2 SAMIELE 16

₁Davhida, kuteloko a hundzanyanile nhlohlorhi, ku ta Siba, nandza wa Mefiboxete, emahlweni ka yena, a ri ni timbhongolo timbirhi leti rhwaleke swinkwa swa madzana mambirhi, ni mabuwu ya dzana ya vhinya leyi omeke, ni dzana ra mabuwu ya mihandzu ya hlovo, ni nghotsa ya vhinyo. ₂Hosi yi ku eka Siba: “U ta endla yini hi swilo leswi?” Siba a ku: “Timbhongolo, ti ta va swifuwo swa yindlu ya hosi, swinkwa ni mihandzu ya hlovo, i swakudya swa majaha, ni vhinyo i swakunwa swa loyi a nga ta karhala emananga.” ₃Kutani hosi yi ku: “N'wana wa hosi ya wena u kwihi xana?” Siba a ku eka hosi: “Waswivo, u sele eYerusalema, hikuva a a ku: ‘Namuntlha yindlu ya Israele yi ta ndzi tlherisela ku fuma ka tatana.’ ” ₄Hosi yi ku eka Siba: “Waswivo, hinkwaswo leswi ngi swi ri swa Mefiboxete i swa wena.” Kutani Siba a ku: “Ndza khinsama. A ndzi kume tintswalo emahlweni ka wena hosi, n'wini wanga!”

₅Kakuloko Davhida a fika eBahurimi, ku huma kona munhu la nga xaka ra yindlu ya Sawulo, la thyiwaka Ximeyi, n'wana Gera; a huma a ri karhi a rhuketela. ₆A hoxetela Davhida hi maribye ni malandza hinkwawo ya hosi Davhida, ni tiko hinkwaro, ni vavanuna hinkwavo va tinhenha lava nga evokweni ra yena ra xinene ni ra ximatsi. ₇Ximeyi a vulavula a ri karhi a rhukana, a ku: “Huma, huma, munhu wa ngati, munhu wa Beliyali! ₈Yehovha a a tlherisele ehenhla ka wena ngati hinkwayo ya yindlu ya Sawulo, loyi u fumaka ematshan'weni ya yena, kutani Yehovha u vekile vuhosi emavokweni ya Abixalomu, n'wana wa wena; loko u ri wena u le khombyeni ra xiviri xa wena, hikuva u munhu wa ngati!”

₉Kavaloko Abixayi, n'wana Seruya, a ku eka hosi: “Xana mbyana ya ku fa leyi yi rhuketela yini hosi, n'wini wanga? Ndzi pfumelele leswaku ndzi ya n'wi tsema nhloko!” ₁₀Hosi yi ku: “Ku ni mhaka yihi exikarhi ka mina na n'wina, vana va Seruya xana? A a rhuketele; hikuva Yehovha u n'wi byerile, a ku: ‘U ta rhuketela Davhida.’ Kutani i mani la nga ta ku: ‘U endlisela yini sweswo xana?’ ” ₁₁Kutani Davhida a ku eka Abixayi ni ka malandza ya yena hinkwawo: “Maswivo, n'wananga la humeke exisutini xa mina, u lava vutomi bya mina; ngopfungopfu loyi wa Benjamini u ta byi lavisisa! N'wi tshikeni a rhuketela, hikuva Yehovha u n'wi byerise sweswo. ₁₂Kumbe Yehovha u ta languta ku tsongahatiwa ka mina, kutani Yehovha u ta ndzi tlherisela leswinene ematshan'weni ya mirhukano ya siku leri.” ₁₃Sweswo Davhida ni vanhu va yena a va famba hi ndlela ya vona, kambe Ximeyi a a famba hitlhelo ra ntshava a langutene na yena, kutani loko a ri karhi a famba, a rhuketela, a hoxetela maribye emahlweni ka yena, a hoxa ni ntshuri. ₁₄Kutani hosi ni tiko hinkwaro leri nga na yena, va fika va karhele, kutani va hefemula kona.

₁₅Kambe Abixalomu ni tiko hinkwaro, va ri vanhu va Israele, a va tile eYerusalema; na yena Ahitofele a a ri na yena. ₁₆Kuteloko Huxayi, Muariki, nakulobye wa Davhida, a ta eka Abixalomu, a ku eka Abixalomu: “Hosi a yi hanye!” ₁₇Kavaloko Abixalomu a ku eka Huxayi: “Xana hi rona rirhandzu ra wena leri u rhandzaka nakuloni ha rona xana? A ku yanga ha yini ni nakuloni xana?” ₁₈Huxayi a ku eka Abixalomu: “E-e; kambe la hlawuriweke hi Yehovha ni tiko leri, ni vanhu va Israele hinkwavo, xana a ndzi nga vi na yena ni ku tshama na yena xana? ₁₉Na swona ndzi ta tirhela mani-ke? A hi n'wana wa yena xana? Kukotisa leswi ndzi tirheleke tata wa wena, ndzi ta ku tirhela na wena.”

₂₀Abixalomu a ku eka Ahitofele: “Endlani makungu, mi kanela leswi hi nga ta swi endla!” ₂₁Kutani Ahitofele a ku eka Abixalomu: “Yana eka vasati lavatsongo va tata wa wena, lava a va siyeke ku langutela yindlu; sweswo, Vaisraele hinkwavo va ta tiva leswaku u tiendle xisandzu eka tata wa wena kutani mavoko ya hinkwavo lava nga na wena ma ta tiyisiwa.” ₂₂Kavaloko va dzimela Abixalomu tende elwangwini, kutani Abixalomu a nghena eka vasati lavatsongo va tata wa yena emahlweni ka Vaisraele hinkwavo. ₂₃Hi masiku lawa, timhaka leti vuriwaka hi Ahitofele a ti ringanisiwa ni rito ra Xikwembu. A swi ri tano ni makungu hinkwawo ya Ahitofele, hambi ku ri eka Davhida, hambi eka Abixalomu.