TIMHAKA 9

₁Kambe Sawulo, hikuva a ha ri ni mahika ya ku songela ni ku dlaya vadyondzisiwa va Hosi, a ya eka muprista lonkulu, ₂a kombela eka yena mapapila lama tsaleriweke masinagoga ya Damaska leswaku kutakuloko a kuma van'wana va dyondzo yoleyo, hambi va ri vavanuna, kumbe vavasati, a va yisa eYerusalema, va bohiwile.

₃A ku a ha famba a ri ekusuhi na Damaska, hi nomu lowu, a tshuka; ku vonakala loku pfaka etilweni kukota rihati, ku n'wi rhendzela. ₄Kutani a wela ehansi, a twa rito leri nge eka yena: “Sawulo, Sawulo, u ndzi xanisela yini?” ₅Kutani a ku: “U mani, Hosi?” Hosi yi ku: “Hi mina Yesu loyi u n'wi xanisaka; swa nonon'hwa eka wena ku khadlanya risungunhu.” ₆Kutani hi ku rhurhumela ni ku tshuka, a ku: “Hosi, u ri ndzi endla yini xana?” Hosi yi ku eka yena: “Pfuka, u nghena emutini, kutani u ta byeriwa kona leswi u fanelaka ku swi endla.” ₇Kambe vavanuna lava ingi a famba na vona, a va yimile hi ku tsemeka nhlana, hikuva a va twile rito ntsena, va nga voni munhu. ₈Kutani Sawulo a pfuka ehansi, kambe loko a pfula mahlo, a nga ha voni; kutani va n'wi khoma hi voko, va n'wi yisa eDamaska. ₉Kutani ku hundza masiku manharhu a nga voni, a nga dyi, a nga n'wi nchumu.

₁₀Mudyondzisiwa loyi va nge i Ananiya a a ri kona eDamaska; kutani Hosi yi n'wi byela enorhweni, yi ku: “Ananiya!” yena a ku: “Ndzi loyi, Hosi.” ₁₁Hosi yi ku eka yena: “Suka u ya entsendzeleni lowu va nge wo Lulama, kutani u lava endlwini ya Yuda munhu la thyiweke Sawulo wa Tarso; ₁₂hikuva vona, wa khongela; kutani u vonile, na yena, hi norho munhu loyi va nge i Ananiya a nghena, a n'wi tlhandleka mavoko henhla leswaku a vona.” ₁₃Kambe Ananiya a hlamula, a ku: “Hosi, ndzi twile hi lavo tala timhaka ta munhu yeloyi hilaha a tluriseke hi ku endla swo biha eka vahlawuriwa va wena eYerusalema. ₁₄Kambe ni kwala, u tile a nyikiwile hi vaprista lavakulu matimba ya ku boha hinkwavo lava khongelaka vito ra wena.” ₁₅Kambe Hosi yi ku eka yena: “Yana, hikuva loyi, i khuwana leri ndzi tihlawuleleke rona, ku yisa vito ra mina eka vamatiko, ni ka tihosi, ni ka vana va Israele; ₁₆hikuva ndzi ta n'wi kombisa hilaha a nga ta twa ku vaviseka lokukulu hikwalaho ka vito ra mina.”

₁₇Ananiya a famba, kutani a nghena endlwini, a n'wi tlhandleka mavoko, a ku: “Sawulo, makwerhu, Hosi Yesu la tikombiseke eka wena endleleni leyi u nga ta ha yona, u ndzi rhumile leswaku u tlhela u vona, ni leswaku u tala Moya lowo Kwetsima.” ₁₈Hi nomu lowu, swilo leswi fanaka ni tihakatimba swi wa emahlweni ya yena, a tlhela a vona; kutani a yima, a khuvuriwa. ₁₉Kuteloko a dyile swakudya, a tlhela a kuma matimba, Kutani Sawulo a tshama masiku ma nga ri mangani ni vadyondzisiwa lava nga eDamaska.

₂₀Kutani Sawulo a hatlisa ku dyondzisa ta Yesu emasinagogeni, a tiyisa leswaku hi yena N'wana wa Xikwembu. ₂₁Kutani hinkwavo lava n'wi twaka, va hlamala ngopfu, va ku: “Xana loyi, a hi yena loyi ingi a xanisa lava khongelaka vito rero eYerusalema, a tela vona, ni halenu, ku ta va boha, a va yisa eka vaprista lavakulu xana?”

₂₂Kambe Sawulo a a ri karhi a nyikiwa matimba ngopfu, a hlula Vayuda lava akeke eDamaska, hi ku va kombisa leswaku Yesu i Kriste.

₂₃Endzhaku ka masiku layo talanyana, Vayuda va kanela swin'we ku n'wi dlaya. ₂₄Kambe Sawulo a tivisiwa leswi va swi kaneleke. A va n'wi tumbelela etinyangweni ta muti, nhlikanhi ni vusiku leswaku va ta n'wi dlaya; ₂₅kambe vadyondzisiwa va n'wi teka nivusiku, va yima erirhangwini, va n'wi nembeleta ehansi enguleni. ₂₆Sawulo, kakuloko a fikile eYerusalema, a ringeta ku hlangana ni vadyondzisiwa; kambe va n'wi chava hinkwavo, va nga pfumeri leswaku i mudyondzisiwa. ₂₇Kutani Barnaba a n'wi teka, a n'wi yisa eka vaapostola, a va byela hilaha a voneke Hosi hakona endleleni yi vulavula na yena; ni hilaha a nga vula vito ra Yesu hakona hi matimba emutini wa Damaska. ₂₈Kutani Sawulo a tshama na vona eYerusalema, a ri karhi a nghena a huma, ₂₉a dyondzisa hi vito ra Hosi Yesu a nga chavi nchumu; a vulavula, a hlamulana ni Vayuda, ni Vahelenista; kambe vona va rhandza ku n'wi dlaya. ₃₀Kuteloko vadyondzisiwa va twile sweswo, va n'wi yisa eKhezariya, kutani va n'wi rhuma eTarso.

₃₁Kambe tikereke a ti tshamile hi ku rhula hinkwako etikweni ra Yudiya, ni ra Galeliya, ni ra Samariya, ti akisiwa, ti famba exichabyeni xa Hosi; kutani ti andza hi ku chavelela ka Moya lowo Kwetsima.

₃₂Kambe Petro loko a ri karhi a endza ematikweni lawa hinkwawo, a fika ni le ka vakwetsimi lava akeke eLida. ₃₃A kuma kona munhu loyi va nge i Eniya, loyi ingi a khwanyele swirho, a etlele esangwini hi malembe ya ntlhanu na manharhu. ₃₄Kutani Petro a ku eka yena: “Eniya! Yesu Kriste wa ku hanyisa; pfuka, u tisongela sangu ra wena.” Kan'we a pfuka. ₃₅Kutani hinkwavo lava akeke eLida ni le Xaroni, loko va n'wi vona, va hundzukela eka Hosi. ₃₆Emutini wa Yopa, a ku ri ni wansati wa mudyondzisiwa, loyi va nge i Tabita (hileswaku Dorkasi, loko ku hlamuseriwa), a tele mitirho ya tintswalo, ni ya ku hanana. ₃₇Kambe a khomiwa hi vuvabyi enkarhini wolowo, a fa. Kuteloko va n'wi hlantswile va n'wi veka endlwini yin'wana leyi nga ehenhla; ₃₈kutani, leswi Lida wu nga ekusuhi na Yopa, vadyondzisiwa loko va twa leswaku Petro u kona, va n'wi rhumela vavanuna vambirhi; va n'wi khongela leswaku a ta eka vona, a nga hlweri. ₃₉Kutani Petro a suka, a famba na vona. Kuteloko a fikile, va n'wi yisa endlwini leyi nga ehenhla; kutani vavasati va tinoni hinkwavo va ta eka yena, va ri karhi va rila, va n'wi komba mikhancu ni tinguvu leti Dorkasi a nga va rhungela tona loko a ha ri na vona. ₄₀Kutani Petro a va humesela ehandle hinkwavo; a khinsama hi matsolo, a khongela; kutani a hundzulukela eka ntsumbu, a ku: “Tabita, pfuka!” Kutani a hanyanya mahlo; kuteloko a vona Petro, a pfuka a tshama. ₄₁Kambe Petro a n'wi khoma hi voko, a n'wi yimisa; kuteloko a vitanile vakwetsimi ni tinoni, a va nyika yena a hanyile. ₄₂Mhaka leyi, yi tiviwa hi muti hinkwawo wa Yopa; kutani lavo tala va pfumela eka Hosi. ₄₃Petro a xwa eYopa masiku layo talanyana, a tshama eka munhu loyi va nge i Simoni, a nga mutlhuvutsi.