2 TIMOTIYA 4

₁Ndza ku khongotela emahlweni ka Xikwembu ni Hosi ya hina, Yesu Kriste, loyi a nga ta avanyisa lava hanyaka ni lava feke, enkarhini wa ku humelela ka ku fuma ka yena, ndzi ri: ₂Huwelela rito, u phikelela hi nkarhi, ni loko wu nga ri nkarhi; u laya, u tshinya, u khongotela hi ku yingisela hinkwako, ni ku dyondzisa. ₃Hikuva ku ta humelela nkarhi lowu vanhu va nga taka va nga yingiseri dyondzo leyi hanyisaka; kambe hi ku navela ka vona, va ta tihlengeletela vafundhisi, va ri karhi va tiphumunha tindleve, ₄kutani va ta hambukisa tindleve ta vona entiyisweni, va ta hundzukela emitsheketweni. ₅Kambe wena, hiteka etimhakeni hinkwato, amukela makhombo, tirha ntirho wa muvuri wa Evhangeli, u hetisa ntirho wa wena.

₆Hikuva, loko ndzi ri mina, ndzi kotisa mhamba leyi humesiwaka egandzelweni, kutani nkarhi wa ku suka ka mina wu le kusuhi. ₇Ndzi lwile ku lwa lokunene, ndzi hetisile ku tsutsuma ka mina, ndzi hlayisile ku pfumela; ₈leswi seleke hileswaku harhi ya ku lulama yi ndzi tshamele, leyi Hosi yi nga ta ndzi nyika siku lero, yena a nga muavanyisi lowo lulama; kambe a nga ka a nga nyiki mina ntsena, kambe hinkwavo lava nga ta va va rhandzile ku humelela eka yena.

₉Hatlisa ku ta eka mina sweswi; ₁₀hikuva Demasi u ndzi siyile hi ku rhandza swa nkarhi wa sweswi, kutani u tifambele eTesalonika; Kreskene u yile eGalatiya, na Tito u yile eDalamatiya; ₁₁ku sele Luka ntsena na mina. Teka Marka, u ta na yena, hikuva u ndzi pfuna ngopfu entirhweni. ₁₂Ndzi rhumile Tixiko eEfesa. ₁₃Siku u taka, vuyisa jasi leri ndzi ri siyeke eTrowasi eka Karpo, na tona tibuku, ngopfu leta madzovo.

₁₄Aleksandro, mufuri wa nsuku, u ndzi pfuxele makhombo layo tala; Hosi yi ta n'wi tlherisela leswi faneleke mitirho ya yena! ₁₅U tivonela yena, hikuva u arile ngopfungopfu marito ya hina.

₁₆A ku na loyi a ndzi yimeleke eku hlamuleni ka mina ka ku rhanga ehubyeni, kambe va ndzi fularhele hinkwavo; Xikwembu xi nga tshuki xi va hlayela nandzu wolowo. ₁₇Kambe Hosi yi ndzi yimerile, yi ndzi tiyisile leswaku ku dyondzisa ku tiyisiwa ha mina, vamatiko hinkwavo va ta ku twa, kutani ndzi damurhutiwile enon'wini wa nghala. ₁₈Kambe Hosi yi ta hamba yi ndzi damurhuta emitirhweni hinkwayo leyo biha, yi ndzi hanyisa ku nghena eku fumeni ka yona loku nga etilweni. Ku twala a ku ve ka yena hi mikarhi ni mikarhi! Amen!

₁₉Rungula Prisila na Akwila, ni va yindlu ya Onesiforo.

₂₀Erasto u sele eKorinto; loko a ri Trofimo, ndzi n'wi siyile eMileta a vabya. ₂₁Hatlisa ku ta, vuxika byi nga si fika.

Yubulo wa ku rungula, na Pude, na Lino, na Klawudiya, ni vamakwerhu hinkwavo.

₂₂Hosi Yesu Kriste a yi ve ni moya wa wena! Tintswalo a ti ve na n'wina!