Ta Korneliyo loko a vona mahlori.
1Emutini wa Khezariya a ku ri ni munhu loyi va nge i Korneliyo; a a ri ndhuna ya dzana entlaweni lowu vuriwaka Italiya; 2a a ri munhu wa vukhongeri, la chavaka Xikwembu kun'we ni va yindlu ya yena hinkwavo; a a hanana ngopfu eka swisiwana swa tiko; a nga rhuteri ku khongela Xikwembu. 3Siku rin'wana, a vona mahlori hi nkarhi wa ntlhanu na mune; a vonisisa ntsumi ya Xikwembu yi nghena eka yena, yi ku eka yena: “Korneliyo!” 4Yena loko a yi langutile, a tshuka hi ku chava, a ku: “Ku ni yini, Hosi?” Yi ku eka yena: “Mikhongelo ni ku hanana ka wena swi tlhandlukele emahlweni ka Xikwembu swi va switsundzuko eka xona. 5Sweswi rhuma eYopa vavanuna, va ya teka Simoni la thyiweke Petro. 6U hambukele eka munhu loyi va nge i Simoni, mutlhuvutsi, loyi yindlu ya yena yi nga ekusuhi ni lwandle.”
7Kuteloko ntsumi leyi vulavuleke na yena yi sukile, a vitana malandza mambirhi ya yena swin'we ni nhenha leyi chavaka Xikwembu eka lava tshamaka na yena; 8kutani a va byela timhaka hinkwato, a va rhuma eYopa.
Ta Petro loko a vona mahlori.
9Siku leri tlhandlamaka, kakuloko va ha ri endleleni, va ri karhi va tshinelela muti, Petro a tlhandlukela elwangwini a ya khongela; a ku lava ku va nkarhi wa ntlhanu na wun'we. 10Kutani a twa ndlala, a rhandza ku dya. Kakuloko va ha n'wi lunghisela swakudya, a vona mahlori. 11A vona tilo ri handzuriwile, ni xilo lexi fanaka ni nguvu leyikulu, xi xikela eka yena xi bohiwile etinhleni ta mune, xi nembeletiwa emisaveni; 12endzeni ka xona, a ku ri ni hinkwaswo leswi hanyaka emisaveni, swa mune wa milenge, ni leswi kokovaka, ni tinyanyana ta tilo. 13Kutani rito ri fika eka yena, ri ku: “Petro! Suka u yima, u tlhava, u dya!” 14Kambe Petro a ku: “Swi nga tshuki swi va tano, Hosi, hikuva a ndzi si dya xilo lexi yilaka, hambi xi ri lexi nyameke.” 15Rito ri engeta ri ku eka yena ra vumbirhi: “Swilo leswi Xikwembu xi nga swi basisa u nga vuli leswaku swa yila.” 16Kutani swoleswo swi endliwa kanharhu; kutani xilo lexi xi tlhela xi tlhandlukiseriwa etilweni.
Ta ku vitaniwa ka Petro ku ya ka Korneliyo.
17Petro, loko a ri karhi a anakanya mahlori lawa a ma voneke, leswaku ma yisa kwihi, ku fika vavanuna lava rhumiweke hi Korneliyo, va vutisa yindlu ya Simoni, va yime enyangweni. 18Kuteloko va vitanile va vutisa leswaku xana Simoni loyi va nge i Petro u tshama kona-ke. 19Kutani Petro loko a ri karhi a ha anakanya mahlori lawa, Moya wu ku eka yena: “Vona, vavanuna vanharhu va ku lava; 20yima u xika, u famba na vona u nga kanakani, hikuva hi mina ndzi va rhumeke.” 21Kutani Petro a xikela eka vavanuna lava, a ku: “Hi mina loyi mi n'wi lavaka; mi tile hi mhaka yihi?” 22Va ku: “Korneliyo ndhuna ya dzana, wanuna la lulameke, la chavaka Xikwembu, la dzunisiwaka hi tiko hinkwaro ra Vayuda, u lerisiwile hi ntsumi leyo kwetsima ya Xikwembu ku ku vitanela emutini wa yena, a ta yingisa leswi u nga ta n'wi byela swona.” 23Kutani Petro a va vitanela endlwini, a va rhurhela kona. Ni mixo, Petro a suka na vona; kambe vamakwavo van'wana va Yopa va famba na yena.
24Siku leri tlhandlamaka, va nghena eKhezariya. Kambe Korneliyo a a va langutele, a a vitanile maxaka ya yena, ni vanakulobye va nga varhandziwa va yena. 25Kakuloko Petro a nghena, Korneliyo a hlangana na yena, a tiwisela emilengeni ya yena, a n'wi khinsamela. 26Kambe Petro a n'wi pfuxa, a ku: “Pfuka, na mina ndzi munhu ntsena.” 27Kavaloko a nghena na yena, va ri karhi va vulavula swin'we; kutani a kuma vanhu lavo tala va hlengeletene kona. 28Kutani a ku eka vona: “Ma swi tiva leswaku Muyuda a nga pfumeleriwi ku hlangana ni wamatiko, hambi ku ri ku nghena ekaya ka yena; kambe Xikwembu xi ndzi kombisile leswaku ndzi nga tshuki ndzi vula munhu, hambi a ri mani na mani, leswaku u ni thyaka, kumbe u nyamile. 29Hikwalaho, loko ndzi vitaniwa, ndzi tile ntsena, a ndzi alanga; kutani sweswi, ndza mi vutisa mhaka leyi mi ndzi vitaneleke yona.”
30Kavaloko Korneliyo a hlamula, a ku: “Ku hundzile mune wa masiku ku fika sweswi, ndzi titsona swakudya, ndzi khongela endlwini ya mina hi nkarhi wa ntlhanu na mune; kutani ndzi vona munhu a yimile emahlweni ka mina, a ambele tinguvu leti vangamaka, a ku: 31‘Korneliyo, mikhongelo ya wena yi yingisiwile, ni ku hanana ka wena ku fikile emahlweni ka Xikwembu xi va xitsundzuxo eka xona. 32Sweswi, rhuma vanhu eYopa va ya vita Simoni la thyiweke Petro; u hambukele endlwini ya Simoni mutlhuvutsi, leyi nga ekusuhi ni lwandle; kutakuloko a tile, hi yena la nga ta vulavula na wena.’ 33Hikwalaho ndzi hatliseke ku rhuma vanhu eka wena; kambe u endlile swona loko u tile; sweswi, hinkwerhu hi tshamile la, kun'we emahlweni ka Xikwembu, ku yingisa hinkwaswo leswi Xikwembu xi ku leriseke swona.”
Ta Petro loko a dyondzisa Korneliyo.
34Kutani Petro a ahlamisa nomu a ku: “Kunene ndza swi vonisisa leswaku Xikwembu a xi yi hi nghohe ya vanhu; 35kambe exikarhi ka matiko hinkwawo, loyi a xi chavaka, a endla leswi lulameke, xa n'wi tsakela. 36Hi rona rito leri xi ri rhumeleke vana va Israele loko xi vula ku rhula ha Yesu Kriste yi nga Hosi ya hinkwavo. 37Ma ti tiva na tona timhaka leti humeleleke etikweni hinkwaro ra Yudiya, leti sunguleke hi ra Galeliya, endzhaku ka ku khuvula loku dyondzisiweke hi Yohane; 38ti nga ta Yesu wa Nazareta, leswaku Xikwembu xi n'wi cherile hi Moya lowo Kwetsima ni matimba a va a famba hinkwako, a ri karhi a endla swinene, a horisa hinkwavo lava fumiweke hi Diyavulosi, hikuva Xikwembu a xi ri na yena. 39Kutani hina hi timbhoni ta timhaka hinkwato leti a ti endleke etikweni ra Vayuda, ni le Yerusalema; kambe va n'wi dlayile hi ku n'wi hayeka emhandzeni. 40Kambe Xikwembu xi n'wi pfuxile eku feni esikwini ra vunharhu, kutani xi n'wi humesile erivaleni, 41ku nga ri ka tiko hinkwaro, kambe ku ri ka timbhoni leti Xikwembu xi ti hlawuleke eku sunguleni, hi nga hina lava hi nga dya, hi nwa na yena, loko a pfukile eku feni. 42Kutani u hi lerisile ku dyondzisa tiko ni ku tiyisa leswaku hi yena la vekiweke hi Xikwembu a va muavanyisi wa lava hanyaka ni lava feke. 43Hi yena vaprofeta hinkwavo va n'wi vuleke hi mhaka leyi nge: Un'wana ni un'wana la pfumelaka eka yena, u ta kuma ku khomeriwa ka swidyoho hi vito ra yena.”
44Kakuloko Petro a ha vulavula marito walawo, Moya lowo Kwetsima wu xikela ehenhla ka hinkwavo lava yingisaka rito. 45Kutani vapfumeri hinkwavo lava ngi va ri va ku yimba, lava teke na Petro, va hlamala loko va vona leswaku nyiko ya Moya lowo Kwetsima yi cheleriwa ni ka vamatiko, 46hikuva va va twa va vulavula tindzimi tin'wana, va dzunisa Xikwembu.
47Kutani Petro a hlamula, a ku: “Xana sweswi, i mani la nga alaka ni mati, leswaku va nga khuvuriwi, kasi va amukele Moya lowo Kwetsima kukotisa hina?” 48Kutani a lerisa leswaku va khuvuriwa hi vito ra Yesu Kriste. Kambe va n'wi kombela leswaku a xwa na vona masiku ma nga ri mangani.
