AMOSI 3

₁Yingisani rito leri, leri Yehovha a ri vulaka eka n'wina, vana va Israele, ni le ka ndyangu hinkwawo lowu ndzi wu humeseke etikweni ra Egipta, ₂ndzi ri: “Ndzi tivile n'wina ntsena exikarhi ka tinxaka hinkwato ta misava, hikwalaho ndzi ta mi ba hikwalaho ka ku homboloka ka n'wina hinkwako.

₃“Xana vambirhi va nga famba swin'we va nga pfumelelananga? ₄Xana nghala yi vuvula exihlahleni, ku ri hava lexi yi nga xi handzulaka? Xana xinghalana xi nga twarisa rito ra xona ebakweni ra xona, xi nga khomanga nchumu xana? ₅Xana xinyanyana xi nga wela erisingeni leri nga ehansi, ku nga ri na xilo lexi rhiyiweke? Xana ntlhamu lowu vekiweke ehansi wu nga wachuka, wu nga phasi nchumu xana? ₆Nanga loko yi yimbiwa emutini, xana vanhu a va tshuki hinkwavo xana? Xana khombo ri nga humelela emutini ri nga humesiwi hi Yehovha? ₇Hikuva Hosi, Yehovha, a nga endli nchumu a nga si kombisa makungu ya yena eka malandza ya yena va nga vaprofeta. ₈Nghala ya vuvula: la nga taka a nga chavi i mani? Yehovha, Xikwembu, wa vulavula: loyi a nga taka a nga profeti i mani xana?”

₉Huwelelani etindlwini ta vuhosi ta Axidodo, ni le tindlwini ta vuhosi etikweni ra Egipta, mi ku: “Hlengeletanani etintshaveni ta Samariya mi ta vona madzolonga layo tala lama nga exikarhi ka yena ni maxangu lama nga eka yena.” ₁₀“A va tivi ku endla leswi lulameke, ku vula Yehovha; va hlengeleta etindlwini ta vona leswi phangiweke hi vona hi ku dlaya ni ku onha.”

₁₁Hikwalaho Hosi Yehovha a nga te: “Valala hi lava, va rhendzele tiko hinkwaro, va ta herisa matimba ya wena, ni tindlu ta wena ta vuhosi ti ta phangiwa.”

₁₂Yehovha u ri: “Kukotisa loko murisi a vutla milenge mimbirhi ya nyimpfu, kumbe nhluvi wa ndleve enon'wini wa nghala, ku ta vutlisiwa sweswo vana va Israele! Lava nge Samariya, lava tshameke emakumu ka swilawu, ni le henhla ka byetlelo lebyi andlariweke hi tinguvu ta Damaska.”

₁₃“Yingisani, mi endla vumbhoni endlwini ya Yakobo,” ku vula Yehovha Xikwembu xa mavandla. ₁₄“Hi siku leri ndzi nga ta holovela Israele hikwalaho ka ku dyoha ka yena, ndzi ta holovela ni tialitari ta Betele, kutani timhondzo ta alitari ti ta tshoveka, ti wela ehansi. ₁₅Ndzi ta mbundzuxa yindlu ya vuxika ni yindlu ya ximumu; kutani tindlu leti bombisiweke hi timhondzo ta tindlopfu ti ta hela, ku ta herisiwa ni tindlu leto tala,” ku vula Yehovha.