va ta fa. 10Xaka ra munhu ri ta ta ni la hisaka mitsumbu, va ta teka mufi, va humesa marhambu endlwini. Kutani u ta ku eka la tshameke empfungwe wa yindlu: “Xana wa ha ri ni un'wana wa wena-ke?” Yeloyi u ta hlamula, a ku: “E-e, a ka ha ri na munhu.” Hilaha a nga ta ku: “Miyela! A ka ha ri na ku vuriwa vito ra Yehovha.” 11Hikuva vonani, Yehovha u lerisile, kutani yindlu leyikulu yi ta mbundzuxiwa, yi hundzuka rhumbi, ni yindlu leyitsongo yi ta fayeteriwa.
12Xana tihanci ti tsutsumisiwa emaribyeni, kumbexana ku rimiwa hi tihavi kona, leswi mi nga hundzula ku avanyisa nhlomulo, ni mbhandzu wa ku lulama mi wu hundzule ku vava?
13N'wina lava tsakelaka swahava, mi nge: “Xana a hi matimba ya hina lawa hi nga ta endla ha wona swihontlovila xana?”
14Hikwalaho, Yehovha, Xikwembu xa tinyimpi, u ri: “N'wina va yindlu ya Israele, vonani, ndzi ta mi pfuxela tiko leri nga ta mi xanisa ku suka le Hamata ku yisa enambyeni wa mananga.”
