TIMHAKA 24

₁Masiku ya ntlhanu, loko ma hundzile, ku ta Ananiya, muprista lonkulu, a ri ni vakulukumba van'wana ni muvulavuri un'wana loyi va nge i Tertulo; kutani va ya eka hosi ku hehla Pawulo. ₂Kuteloko va n'wi vitanile, Tertulo a sungula ku n'wi hehla, a ku:

₃“Oho Felikisi wa mafundza! Hi nga ka hi nga tshiki ku anakanya hi ku khensa, hilaha hi nga ni ku rhula lokukulu, ni ku kateka loku nga humelela tiko leri hi ku fuma ka wena ni vutlhari bya wena. ₄Kambe leswaku ndzi nga tshuki ndzi ku hlwerisa, ndza ku khongela, ndzi ku: Wa nga hi yingisa hi vunene bya wena, ku nga ri kungani. ₅Hi kumile munhu loyi, a nga ntungu, u pfuxe madzolonga exikarhi ka Vayuda hinkwavo, lava akeke emisaveni hinkwayo; i nhloko ya dyondzo leyi hambukeke ya Vanazarene. ₆Na swona u ringetile ku nyamisa tempele. Hikwalaho hi n'wi khomeke, kutani a hi rhandza ku n'wi avanyisa hi nawu wa hina; ₇kambe Lisiya, ndhuna leyikulu, a humelela, a hi vutlela yena hi matimba lamakulu, ₈kutani a lerisa vahehli va yena ku ta emahlweni ka wena. Na wena, loko u n'wi vutisisa, u nga kuma timhaka hinkwato leti hi n'wi hehlaka ha tona.”

₉Kutani Vayuda va n'wi seketela va ku: “Kunene swi tano.”

₁₀Pawulo, kuteloko hosi yi n'wi kowetile leswaku a vulavula, a hlamula, a ku:

“Leswi ndzi tivaka leswaku swi ni malembe u fuma tiko leri, ndzi tihlamulela hi ku tshemba loku tlurisaka. ₁₁U nga swi vona leswaku a ku si hundza masiku ya khume na mambirhi ndzi fikile eYerusalema, ku ta khongela kona. ₁₂Kambe a va ndzi kumanga ndzi hlamulana na munhu etempeleni, hambi ku ri ku kukureta vanhu emasinagogeni ni le mutini. ₁₃Kutani va nga hluleka ku tiyisa hi ku kombisa timhaka leti va ndzi hehlaka ha tona sweswi. ₁₄Kunene ndzi nga tivula eka wena leswaku, loko yi ri dyondzo leyi va nge hi leyi hambukeke; ndzi tirhela Xikwembu xa vatatana ha yona, ndzi ri karhi ndzi pfumela timhaka hinkwato ta nawu ni leti tsariweke evaprofeteni. ₁₅Ndzi ni ku tshemba eka Xikwembu, loku na vona va nga na kona, leswaku ku pfuka ka vafi ku ta va kona eka lavo lulama ni ka lava nga lulamangiki. ₁₆Hikwalaho ndzi tiyisaka hi matimba hi masiku hinkwawo leswaku ndzi va ni ripfalo leri nga ndzi soriki emahlweni ka Xikwembu ni vanhu.

₁₇“Kutani ndzhaku ka malembe layo tala, ndzi tile ku ta neha swo nyika eka tiko ra rikwerhu, ni ku humesa timhamba. ₁₈Hikwalaho Vayuda van'wana va Asiya va ndzi kumeke etempeleni ndzi tibasisile, ku nga ri hi ku pfuxa vanhu, hambi ku ri ku endla huwa. ₁₉Ingi va ri vona va teke ku ta ndzi hehla emahlweni ka wena, loko ngi va ri ni mhaka na mina. ₂₀Na vona volavo, a va vule loko va kumile ku homboloka kun'wana eka mina siku ndzi yimeke ehubyeni; ₂₁loko swi nga ri leswaku va nga vula rito leri, ri ri rin'we, lero ndzi nga ri vula hi matimba, ndzi yimile exikarhi ka vona, ndzi ku: ‘Namuntlha, ndzi avanyisiwa hi n'wina hikwalaho ka ku pfuka ka vafi.’ ”

₂₂Felikisi, hi ku tiva ngopfunyana swa dyondzo yoleyo, a va tlherisa, a ku: “Kutakuloko Lisiya, ndhuna leyikulu a fikile, hi kona ndzi nga ta mi avanyisela.” ₂₃Kutani a lerisa ndhuna ya dzana leswaku Pawulo a hlayisiwa, kambe ku va hi ku n'wi hlayisa, ku nga tshuki ku aleriwa munhu wa varikwavo ku n'wi tirhela.

₂₄Loko ku hundzile masiku ma nga ri mangani, Felikisi a ta a ri na Drusila nsati wa yena, a nga Muyuda; kutani kuteloko a vitile Pawulo, a n'wi yingisela loko a vula ta ku pfumela eka Kriste. ₂₅Kakuloko a vula ku lulama ni ku tikhoma, ni ku avanyisiwa loku nga ta ta, Felikisi a khomiwa hi ku chava, kutani a hlamula, a ku: “U nga tifambela sweswi; siku ndzi kumaka nkarhi ndzi ta tlhela ndzi ku vitana.” ₂₆Kambe tlhelo rin'wana, a a tshemba leswaku Pawulo u ta n'wi nyika mali; hikwalaho a nga n'wi vita hakanyingi ku vulavula na yena.

₂₇Kambe loko ku hundzile malembe mambirhi, Porkiyo Festo a vekiwa ematshan'weni ya Felikisi; kutani Felikisi a siya Pawulo ekhotsweni, hikuva a a rhandzile ku khensiwa hi Vayuda.